مايدانگەرلەردى ەسكە الدى

ءىس-شاراعا اقتوبە وبلىسىنىڭ اكىمى ەرالى توعجانوۆ, پارلامەنت جانە وبلىستىق ءماسليحات دەپۋتاتتارى, مەملەكەتتىك ورگانداردىڭ وكىلدەرى, ءوڭىر تۇرعىندارى مەن قوناقتارى قاتىستى. وبلىس اكىمى جەڭىس كۇنى تاريحي ەسكەرتكىشتەردىڭ ماڭىنا جينالىپ, مايدانگەرلەر مەن تىل ەڭبەككەرلەرىن ەسكە الۋعا قاتىسقان, رۋحتارىنا تاعزىم ەتكەن بارشا اقتوبەلىكتەرگە العىسىن ءبىلدىردى.

1941-1945 جىلدارداعى كەڭەس-گەرمان سوعىسىنا اقتوبە وبلىسى­نان 122 مىڭ ادام اسكەرگە شاقى­رىلىپ, ولاردىڭ 36 مىڭنان استامى مايدان دالاسىنان قايتپادى, 30 مىڭنان استامى ءىز-ءتۇزسىز جوعا­لىپ كەتكەندەر ساناتىندا. سۇراپىل قان مايداندا ەر­لىك كورسەتكەن 35 اقتو­بەلىك كەڭەس ودا­عىنىڭ باتى­رى اتانسا, 9-ى «داڭق» وردەنى­مەن ماراپاتتالدى.

بۇگىندە اقتوبە وبلىسىندا ءۇش مايدانگەر عانا قالدى. ولار­دىڭ ءبىرى – 103 جاستاعى ساتىلعان بەكماعامبەتوۆ. ول 101-اتقىش­تار بريگاداسىنىڭ قۇرامىندا رجەۆ, ورەل, بەلگورود, كۋرس شايقاس­تارىنا قاتىسىپ, ەلگە 1945 جىلى ورالعان. بىرنەشە رەت جارالانىپ, گوسپيتالدا جاتىپ ەمدەلگەننەن كەيىن قايتادان مايدان دالاسىنا جىبەرىلگەن. سوعىستان كەيىن قوبدا اۋدانى جيرەنقوپا اۋىلىندا مال دارىگەرى بولىپ جۇمىس ىستەگەن اقساقال – بۇگىندە جەتى بالاسىنان نەمەرە-شوبەرە ءسۇيىپ وتىرعان باقىتتى جان. ءوڭىر باسشىسى حرومتاۋ قالاسىندا تۇراتىن 99 جاستاعى مايدانگەر ۆاسيلي گرەتسكيدى دە ارنايى بارىپ قۇتتىقتادى. ءجۇرىپ-تۇرۋى قيىنداعان اقساقال جەڭىس كۇنى ءۇيىنىڭ اۋلاسىندا ۇلكەن كونتسەرت وتكىزىلسە دەگەن تىلەك ايتقان ەكەن. ۆاسيلي اقساقال مايدان اندەرى شىرقالعان ۇلكەن كونتسەرتتى كورىپ, ءماز-مەيرام بولدى.

ايتا كەتۋ كەرەك, اقتوبەدە جا­ساق­­تالعان 101-اتقىشتار بريگادا­سى مەن الماتىدا جاساقتالعان 100-دەربەس اتقىشتار بريگاداسى 1942 جىل­­دىڭ 25 قاراشاسىندا رجەۆ – زۋب­تسوۆ – سىچەۆكا – گجاتسك – ۆياز­­ما – بەلىي – ولەنين اۋما­عىندا وت­كەن «مارس» وپەراتسياسى­نا قاتىس­قان. ەكى بريگادا ولەنين اۋدانىن­دا شايقاستى. 17 ايدان كەيىن رجەۆ پلاتس­­­دارمى ازات ەتىلگەندە قوس بري­­­­گا­دانىڭ 10 مىڭنان استام ­جا­ۋىن­­­گەرىنەن تەك 1030-ى عانا ءتىرى شىق­قان.

اقتوبە وبلىسى