مەملەكەت باسشىسى قاسىم-جومارت توقاەۆتىڭ توراعالىعىمەن ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەس باستالدى, دەپ حابارلايدى Egemen.kz.
«جۋىردا ءماجىلىس جانە ءماسليحات دەپۋتاتتارىنىڭ سايلاۋى ءوتتى. ۇكىمەت قايتا جاساقتالدى. وسىلايشا, اۋقىمدى ساياسي وزگەرىستىڭ العاشقى كەزەڭى اياقتالدى دەۋگە بولادى. ءبىز بيلىك تارماقتارىنىڭ تەپە-تەڭدىگىن ورنىقتىردىق. ەندى ەلىمىزدەگى قوعامدىق-ەكونوميكالىق قاتىناستاردى قايتا قۇرۋىمىز كەرەك. جۇرتشىلىق بۇل رەفورمالارعا زور ءۇمىت ارتىپ وتىر. سوندىقتان ءبىز ناقتى ءىس-شارالارعا باسا ءمان بەرۋگە ءتيىسپىز», دەدى قاسىم-جومارت توقاەۆ.
بۇدان سوڭ, ول پارلامەنت سەسسياسىنىڭ اشىلۋىندا زاڭنامالىق تۇرعىدان شەشىلۋگە ءتيىس بىرقاتار ماسەلەنى اتاپ وتكەنىن ەسكە سالدى.
«بۇگىن الەۋمەتتىك-ەكونوميكالىق سالاداعى ماقسات-مىندەتتەردى ايقىنداپ الۋىمىز كەرەك. ۇكىمەت جانە بارلىق دەڭگەيدەگى اكىمدەر سوعان سۇيەنىپ جۇمىس ىستەيتىن بولادى. وسى باسقوسۋعا ءماسليحاتتاردىڭ وكىلدەرى قاتىسىپ وتىر. بۇل دا – ناقتى ساياسي وزگەرىستەردىڭ نىشانى. اتقارۋشى جانە وكىلدى بيلىك اراسىندا ءتيىمدى قارىم-قاتىناس ورناتۋ وتە ماڭىزدى. قاجەت بولسا, ولار ءبىرىن-ءبىرى تولىقتىرىپ, قولداپ وتىرۋى كەرەك. مۇنىڭ ءبارى مەملەكەتتىك ساياساتتى ءتيىمدى جۇزەگە اسىرۋعا مۇمكىندىك بەرەدى. سونداي-اق ەل مۇددەسىن ەسكەرە وتىرىپ شەشىم قابىلداۋعا جول اشادى», دەدى مەملەكەت باسشىسى.