حالىقارالىق «بولاشاق» باعدارلاماسىنىڭ تۇلەگى, PhD, بيولوگ-گەنەتيك باۋىرجان ايتۋوۆ ءتىس ەمالىن قالپىنا كەلتىرەتىن «InnoDent» تەحنولوگياسىن ويلاپ تاپتى. تىڭ تەحنولوگيا تىسكە تۇسە باستاعان داق تۇرىندەگى كاريەستى ەمدەۋگە مۇمكىندىك بەرەدى.
باۋىرجان ارىپتەستەرىمەن بىرگە بۇزىلعان ەمالدى قالپىنا كەلتىرۋ ءۇشىن امين قىشقىلدارىنان امەلوگەنين اقۋىزىن جاساندى تۇردە سينتەزدەگەن. عالىمنىڭ ايتۋىنشا, ونى كاريەستىڭ العاشقى ساتىسىندا تىسكە تامىزسا, ءبىر اي ىشىندە ءتىس ەمالى قالپىنا كەلەدى. وسىلايشا, ءدارى ءتىس جەگىسىن بۇرعىلاۋسىز, وپەراتسياسىز ەمدەۋگە مۇمكىندىك بەرەدى.
ونەرتاپقىشتىڭ تەحنولوگياسى پاتەنتتەلگەن. قازىرگى تاڭدا بۇل پرەپاراتتى تەك ەلدە عانا ەمەس, شەتەلدە دە قولدانادى. ەلىمىزدە الماتى مەن استانانىڭ ءتىس ەمحانالارى پايدالانىپ ءجۇر.
باۋىرجان ايتۋوۆ «بولاشاق» باعدارلاماسىمەن يورك ۋنيۆەرسيتەتىندە گەنەتيكا سالاسىنداعى باكالاۆر دارەجەسىن العان. ەلگە ورالعاننان كەيىن وقۋىن ەۋرازيا ۇلتتىق ۋنيۆەرسيتەتىندە جالعاستىرىپ, وندا ماگيستر جانە كەيىننەن دوكتور دارەجەسىن يەلەندى. 2011-2014 جىلدارى Nazarbayev University-دە قىزمەت اتقارعان.
بۇگىندە جاس عالىم ءارتۇرلى بيوتەحنولوگيالىق جاڭالىقتاردى اشۋمەن اينالاسىپ جاتىر. سونداي-اق باۋىرجان – «InnoDent» جانە «Center for BioEnergy Research» كومپانيالارىنىڭ نەگىزىن قالاۋشى.