قر پارلامەنتى سەناتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى اسقار شاكىروۆ كورەيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى كۋ حونگ سوكپەن كەزدەستى, دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.
تاراپتار كەلىسسوز بارىسىندا ەكى ەلدىڭ تاۋار اينالىمى, دەنساۋلىق ساقتاۋ, ءبىلىم بەرۋ, مادەني الماسۋ سالاسىنداعى, سونداي-اق حالىقارالىق ۇيىمدار اياسىنداعى ىنتىماقتاستىقتىڭ اعىمداعى ماسەلەلەرى مەن ءوزارا ءىس-قيمىلىنىڭ كەلەشەكتەگى باعىتتارىن تالقىلادى.
«پارلامەنتارالىق ىنتىماقتاستىق ساياسي ۇنقاتىسۋدىڭ اجىراماس بولىگى بولىپ تابىلادى. ونى قازاقستان باسشىسىنىڭ 2021 جىلى كورەيا رەسپۋبليكاسىنا جاساعان ساپارى اياسىندا قول جەتكەن ۋاعدالاستىقتار اياسىندا ناقتى مازمۇنمەن بايىتۋ قاجەت. ءبىزدىڭ ەلدەرىمىزدىڭ پارلامەنتتەرىندە دوستىق پەن ىنتىماقتاستىق توپتارى جۇمىس ىستەيدى, ولاردىڭ جۇمىسىنا قارقىن بەرۋگە بولادى», دەدى سەناتور.
كۋ حونگ سوك ءوز كەزەگىندە ەكى ەلدىڭ ىنتىماقتاستىعىن ودان ءارى نىعايتۋدىڭ ماڭىزىنا توقتالا كەلىپ, مەملەكەتتەرىمىز اراسىنداعى ديپلوماتيالىق قاتىناستار ورناعان ساتتەن باستاپ قازاقستان ءوزىن سەنىمدى ساياسي جانە ەكونوميكالىق ارىپتەس رەتىندە تانىتقانىن اتاپ ءوتتى.