ارقالىق قالاسىنىڭ ورتالىعىندا 1916 جىلعى ۇلت-ازاتتىق كوتەرىلىسىندەگى ءىرى تۇلعالاردىڭ ءبىرى – كەيكى باتىرعا ەسكەرتكىش ورناتىلدى. ەسكەرتكىشتىڭ ءوزىن جەرگىلىكتى ءمۇسىنشى ابىلبەك ۇزاقوۆ وتكەن جىلى دايىنداپ قويعان بولاتىن. ونىڭ تاس-تۇعىرى “قازاقستان اليۋميني” اكتسيونەرلىك قوعامى تورعاي بوكسيت كەن باسقارماسىنىڭ ديرەكتورى ۆيكتور ءروديننىڭ دەمەۋشىلىگىمەن جاسالدى.
ارقالىق وڭىرىندەگى ەلەنا تسۆەنتۋح باسقاراتىن “جاس ۇلان” بالالار ۇيىمى ەكى جىل بويى “اۋىلىم – التىن بەسىگىم” جوباسى بويىنشا اۋقىمدى تاريحي-مادەني زەرتتەۋ جۇمىسىن جۇرگىزىپ كەلەدى. وسى جوبا شەڭبەرىندە جاسۇلاندىقتار كەيكى باتىر تۋعان جەرى-ەلى ءۇشىن سوعىسقان, قان توككەن جەرلەردە بولىپ قايتتى. جينالعان ماتەريالدار نەگىزىندە ەلەنا تسۆەنتۋحتىڭ جەتەكشىلىگىمەن كەيكى باتىردىڭ ەسىمىن ماڭگى ەستە قالدىرۋ ءىسى باستالىپ كەتتى. ۇكىمەتتىك ەمەس ۇيىم جەتەكشىسىنىڭ باستاماسىن ۆيكتور پاۆلوۆيچ قولداپ, يگىلىكتى ءىس جۇزەگە استى.
قولىنا شي مىلتىق ۇستاعان مەرگەن بابا تاس-تۇعىردىڭ ۇستىنەن الىسقا قاراپ وتىر. ءمۇسىنشى ءابىلبەك ۇزاقوۆ سومداعان حالىق باتىرىنىڭ تاس كەيپىنەن حالقىمىز ءتاۋەلسىزدىك ءۇشىن باستان كەشكەن سۇرعىلت كۇندەر ەلەستەگەندەي بولادى.
ءمۇسىنشى بۇعان دەيىن تورعاي ءوڭىرىندە حالىق تاريحىنان سىر شەرتەتىن بىرنەشە تۋىندى جاساعان بولاتىن.
ءنازيرا جارىمبەتوۆا.
ارقالىق.