شايبالى حوككەيدەن قازاقستان ۇلتتىق قۇراماسى مامىر ايىندا لاتۆيا مەن فينليانديادا جالاۋى جەلبىرەيتىن الەم چەمپيوناتىنا دايىندىق جۇمىسىن باستادى. عالىم مامبەتاليەۆ جەتەكشىلىك ەتەتىن قۇراما جاھاندىق دودا الدىندا وقۋ-جاتتىعۋ جيىنىن ەلورداداعى «بارىس ارەنا» مۇزايدىنىندا وتكىزىپ جاتىر. وتكەن سەنبى كۇنى قازاقستان ۇلتتىق قۇراماسى وڭتۇستىك كورەيا حوككەيشىلەرىمەن جولداستىق كەزدەسۋ وتكىزىپ, العاشقى ويىندا ءىرى ەسەپپەن جەڭىسكە جەتتى.
باسەكە باستالعان بەتتە جەرلەستەرىمىز بەلسەندى ويىنىمەن كوزگە ءتۇسىپ, كەدەسۋدى ءوز باقىلاۋىندا ۇستاۋعا تىرىستى. ال كورەيالىق حوككەيشىلەر كەرىسىنشە دورەكى ويناپ, ءجيى-ءجيى ەرەجە بۇزدى. سالدارىنان بىرنەشە ويىنشىسى مۇزايدىننان قۋىلدى. ويىننىڭ ءبىرىنشى كەزەڭى ەل قۇراماسىنىڭ ايقىن باسىمدىعىمەن وتسە دە, جەرلەستەرىمىز العاشقى كەزەڭدە ءبىر عانا شايبا سوعۋعا مۇمكىندىك الدى. گولدىڭ اۆتورى – رومان ستارچەنكو.
ۇزىلىستەن كەيىن ەل حوككەيشىلەرى قارقىنىن ارتتىرىپ, كورەيا قۇراماسىنىڭ قاقپاسىن ەكى مارتە ءدال كوزدەدى. الدىمەن 31-مينۋتتا تامەرلان گايتاميروۆ مەرگەندىك تانىتسا, اراعا ءۇش مينۋت سالىپ اركادي شەستاكوۆ ءوز اتىن تابلوعا جازدىردى. ءۇشىنشى كەزەڭدە دە جەرلەستەرىمىز جانكۇيەرلەرىن قۋانتىپ, قارسىلاستار قاقپاسىنا تاعى ەكى شايبا ەنگىزدى. بۇل جولى دميتري گرەنتس (51-مينۋت) پەن كيريلل پولوحوۆ (59) نىسانانى ءدال كوزدەدى. وسىلايشا, قازاقستان قۇراماسى وڭتۇستىك كورەيامەن وتكەن ءبىرىنشى جولداستىق كەزدەسۋدە 5:0 ەسەبىمەن باسىم ءتۇستى. ەكى قۇراما وكىلدەرى بۇگىن ەكىنشى جولداستىق كەزدەسۋىن وتكىزەدى.
ستاتيستيكاعا كوز جۇگىرتەر بولساق, قازاقستان مەن وڭتۇستىك كورەيا قۇرامالارى مۇزايدىندا بۇعان دەيىن التى مارتە كەزدەسكەن ەكەن. ونىڭ بەسەۋىندە جەرلەستەرىمىز باسىم تۇسكەن بولسا, 2017 جىلدىڭ 23 ساۋىرىندە ءبىرىنشى ديۆيزيوننىڭ ا توبىندا وڭتۇستىك كورەيا تۇڭعىش مارتە قازاقستان حوككەيشىلەرىن 5:2 ەسەبىمەن سۇرىندىرگەن ەدى.
لاتۆيا مەن فينليانديادا وتەتىن الەم چەمپيوناتىندا ەل قۇراماسى «ۆ» توبىندا كانادا, چەحيا, شۆەيتساريا, لاتۆيا, سلوۆاكيا, نورۆەگيا جانە سلوۆەنيا قۇرامالارىمەن سىنعا تۇسەدى. ال 29 ءساۋىر مەن 5 مامىر ارالىعىندا ۇلىبريتانيانىڭ نوتتينگەم قالاسىندا الاۋى تۇتاناتىن ءبىرىنشى ديۆيزيوننىڭ «ا» توبىندا وڭتۇستىك كورەيا حوككەيشىلەرى يتاليا, ۇلىبريتانيا, ليتۆا, پولشا, رۋمىنيامەن توپ-ديۆيزيوننىڭ جالعىز جولداماسىن ساراپقا سالادى.
قازاقستان ۇلتتىق قۇراماسىنىڭ باس باپكەرى عالىم مامبەتاليەۆ الەم چەمپيوناتىنىڭ الدىنداعى وقۋ-جاتتىعۋ جيىنىنا شاقىرتۋ العان حوككەيشىلەردىڭ ءتىزىمىن جاريالاعان جوق. الايدا شايبالى حوككەي فەدەراتسياسى وڭتۇستىك كورەيامەن وتەتىن ەكى جولداستىق ماتچتىڭ حاتتاماسىنا ەنگەن ويىنشىلاردىڭ ءتىزىمىن جاريالادى. ءبىر قۋانارلىعى, وسى ەكى ماتچتا شاقىرىلعان حوككەيشىلەردىڭ اراسىندا بىردە-ءبىر لەگيونەر جوق. بارلىعى قازاقستان حوككەي مەكتەبىنىڭ تۇلەگى.
قاقپاشىلار: دجەلال-اد-دين امىربەكوۆ, نيكيتا بوياركين, اندرەي شۋتوۆ ء(بارى – «بارىس»), ماكسيم پاۆلەنكو («نوماد»).
قورعاۋشىلار: ءادىل بەكەتاەۆ, سامات دانيار, تاميرلان گايتاميروۆ, ەميل نۇرعاليەۆ ء(بارى – «بارىس»), دانيل بۋتەنكو, ءمادي ديحانبەك, ارتەم كورولەۆ, ابىلايحان سۇلەيمەنوۆ ء(بارى – «نوماد») كيريلل پولوحوۆ («ارلان»), ۆالەري ورەحوۆ («مەتاللۋرگ», ماگنيتوگورسك).
شابۋىلشىلار: ءاليحان اسەتوۆ, الەكساندر بوريسەۆيچ, دميتري گۋركوۆ, دىنمۇحامەد قايىرجان, نيكيتا ميحايليس, باتىرلان مۇراتوۆ, ميحايل راحمانوۆ, كيريلل ساۆيتسكي, اڭسار شايحمەددەنوۆ, اركادي شەستاكوۆ ء(بارى – «بارىس»), ستانيسلاۆ الەكساندروۆ, ولەگ بويكو, اباي ماڭعىسباەۆ, ماكسيم مۋحامەتوۆ, ءاليحان ومىربەكوۆ ء(بارى – «نوماد»), سايان دانيار («سارىارقا»), دميتري گرەنتس («ارلان»), حاقنازار كەڭەسباي («الماتى»), رومان ستارچەنكو («سپارتاك», موسكۆا), ەۆگەني رىمارەۆ («اكم», جحل).