وتان قورعاۋشىلار جانە جەڭىس كۇنى قارساڭىندا ۇلتتىق قاۋىپسىزدىك كوميتەتىنىڭ شىعىس قازاقستان وبلىسى بويىنشا دەپارتامەنتى ۇقك سالاسىندا قىزمەت ەتۋدى ارماندايتىن جاستار ءۇشىن «اشىق ەسىك» كۇنىن وتكىزدى.
جاستاردى ەل ءۇشىن ەڭبەك ەتۋگە شاقىرۋدى ماقسات ەتكەن ءىس-شاراعا وبلىس ورتالىعى مەن جاقىن اۋداندارداعى مەكتەپ وقۋشىلارى مەن جوعارى وقۋ ورىندارىنىڭ ستۋدەنتتەرى قاتىستى. اۋەلى دەپارتامەنت عيماراتىنىڭ ءماجىلىس زالىندا جاستارعا ارنايى قىزمەتتىڭ قىر-سىرى ءتۇسىندىرىلىپ, بۇل سالاعا قالاي جۇمىسقا كەلۋگە بولاتىنى تۋرالى ايتىلدى. ءوز كەزەكتەرىندە وقۋشىلار مەن ستۋدەنتتەر سۇراقتارىن قويدى.
ەڭ باستى ايتا كەتەرلىگى, ۇلتتىق قاۋىپسىزدىك كوميتەتىنە جۇمىسقا تۇرۋ ءۇشىن جوعارى ءبىلىم مەن ارنايى تەكسەرۋدەن ءوتۋ قاجەت. ال مەكتەپتى ەندى بىتىرەتىن تۇلەكتەر ءۇشىن الماتىدا اتالعان كوميتەتتىڭ ارنايى وقۋ ورنى بار. ول وقۋ-ورنىندا وقيمىن دەگەن تۇلەكتەردىڭ ۇبت-دا جيناعان ۇپايى مەن دەنە دايىندىعى ماڭىزدى.
– دەپارتامەنتى ۇيىمداستىرعان قوعامدىق ءىس-شارادا ءبىز مەكتەپ وقۋشىلارى مەن جوعارى وقۋ ورىندارىنىڭ ستۋدەنتتەرىنە «اشىق ەسىك كۇنىن» ۇيىمداستىردىق. جالپى, بۇل جەرگە جينالعانداردىڭ كوپشىلىگى نەگىزىنەن بولاشاقتا ءوز ومىرلەرىن ۇلتتىق قاۋىپسىزدىك كوميتەتىندەگى جۇمىسپەن بايلانىستىرامىن دەگەن جاستار. ولاردى مازالاعان سۇراقتارىنا جاۋاپ بەردىك. ۇلتتىق قاۋىپسىزدىك كوميتەتىنىڭ جۇمىسى تۋرالى جالپىلاما مالىمەت بەردىك, – دەيدى كوميتەتتىڭ شىعىس قازاقستان وبلىسى بويىنشا دەپارتامەنتىنىڭ قىزمەتكەرى دۋلات ساحاريەۆ.
بۇل ءىس-شارا بۇعان دەيىن دە ۇيىمداستىرىلعان. جاستار اراسىندا ۇلتتىق قاۋىپسىزدىك سالاسىندا قىزمەت ەتۋگە نيەت بىلدىرگەندەر دە ارتىپ كەلەدى. كەزدەسۋدەن سوڭ وقۋشىلار مەن ستۋدەنتتەر قارۋ-جاراق تۇرلەرىمەن تانىستى. قولدارىنا ۇستاپ, قىزىقتادى.
– «اشىق ەسىك» كۇنى بىزگە وسى سالاعا قالاي جۇمىسقا كەلۋگە بولاتىنى, ول ءۇشىن قاجەتتى ءبىلىم دەڭگەيى تۋرالى مالىمەتتەر بەرىلدى. ۇلتتىق قاۋىپسىزدىك كوميتەتىنىڭ جۇمىسىمەن تانىستىم. ارنايى قىزمەتتىڭ جۇمىسىن ىشىنەن كورىپ, قولداناتىن تەحنيكالارى مەن قارۋ-جاراقتارىن ۇستاپ كوردىك. بولاشاقتا جوعارى اسكەري اكادەميانى ءتامامداپ, باسقارۋشى وفيتسەر ماماندىعىن الىپ شىققىم كەلەدى, دەيدى رايىمجان مارسەكوۆ اتىنداعى ورتا مەكتەپتىڭ جوعارى سىنىپ وقۋشىسى راۆيل بايعازين.
ەرەكشە ۇيىمداستىرىلعان ءىس-شارا سوڭىندا قاتىسۋشىلارعا ۇلتتىق قاۋىپسىزدىك كوميتەتىنىڭ شىعىس قازاقستان وبلىسى بويىنشا دەپارتامەنتى اتىنان ەستەلىك سىيلىقتار تابىستالدى.
شىعىس قازاقستان وبلىسى