قازاقستان حالقى اسسامبلەياسىنىڭ باستى ماقساتى – ەلىمىزدەگى بارشا ۇلتتاردىڭ باسىن قوسىپ, مۇراتى ءبىر, تاعدىرى ورتاق جۇرتقا اينالدىرۋ. قازىر ءبىز سول العا قويعان ماقساتتىڭ ورىندالعانىن, اسسامبلەيا جۇمىسى ءوز ناتيجەسىن بەرگەنىن كورىپ وتىرمىز. ويتكەنى قازاقستان حالقى ءبىر شاڭىراقتىڭ استىندا ءبىر وتباسىنىڭ بالاسىنداي تاتۋ-ءتاتتى ءومىر كەشىپ كەلەدى.
بۇگىنگى ۇرپاقتىڭ مىندەتى – بىرلىك پەن ىنتىماقتى ودان ءارى نىعايتۋ. سەبەبى تۇراقتىلىق تا, تىنىشتىق تا, دامۋ دا – بىرلىكتە! بولاشاعىن ويلاعان, ۇرپاعىنىڭ تاعدىرىنا الاڭداعان ءاربىر حالىقتىڭ ارمانى سول بولسا كەرەك. ول ءۇشىن ءبىزدىڭ الدىمىزدا اتقارىلۋعا ءتيىس مىندەتتەر بار. بۇل جۇمىستار بۇرىننان دا جۇرگىزىلىپ كەلەدى, بىراق ولاردى ءالى دە كۇشەيتە ءتۇسۋ قاجەت. سونىڭ ەڭ باستىسى – ەل حالقىن مەملەكەتتىك ءتىلدىڭ اينالاسىندا ۇيىستىرۋ. قاي ۇلتتىڭ وكىلى بولعانىنا قاراماستان, وسى توپىراقتا ءونىپ-ءوسىپ وتىرعان ءاربىر ازامات مەملەكەتتىك ءتىلدى ءبىلۋى شارت. ەگەر ءبىز ءبارىمىز قازاق تىلىندە سويلەسەك, ويىمىز دا ءبىر بولادى, جۇرەگىمىز دە بىرگە سوعادى.
اسسامبلەيا وسى باعىتتا كوپ جۇمىستار اتقارىپ جاتىر. مىسالى, ونىڭ ۇيىتقى بولۋىمەن جاستار اراسىندا «ۇيدە سويلە» جوباسى قولعا الىندى. سونىمەن بىرگە ءاربىر «دوستىق ۇيىندە» قازاق ءتىلىن ۇيرەتەتىن تەگىن كۋرستار اشىلعان. اسسامبلەيانىڭ مەملەكەتتىك ءتىلدى دامىتۋعا باعىتتالعان «مىڭ بالا» رەسپۋبليكالىق جوباسى بار. ول بالالارعا قازاق ءتىلى مەن قازاق حالقىنىڭ رۋحاني قۇندىلىقتارىن ناسيحاتتايدى.
ءاربىر ازامات قازاقستان حالقى اسسامبلەياسى تاراپىنان اتقارىلىپ جاتقان وسى جۇمىستارعا ءوز ۇلەسىن قوسىپ, اتسالىسۋى كەرەك. قازاق ءتىلى – قازاقستاندى مەكەندەگەن بارلىق حالىقتىڭ ۇلتارالىق ءتىلى بولعانشا بۇل جۇمىستار توقتاماۋى ءتيىس دەپ ەسەپتەيمىن.
شەرزود پۋلاتوۆ,
استانا قالاسى وزبەك ەتنومادەني بىرلەستىگىنىڭ توراعاسى, پرەزيدەنت جانىنداعى ۇلتتىق قۇرىلتاي مۇشەسى