19 ساۋىردە استانادا سالىنىپ جاتقان تۇرعىن ءۇي كەشەندەرىنىڭ بىرىندە قۇرىلىس كرانى قۇلادى, دەپ حابارلايدى Egemen.kz تجم وقك استانا قالاسى بويىنشا دەپارتامەنتىنە سىلتەمە جاساپ.
«19 ساۋىردە ساعات 09:25 شاماسىندا استانا قالاسى, كومسومولسكي ت.م., اقىن سارا كوشەسى 53 ۋچاسكەسىندە ورنالاسقان Inshaat Invest جشس-ءنىڭ «كىرىكتىرىلگەن ءۇي-جايلارى مەن پاركينگى بار كوپپاتەرلى تۇرعىن ءۇي كەشەنى» قۇرىلىس الاڭىندا QTZ-63 مۇنارا كرانىنىڭ سەكتسياسى بۇزىلدى», دەلىنگەن حابارلامادا.
وقيعا ورنىندا توتەنشە جاعدايلار مينيسترلىگىنە قاراستى ونەركاسىپتىك قاۋىپسىزدىك كوميتەتىنىڭ استانا قالاسى بويىنشا دەپارتامەنتىنىڭ قىزمەتكەرلەرى جۇمىس ىستەپ جاتىر.
«دەپارتامەنت جەرگىلىكتى اتقارۋشى ورگاندار مەن باسقا دا مۇددەلى تۇلعالاردى تارتا وتىرىپ, وقيعانىڭ ءمان-جايىن انىقتاۋ, سونداي-اق ءتيىستى تەرگەۋ جۇرگىزۋ ماقساتىندا ارنايى كوميسسيا قۇرادى», دەپ قوستى دەپارتامەنت وكىلدەرى.
ايتا كەتسەك, وقىس جاعدايدان زارداپ شەككەندەر جوق. الدىن الا بولجام بويىنشا, كەلەڭسىز جايت شامادان تىس جۇكتەمە سالدارىنان ورىن العان.