قاسىم-جومارت توقاەۆ ىسىراپشىل بولۋدى قويىپ, ۇنەمگە كوشىپ, ارنارسەنىڭ قادىرىن ءبىلۋ كەرەگىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى سوڭعى كەزدەرى قاتتى بايقالىپ جۇرگەن سۋ تاپشىلىعى ماسەلەسىنە توقتالدى. بۇل جاعدايدا ماسەلەنى شەشۋدىڭ جالعىز جولى ۇنەمدەۋ دەدى.
− «سۋدىڭ دا سۇراۋى بار». ونى نەعۇرلىم كوپ تۇتىنساڭ, سوعۇرلىم كوپ اقشا تولەيسىڭ. بۇل – جۇرتتى ۇنەمشىل بولۋعا ۇيرەتەتىن ادىلەتتى جانە قاراپايىم ۇستانىم. دامىعان ەلدەردىڭ تۇرعىندارى ءار نارسەنىڭ قادىرىن بىلەدى. ۇنەمشىلدىك ولاردىڭ ءومىر سالتىنا اينالعان. ءتىپتى, سۋ مەن جىلۋدى ىسىراپ ەتپەۋدى بالالارعا جاستايىنان ۇيرەتەدى. ءبىزدىڭ ازاماتتارىمىز دا وسىنداي ۇنەمشىل بولۋى كەرەك. اسىرەسە, سۋدى ۇنەمدەپ تۇتىنۋىمىز كەرەك. مەن سۋ تاپشىلىعىنىڭ ارتىپ جاتقانىن ۇدايى ايتىپ ءجۇرمىن. ساراپشىلاردىڭ پايىمداۋىنشا, 2040 جىلعا قاراي سۋعا دەگەن سۇرانىس 50 پايىزعا ارتادى. قازاقستان 2050 جىلعا قاراي «سۋعا وتە مۇقتاج» ەلدەردىڭ ساناتىنا كىرۋى مۇمكىن, − دەدى پرەزيدەنت.
ونىڭ ايتۋىنشا, قازىر ەلىمىزدە 600 مىڭنان استام ادام تازا اۋىزسۋعا ءزارۋ. بۇل – اۋىلداعى اعايىن عانا ەمەس, قالا حالقى ءۇشىن دە وتە وزەكتى ماسەلە. ءىرى شاھارلاردىڭ ينفراقۇرىلىمى جىلدان-جىلعا ارتىپ كەلە جاتقان سۇرانىسقا جاۋاپ بەرە الماي وتىر. ءتىپتى, استانانىڭ وزىندە سۋ تاپشىلىعى قاتتى سەزىلە باستادى. باستى سەبەپتىڭ ءبىرى – قۇرىلىستىڭ كوبەيۋى.
− ۇنەمشىل بولماساق, تازا سۋ بەرەتىن جاڭا نىسانداردى ىسكە قوسقانمەن, تاپشىلىقتى جويا المايمىز, – دەدى ق. توقاەۆ.