انا مەن بالا باسپانانى اڭساپ ءجۇر

ايگۇل نابيەۆا پاۆلودار قالاسىندا ومىرلىك سەرىگىن كە­زىكتىرىپ, تۇرمىس قۇرعان سوڭ, كوپ ۇزاماي 2001 جىلى كوز قۋا­نىشى تۇڭعىشى دۇنيەگە كەلگەن. بالا ساپ-ساۋ. قانداي دا ءبىر ەرەكشەلىگى بايقالماعان. سەگىز ايىندا قورباڭداپ جۇرە باستاپتى. سودان ءبىر كۇن جاس وتباسى تۇڭعىشىنىڭ اۋىرىپ, مازاسىزدانا باستاعانىن اڭعارىپ, جەدەل جاردەم شاقىرادى. كەيىن بالا جان ساقتاۋ بولىمىنە ءتۇسىپ, جاس وتباسى نارەستەدەن كوز جازىپ قالادى. تاعدىردىڭ باسقا سالعان تاۋقىمەتىنە كونبەس­كە امال جوق. وسىنى تۇسىنگەن جاس وتباسى ەكىنشى پەرزەنتىن دۇنيەگە اكەلۋدى ويلاستىرادى. دارىگەرگە قارالىپ, ءبىراز ەمدەلگەننەن كەيىن, جىگەرى جا­سى­ماعان وتباسىندا ەكىنشى ۇل دۇ­نيەگە ەسىگىن اشقان. تۋ­عان­دا نارەس­تەنىڭ سالماعى 4 800 گرامم بولىپتى. اراعا بى­رەر كۇن سالىپ, دارىگەرلەر بالا­نىڭ جۇرەگىندە اقاۋ بارىن انىق­تاعان.

– دارىگەرلەردىڭ ەكىنشى­مىزدىڭ جۇرەگىندە اقاۋ بار دەگەنى بىزگە اۋىر تيگەن حاباردىڭ تەك باسى عانا ەكەنىن كەيىن بىلدىك. تۇڭعىشىمىزدان كوز جازىپ قالعاننان كەيىن مەن ءوزىمدى باس­قارا الماي, دەپرەسسياعا تۇس­كەنمىن. بالكىم, بۇل ەكىنشى با­لا­مىزعا اسەر ەتكەن بولار دەپ ويلايمىن قازىر. بالامىز ون ەكى كۇننەن سوڭ ينسۋلت ال­دى. پاۆلودارداعى بالالار رەا­­نيماتسياسىنا باردىق. سول كەز بالامدى ەمدەپ-جازا­مىن دەپ بەكىندىم, بوتەن وي مازا­لامادى. ءبىر اي اۋرۋحانا­دا بولدىق. ين­سۋلتتەن كە­يىن بالامدى باۋىرى­ما العان­دا وعاش قيمىلداپ, جان داۋى­سىمەن ايقايعا باساتىندى شىعار­عا­نىن ءبىلدىم. جاعدايدى تۇسىنگەم جوق. باسىم قاتتى. سول ساتتەگى احۋالىمدى قازىر سوزبەن ايتىپ جەت­كىزە المايمىن. ءوزىمدى-ءوزىم جىگەر­لەندىرىپ, بالامدى قالاي دا سا­ۋىقتىرىپ السام دەگەن وي مازا بەرمەدى. التى ايدان سوڭ رەسەيدىڭ ومسك قالاسىنا بار­دىق. بۇرىن بالامىز باسىن كوتەرە الماسا, ومسكىگە بەس رەت قاتىناعاننان كەيىن ونى قوزعالتا باستادى. ەلدە مەيىر­بان جاندار كوپ قوي, قول ءۇشىن سوزعان اعايىنعا العىس ايتامىن, – دەيدى ايگۇل نابيەۆا.

ەم شارالاردان كەيىن دا­رى­گەرلەر بالاعا «سيندروم لەننوكسا-گاستو» دياگنوزىن قويعان. بۇل – ادەتتە بالالاردا ءجيى كەزدەسەتىن ەپيلەپسيا­نىڭ كۇردەلى ءتۇرى سانالادى. سون­دىقتان نەۆرولوگتار ەرەكشە بالانىڭ دەرتتەن ايىعۋى ەكىتالاي ەكەنىن ەسكەرتكەن. ەرەك­شە بالالار تاربيەلەنەتىن ين­تەرناتقا تاپسىرۋدى سۇرا­عان. «انا كەسىمى اينىمايدى» ەمەس پە؟ ايگۇل بالاسىن ءوزى اسىراۋعا بەل بايلاعان. ول ەرەكشە جانداردىڭ سەزۋ, ەس­تۋ, كورۋ قابىلەتى ارقىلى ءمان-جاي­دى تۇسىنەتىنىن بىلگەن. ۋاقىت ساتىمەن ايگۇل نابيەۆا الەۋمەتتىك جەلىدە ەپيلەپسياعا شالدىققان بالالاردىڭ اتا-اناسى بىرىككەن توپتارعا قوسى­لىپ, كەڭەسىپ وتىرۋعا داعدى­لانعان. مەيىربان انا بالاسىن باۋىرىنا باسقاننان كەيىن العاشقى 5 جىل قينالعانىمەن, قازىر ۇيرەنىپ قالعانىن ايتادى.

– بۇرىن-سوڭدى ەرەكشە با­لانىڭ كۇتىمى قانداي بولاتىنىن كورمەگەندەر ۇركە قارايدى. ءبىز ۇيرەندىك. ۇيرەنگەن سوڭ دا تاڭەرتەڭ, كەشكە بالام ۇيىقتاپ جاتقاندا ءبىر مەزگىل قولدان كەلەتىن جۇمىستارعا شىعىپ ءجۇرمىن. ەكىباستۇز­دان استاناعا بالامنىڭ ەم شارا الۋىنا جاعداي جاساپ, ءوزىم جۇمىسقا ورنالاسۋ ءۇشىن كەلدىم. پاتەر جالداپ تۇرا­مىز. جاناشىر كۇيەۋىم دە ومىر­دەن ءوتتى. ونىڭ زەينەتاقى قو­رىنداعى قارجىسىن بالا 18-گە تولماعانشا الا المايمىز. قيىنى, ءۇي كەزەگىنە تۇرۋ ءۇشىن زاڭ بويىنشا كەمى ءۇش جىل كۇتەدى ەكەنبىز. مەنىڭ كەلگەنىمە ءبىر جارىم جىلدان مىنە-مىنە اسىپ بارادى. ءبىزدىڭ بارماعان جەرىمىز, باسپاعان تاۋىمىز  قال­مادى. قازىر ءوزىم جۇمىس ىستەپ تاپقان-تايانعانىما,  كومەك قولىن سوزعان جانداردىڭ قار­جى­سىن قوسىپ, ءدارى-دارمەكتى گەر­ما­نيادان الىپ وتىرمىز. وسى كۇنگە دەيىن ەلدەن كو­مەك سۇراعانىم جوق. ەندى قايىرىم­دىلىق قورلارىنا جۇگى­نۋدى ويلاپ وتىرمىن, – دەيدى انا كۇرسىنىپ.

ەلورداعا ق ۇلىنىنىڭ قا­مى ءۇشىن قونىس اۋدارعان ايگۇل نابيەۆا پەرزەنتىنىڭ دەنساۋ­لىعىنا الاڭداۋلى. ال انا مەن بالانىڭ ورتاق ارمانى – پاتەر كەزەگىنە تۇرىپ, قالاي دا ءۇيلى بولۋ.