2023 جىلى اسكەري ۇشقىشتاردىڭ جالاقىسى ورتاشا العاندا 60 پايىزعا وسەدى. سونداي-اق وسى سالاداعى وقىتۋشىلار مەن دارىگەرلەردىڭ جالاقىسى دا كوبەيەدى. بۇل تۋرالى بۇكىلارميالىق كەڭەس وتىرىسىندا ايتىلدى, دەپ حابارلايدى Egemen.kz.
وتىرىس بارىسىندا مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ تاعى ءبىر جاعىمدى جاڭالىقپەن ءبولىستى. ەندى مەرزىمدى اسكەري قىزمەتتەگى ساربازدار نەسيەسىن تولەۋ مىندەتىنەن ۋاقىتشا بوساتىلادى.
«اسكەري قىزمەتتە «الەۋمەتتىك ءليفتتىڭ» بولۋى ماڭىزدى. سول ارقىلى جاستاردىڭ قوعامنان ءوز ورنىن تابۋعا مۇمكىندىك بەرۋىمىز كەرەك. قازىر وسى باعىتتا ناقتى جۇمىس جاسالىپ جاتىر. اسكەري بورىشىن وتەپ كەلگەن ازاماتتار ەندى جوعارى وقۋ ورنىنا جەڭىلدىكپەن تۇسەدى. مەرزىمدى اسكەري قىزمەتتەگى ساربازدار نەسيەسىن تولەۋ مىندەتىنەن ۋاقىتشا بوساتىلادى. سونداي-اق ولار وزدەرى قالاسا, ارميا قاتارىنان ناقتى ماماندىق الىپ شىعادى. جالپى, ساربازداردى الەۋمەتتىك قولداۋ شارالارىن مەيلىنشە كوبەيتۋ قاجەت», دەدى پرەزيدەنت.
مەملەكەت باسشىسىنىڭ ايتۋىنشا, اسكەري قىزمەتشىلەرگە جاقسى جالاقى تولەنۋى كەرەك. پرەزيدەنتتىڭ ايتۋىنشا, ەل ۇكىمەتى كۇشتىك قۇرىلىمدارعا ەڭبەكاقى تولەۋدىڭ بىرىڭعاي جۇيەسىنە كوشكەن كەزدە ءدال وسىنى ەسكەرۋگە ءتيىس. سونداي-اق قازاقستاندا اسكەري قىزمەتشىلەردى زەينەتاقىمەن قامتۋ ماسەلەسى دە قايتا قارالىپ جاتىر.
«بيىل اسكەري ۇشقىشتاردىڭ جالاقىسى ورتاشا العاندا 60 پايىزعا وسەدى. وسى سالاداعى وقىتۋشىلار مەن دارىگەرلەردىڭ جالاقىسى دا كوبەيەدى. كەلەسى جىلى اسكەري اتاق ءۇشىن تولەنەتىن ايلىق اقى 30 پايىزعا ارتادى. اسكەري قىزمەتشىلەردى زەينەتاقىمەن قامتۋ ماسەلەسى دە قايتا قارالۋدا. سەرجانتتاردى, وفيتسەرلەردى الەۋمەتتىك قولداۋ جۇمىسى جالعاسادى. ولار تۇرمىسىنا الاڭداماي, ەل قورعاۋعا ساقاداي ساي بولۋى كەرەك», دەپ قوستى قاسىم-جومارت كەمەل ۇلى.