تۇركيا پرەزيدەنتى رەجەپ تايىپ ەردوعان اپات ايماعىندا سالىنعان جاڭا ۇيلەردىڭ كىلتىن تابىس ەتۋ سالتاناتىنا قاتىستى, دەپ حابارلايدى Egemen.kz Anadolu اگەنتتىگىنە سىلتەمە جاساپ.
تۇركيا پرەزيدەنتى رەجەپ تايىپ ەردوعان گازيانتەپ پروۆينتسياسىنىڭ نۋرداگى اۋدانىنىڭ بەلپىنار اۋىلىندا, كاحرامانماراش پروۆينتسياسىنىڭ مەستحيۋيۋك جانە تۇركوعلى وزبەك اۋىلدارىندا جەكە ۇيلەردىڭ كىلتىن تاپسىرۋ راسىمىنە قاتىستى.
پرەزيدەنت سالتاناتتى شاراعا قاتىسۋشىلاردى رامازان مەرەكەسىمەن دە قۇتتىقتادى.
«6 اقپانداعى جويقىن جەر سىلكىنىسىنەن 15 كۇن وتكەن سوڭ, جاڭا ۇيلەردىڭ فۋندامەنتى قالاندى. اپات ايماعىندا بارلىعى 507 مىڭ پاتەر مەن 143 مىڭ جەكە ءۇي سالىنادى. ولاردىڭ 319 مىڭى بيىل تاپسىرىلادى دەپ جوسپارلانىپ وتىر. 60 مىڭعا جۋىق پاتەردىڭ فۋندامەنتى قالاندى. بۇل جۇمىستار ۇزدىكسىز جالعاسىپ جاتىر. ءبىزدىڭ مىندەتىمىز جەر سىلكىنىسىنەن زارداپ شەككەن ازاماتتاردى مۇمكىندىگىنشە تەزىرەك جاڭا زاماناۋي ۇيلەرگە كوشىرۋ», دەدى پرەزيدەنت قۇتتىقتاۋ سوزىندە.
تۇركيا پرەزيدەنتىنىڭ ايتۋىنشا, اپات ايماعىنداعى بارلىق قالالار مەن اۋىلداردىڭ ينفراقۇرىلىمى جاڭارتىلىپ جاتىر. بۇل باعىتتا بىرنەشە مەملەكەتتىك باعدارلاما قابىلداندى. ولاردىڭ ءبىرى فەرمەرلەردى پايىزسىز نەسيەلەرمەن قامتاماسىز ەتۋگە باعىتتالعان.
ايتا كەتسەك, گازيانتەپتە جوسپارلانعان 50 مىڭ پاتەرگە قوسىمشا تاعى 50 مىڭ پاتەر سالىنباقشى.
رەجەپ تايىپ ەردوعان جاڭا ءۇي يەلەرىنە كىلتتەرىن تابىستاپ, جەر سىلكىنىسىنەن زارداپ شەككەن ازاماتتارعا كومەك كورسەتىلەتىنىن قايتا اتاپ ءوتتى.
ەسكە سالا كەتسەك, 6 اقپاندا تۇركيانىڭ كاحرامانماراش پروۆينتسياسىندا ەكى جويقىن جەر سىلكىنىسى بولدى. ولاردىڭ ماگنيتۋداسى 7 بالدان استى. دۇمپۋلەر ەلدىڭ 10 پروۆينتسياسىندا, سونداي-اق كورشىلەس مەملەكەتتەردە, سونىڭ ىشىندە سيريادا دا سەزىلدى. تابيعي اپاتتان تۇركياعا 105 ملرد دوللاردان استام شىعىن كەلتىردى.
6 اقپان مەن 31 ناۋرىز ارالىعىندا 22,5 مىڭ جەراستى ءدۇمپۋى تىركەلدى.
سوڭعى رەسمي دەرەكتەرگە سايكەس, ءزىلزالا سالدارىنان 50 096 ادام كوز جۇمسا, تاعى 107 204 ادام زارداپ شەكتى.