20 ءساۋىر كۇنى, ساعات 11:00-دە الماتىدا جوسپارلى جالپىقالالىق سەيسميكالىق وقۋ-جاتتىعۋ وتەدى. قالالىق توتەنشە جاعدايلار دەپارتامەنتى مەگاپوليس تۇرعىندارى مەن قوناقتارىنان تۇسىنىستىكپەن قاراپ, سابىر ساقتاۋدى سۇرايدى, دەپ حابارلايدى Egemen.kz.
قالا ۇيىمدارىندا سەيسميكالىق وقۋ-جاتتىعۋلار توقسان سايىن وتكىزىلەدى. ءبىرىنشى توقساندا 2,8 مىڭنان استامى ورىندالدى.
سەيسميكالىق وقۋ-جاتتىعۋدىڭ نەگىزگى ماقساتى – تۇرعىنداردى ەۆاكۋاتسيالاۋ جولىن, قاۋىپسىز جەرلەردى الدىن الا انىقتاپ, اپات كەزىندە قاجەت چەمودانداردى دايىنداۋى ءۇشىن قالا تۇرعىندارىنىڭ توتەنشە جاعدايلار كەزىندەگى ءىس-قيمىلدارعا دايىندىق دەڭگەيىن ارتتىرۋ.
قاۋىپسىز ورىندار – ەلەكتر جەلىلەرى مەن عيماراتتاردان الىس ورنالاسقان اشىق جەرلەر.
«جالپىقالالىق سەيسميكالىق دايىندىققا الدىن الا دايىندالىڭىز. مىسالى, تەلە-راديو ارنالاردا حابارلاندىرۋ باستالىپ كەتتى, الماتىلىقتار وقۋ-جاتتىعۋ ەۆاكۋاتسياسى تۋرالى اقپاراتتاندىرىلادى, ۇسىنىستار بەرىلدى. سەيسميكالىق وقۋ-جاتتىعۋ وتەتىن كۇنى سيرەنالىق قوندىرعىلاردى ىسكە قوسۋ, تەلە جانە راديوارنالار ارقىلى قالالىق ەسكەرتۋ جۇيەسى ىسكە قوسىلادى, «Darmen» ءموبيلدى قوسىمشاسى ارقىلى push-حابارلامالار جىبەرىلەدى», دەپ حابارلادى تجد.الماتى 9-10 بالدىق سەيسميكالىق ايماقتا ورنالاسقان. جىل سايىن قالادا 200-گە دەيىن ءالسىز, سەزىلمەيتىن جەر سىلكىنىسى بولادى. بۇل رەتتە كۇشى 2-دەن 4 بالعا دەيىنگى جەر سىلكىنىسى الماتى ءۇشىن فوندىق رەجيم بولىپ سانالادى. سەيسمولوگيا ينستيتۋتىنىڭ بولجام كوميسسياسىنىڭ مالىمەتىنشە, جىل سوڭىنا دەيىن قالادا 7 جانە ودان دا كوپ بالدىق جەر سىلكىنىسى بولمايدى. سوندىقتان جۇرگىزىلىپ جاتقان قالالىق سەيسميكالىق دايىندىق جەر سىلكىنىسى بولادى دەگەن بولجامعا ەش قاتىسى جوق.