ۇلتتىق ويىنداردىڭ بالانىڭ زەرەكتىگى مەن ەپتىلىگىن ۇشتاۋعا اسەرى زور. وسى باعىتتا ى.التىنسارين اتىنداعى ۇلتتىق ءبىلىم اكادەمياسى تاربيە جۇمىسىن ءتيىمدى ۇيىمداستىرۋ ماقساتىندا ورتا ءبىلىم بەرۋ ۇيىمدارىنىڭ جاڭا وقۋ جىلىنا «توعىز اي – توعىز ءىس-شارا» اتتى جوسپارىن ۇسىندى. وسى توعىز وقۋ ايىندا وقۋشىلار توعىز ءتۇرلى ءىس-شاراعا قاتىسادى.
– بۇل جوسپار بيىلعى ناۋرىزدا وقۋشىلار اراسىندا وتكەن «كۇي كۇمبىرى» رەسپۋبليكالىق دومبىراشىلار چەللەندجىنەن باستالدى. بارلىق ءىس-شارا ۇلتتىق قۇندىلىقتار نەگىزىندە تاربيە ۇدەرىسىنە بىرىڭعاي كوزقاراستى قامتاماسىز ەتۋگە باعىتتالعان, – دەدى ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى مادينا تىنىباەۆا.
ايتالىق, ءىس-شارا بەلگىلى ءبىر تارتىپپەن وتەدى. ماسەلەن, قىركۇيەك – «سەرگىتۋ ءساتى», قازان – ء«انۇران ايتۋ», قاراشا – «اسىق اتۋ», جەلتوقسان – «شىعارما جازۋ: بولاشاققا حات», قاڭتار – «قازاق ەسەبى», اقپان – «وقۋعا قۇشتار مەكتەپ», ناۋرىز – «دومبىراشىلار», ءساۋىر – «توعىزقۇمالاق, شاحمات ويىنى», مامىر – «جاسىل مەكەن» دەپ ءار اي تاقىرىپقا بولىنگەن.
قازىر ەلىمىزدە ۇلتتىق ويىندارعا قىزىعۋشىلىق ارتا تۇسكەنىن بايقايمىز. سونىڭ ءبىر كورىنىسى رەتىندە اسىق اتۋ سپورتىن ايتۋعا بولادى. بيىل مەملەكەت باسشىسى ستەپنوگور قالاسىندا سپورتشىلارمەن كەزدەسكەندە اسىق اتۋ سپورتىنا ەرەكشە ماڭىز بەرىپ, وسى سپورت ءتۇرىن حالىقارالىق دەڭگەيگە كوتەرىپ جاتىرمىز دەپ اتاپ ءوتتى.
رەسپۋبليكالىق اسىق اتۋ فەداراتسياسىنىڭ پرەزيدەنتى جومارت سابىرجان ۇلىنىڭ ايتۋىنشا, جالپى اسىق اتۋ سپورتى وتە ىڭعايلى. بۇل سپورت تۇرىمەن جىلدىڭ ءتورت مەزگىلىندە اينالىسۋعا مۇمكىندىك بار. وعان كەرەمەت سپورت الاڭى مەن قىمبات قۇرال دا قاجەت ەمەس. قاراجات جاعىنان دا شىعىن از. باستىسى, اسىق اتۋ سپورتى كەز كەلگەن ادامدى مەرگەندىككە, شاپشاڭدىققا, ءوزىن ورتادا ۇستاي بىلۋگە, ءبىر-بىرىنە قۇرمەت كورسەتۋگە, وزگەنىڭ ۇسىنىسى مەن قاتەسىن تۇسىنۋگە, ونىڭ كوزقاراسىمەن ساناسا ءبىلۋ سەكىلدى ادامدىق قاسيەتكە تاربيەلەيدى. مەديتسينا جاعىنان دا پايداسى مول.
بۇگىندە ەلىمىزدەگى 16 وبلىستا اككرەديتتەلگەن اسىق اتۋ فەدەراتسياسى جۇمىس ىستەيدى. سونداي-اق اسىق اتۋدان 1 124 جاتتىقتىرۋشى بار بولسا, ونىڭ 84-ءى شتاتتاعى جاتتىقتىرۋشىلار. كەيىنگى جىلدارى اسىق اتۋمەن اينالىساتىندار كوبەيگەن. قازىر ولاردىڭ سانى 77 864-نە جەتتى. ەل ايماعىندا 2 239 اسىق اتۋ سپورتىنىڭ ۇيىرمەسى بار. 2017 جىلى كورەي رەسپۋبليكاسىنىڭ چەدجۋ قالاسىندا ۇكىمەتارالىق ماتەريالدىق ەمەس مادەني مۇرانى قورعاۋ كوميتەتىنىڭ 12-سەسسياسىندا اسىق ويىنى يۋنەسكو-نىڭ ماتەريالدىق ەمەس مادەني مۇرا رەتىندەگى قورعاۋ تىزىمىنە كىردى. سونىمەن قاتار 2018 جىلى رەسپۋبليكالىق اسىق اتۋ فەدەراتسياسى ۇلتتىق سپورت فەدەراتسياسى رەتىندە ۇلتتىق وليمپيادا كوميتەتى تاراپىنان تانىلدى. بۇگىنگە دەيىن اسىق اتۋ سپورت تۇرىنەن 60-تان اسا سپورت شەبەرى دايىندالدى.
– ءبىز جىل سايىن 20-عا جۋىق سپورتتىق ءىس-شارا وتكىزەمىز. سونىڭ ىشىندە 3-ءۋى حالىقارالىق تۋرنير بولسا, 10-ى – ەل چەمپيوناتى. بىلتىر قىركۇيەكتە رۋمىنيانىڭ كونستانتا قالاسىندا 30 ەلدىڭ كومانداسى قاتىسقان الەم كۋبوگىندە ەلىمىزدىڭ اسىق اتۋ سپورتىنىڭ كۇراماسى ءبىرىنشى ورىن الدى. سونداي-اق وتكەن جىلى استانادا ۇيىمداستىرىلعان ازيا چەمپيوناتىندا دا ءبىزدىڭ قۇراما بيىكتەن كورىندى. سونىڭ ناتيجەسىندە سەگىز سپورتشىمىز العاش رەت «حالىقارالىق دارەجەدەگى سپورت شەبەرى» اتاعىنا يە بولدى. سونىمەن قاتار ەل قۇراماسى ءۇش رەت قىرعىزستانداعى «دۇنيەجۇزىلىك كوشپەلىلەر ويىندارى» مەن «وردو» ويىندارىنا قاتىسىپ, جۇلدەگەر اتاندى. ەندى 2024 جىلى ەلىمىزدە وتەتىن 5-ءشى «دۇنيەجۇزىلىك كوشپەندىلەر ويىندارىنىڭ» باعدارلاماسىنا اسىق اتۋ سپورتى (ۇلدار, قىزدار) كىرىپ وتىر. قازىر سوعان دايىندالىپ جاتىرمىز, – دەدى جومارت سابىرجان ۇلى.