قازىرگى كەزدە اقتوبە قالاسىنداعى Ural`s جانار-جاعارماي بەكەتتەرىندە اي-95 جانارمايى ءار ليترىنە 212 تەڭگەدەن, اي-92 – 192 تەڭگەدەن, ال ديزەل وتىنى 295 تەڭگەدەن ساتىلا باستادى. ازىرگە قالادا گاز باعاسى تۇراقتى, ءار ليترىنە 50 تەڭگەدەن ساتىلىمدا بار. سۇيىق وتىننىڭ تاپشىلىعى بايقالمايدى.
وبلىستىق ەنەرگەتيكا باسقارماسىنىڭ دەرەگىنە قاراعاندا, اقتوبە وبلىسىندا اي سايىن 25 مىڭ توننا جانار-جاعارماي تۇتىنادى. ال ناۋرىز ايىندا ءوڭىر تۇرعىندارىنىڭ جانار-جاعارماي تۇتىنۋ مولشەرى 15 پايىزعا ارتقان. بۇل اقتوبە وبلىسى ايماعىنان ءوتىپ جاتقان ترانزيتتىك كولىكتەردىڭ ارزان وتىندى كوپتەپ ساتىپ الىپ كەتۋىمەن بايلانىستى. اسىرەسە رەسەي فەدەراتسياسىنىڭ كورشىلەس ورىنبور وبلىسىنا جانار-جاعارماي شەكتەۋسىز كەتىپ جاتتى. ەنەرگەتيكا باسقارماسى جانار-جاعارماي باعاسى وسكەن كەزدە دە ساتىلىمدا اي-95 ماركالى جانارماي 204 تەڭگەدەن, ال ديزەلدى وتىن 260 تەڭگەدەن اسىرىلمايدى دەگەن ۋادەسىنە قاراماستان بۇگىن بەكەتتەردەگى باعانىڭ شارىقتاپ كەتكەنى بايقالادى.
اۋىل شارۋاشىلىعى باسقارماسى باسشىسىنىڭ ورىنباسارى اتتيەۆ اسىلحاننىڭ ايتۋىنشا, كوكتەمگى ەگىس جۇمىستارى ءۇشىن ءوڭىر شارۋالارىنا 800 توننا ارزانداتىلعان جانار-جاعارماي ءبولىندى. ۇكىمەتتەن بولىنگەن ارزانداتىلعان ديزەل وتىنىنىڭ باعاسى ليترىنە 207 تەڭگەنى قۇرايدى. قازىرگى كەزدە ارزانداتىلعان وتىن قوبدا, مارتوك اۋداندارى جىبەرىلدى. بۇل ازىرگە كوكتەمگى دالالىق جۇمىستارعا جەتكىلىكتى.