شقو-دا سوعىس ارداگەرلەرى 1,5 ميلليون تەڭگەدەن الدى

دوسحان قايرعازينوۆتىڭ ايتۋىنشا, جەڭىس كۇنىنە وراي وبلىستاعى 17 ۇلى وتان سوعىسىنىڭ ارداگەرى بىرجولعى ماتەريالدىق كومەك رەتىندە ءبىر جارىم ميلليون تەڭگەدەن العان. سونداي-اق ۇلى وتان سوعىسىنا قاتىسۋشىلار مەن مۇگەدەكتەرگە تەڭەستىرىلگەن ادامدارعا 100 مىڭ تەڭگەدەن بەرىلگەن.   سونىمەن قاتار ۇلى وتان سوعىسى جىلدارىندا تىلداعى قاجىرلى ەڭبەگى مەن ءمىنسىز اسكەري قىزمەتى ءۇشىن بۇرىنعى كسر وداعىنىڭ وردەندەرىمەن جانە مەدالدارىمەن ناگرادتالعان وبلىس تۇرعىندارى دا 100 مىڭ تەڭگەگە يە بولدى. وڭىردە بۇل ساناتتاعى 113 ادام بار. ال ناگرادتالماعان 5601 ادامعا مەرەكە قۇرمەتىنە 50 مىڭ تەڭگەدەن تولەندى.   دوسحان قايرعازينوۆتىڭ ايتۋىنشا, مەرەكەگە وراي بيۋدجەتتەن تولەنەتىن تولەمدەردىڭ جالپى سوماسى 530 ميلليون تەڭگەدەن اسادى.