الەمدىك شاحمات شەبەرلەرى – استانادا

سونىمەن قاتار الەمدىك دودا اياسىندا ەلىمىزدە تۇڭعىش رەت شاحماتتان قازاقستاننىڭ ايەلدەر مەن الەم قۇراماسى سىنعا تۇسۋدە. حالىقارالىق شاحمات فەدەراتسياسىنىڭ (فيدە) پرەزيدەنتى اركادي دۆوركوۆيچ 17-ءشى الەم چەمپيونى استانادا انىقتالىپ جاتقانى, ايەلدەر اراسىنداعى الەمنىڭ ەڭ ۇزدىك گروسسمەيستەرلەرىنىڭ سارىارقا توسىنە ج­ي­نا­لۋى قازاقستاننىڭ شاحمات الەمىندەگى الار ورنى ەرەكشە ەكەنىن ايعاقتايتىنىن اتاپ كورسەتكەن بولاتىن.

كەيىنگى جىلدارى قازاقستاننىڭ شاحمات شەبەرلەرى الەمدىك دەڭگەيدەگى ءىرى-ءىرى حالىقارالىق تۋرنيرلەردە ءجيى توپ جارىپ, ەل جانكۇيەرلەرىن قۋانتىپ جۇرگەنى بەلگىلى. جانسايا ابدىمالىك, ءبيبىسارا اساۋباەۆا, دينارا سادۋاقاسوۆا سەكىلدى دارىندى قىزدارىمىز بىرىنەن سوڭ ءبىرى دۇنيەجۇزىلىك دودالاردا ءوز مىقتىلىعىمەن دارالانىپ, الەم شاحماتشىلارىن قازاق قىزدارىمەن ساناساتىنداي دارەجەگە جەتكىزدى. مۇنى شاحمات جانكۇيەرلەرى جاقسى بىلەدى. جەرلەستەرىمىزدىڭ ايتۋلى جەڭىستەرىنەن كەيىن شاحمات ەلىمىزدە دامىعان سپورت تۇرلەرىنىڭ قاتارىنا قوسىلىپ, ەل تۇرعىندارى جاپپاي شۇعىلداناتىن بۇقارالىق سيپاتقا يە بولا باستادى.

قازاقستان – فيدە-ءنىڭ ماڭىزدى ورتالىعى

قازاقستان مەن الەم قۇراماسى ارا­سىنداعى بايراقتى باسەكەنىڭ اشىلۋ سالتاناتىنا مادەنيەت جانە سپورت ءمينيسترى اسحات ورالوۆ قاتىسىپ, تۋرنيرگە قاتىسۋشىلارعا ساتتىلىك تىلەدى. سو­نىمەن قاتار ۆەدومستۆو باسشىسى قازاق­ستاندا ۇيىمداستىرىلىپ جاتقان الەم چەمپيوناتى اياسىنداعى بىرقاتار ءىس-شارانىڭ ماڭىزدىلىعىنا توقتالىپ, ەلىمىزدە شاحمات سپورتىن ودان ءارى دامىتۋعا مەملەكەت تاراپىنان بارلىق جاعداي جاسالعانىن اتاپ ءوتتى.

فيدە-ءنىڭ باس ديرەكتورى, گروسسمەيس­تەر ەميل سۋتوۆسكي وسىنداي الەمدىك دەڭگەيدەگى جارىستى وتكىزۋگە مۇرىندىق بولعانىنا جانە ءىس-شارا اياسىندا قو­سىمشا تۋرنيرلەردى ۇيىمداستىرعانى ءۇشىن قازاقستان بيلىگى مەن ەلىمىزدىڭ شاحمات فەدەراتسياسىنا العىسىن ءبىلدىردى. «بۇل ءىس-شارالار قازاقستاندا شاحمات سپورتىنىڭ دامۋىنا زور سەپتىگىن تيگىزەتىنىنە سەنىمدىمىن. فيدە الداعى ۋاقىتتا دا قازاقستاندى ماڭىزدى ورتا­لىق رەتىندە قاراستىرىپ, ءتۇرلى جارىس­تاردى بىرلەسە وتكىزۋگە نيەتتى», دەدى ەميل سۋتوۆسكي.

ال وسى جارىستى ۇيىمداستىرۋدىڭ باستاماشىسى بولعان قازاقستان شاحمات فەدەراتسياسىنىڭ ءبىرىنشى ۆيتسە-پرەزيدەنتى, گروسسمەيستەر دارمەن سا­دۋا­قاسوۆ باستاپقىدا بۇرىنعى الەم چەم­پيوندارىنىڭ باسىن بىرىكتىرىپ, شاحماتتىڭ بولاشاعىن تالقىلاۋ يدەيا­سى بولعانىن ايتادى. «وكىنىشكە قا­راي, الەم چەمپيوندارىنىڭ تىعىز كەس­تەسىنە سايكەس ولاردى استانادا جيناۋ مۇمكىن بولمادى. سوندىقتان ايەل­دەر اراسىنداعى قازاقستان مەن الەم ۇزدىك­تەرىنىڭ ماتچىن ۇيىمداستىرۋ تۋرالى شەشىم قابىلدادىق. قازىرگى تاڭدا قازاق­ستاننىڭ ايەلدەر قۇرا­ماسى حالىقارالىق جا­رىستاردا تابىستى ونەر كورسەتىپ ءجۇر», دەدى د.سا­دۋاقاسوۆ.

ءبيبىسارانىڭ كەزەكتى بيىگى

جارىستىڭ العاشقى كۇنىندە شاحماتشىلار راپيد بويىنشا سىنعا ءتۇستى. ماتچ الدىنداعى جەرەبە تارتۋ ناتيجەسى بويىنشا ەرەسەكتەر ارا­سىن­داعى العاش­قى تۋردا قىتايلىق حوۋ يفان مەن وتان­داسىمىز دينا­را سادۋاقاسوۆا, ۇندىس­تاندىق حاري­كا دريۋناۆاللي مەن مە­رۋەرت قاماليدەنوۆا, ازەربايجان وكىلى گۋناي مامەدزادە مەن جىلدام شاحماتتان الەمنىڭ ەكى دۇركىن جە­ڭىمپازى ءبيبىسارا اساۋباەۆا جانە گرۋزين شاحماتشىسى نانا دزاگنيدزە مەن جانسايا ابدىمالىك شەبەرلىك بايقاستى.

ال جاسوسپىرىمدەر اراسىندا زارينا نۇرعاليەۆا وزبەكستاندىق افرۋزا حام­داموۆامەن, كسەنيا بالاباەۆا بولگا­ريالىق نۋرگيۋل ساليموۆامەن, ماجار­ستاندىق زسوكا گاال الۋا نۇرمانوۆامەن, ۇندىستاندىق شري ب.ساۆيتا ليا قۇر­مانعاليەۆامەن وينادى.

ءتورت راۋندقا جالعاسقان جارىستىڭ العاشقى كۇنى الەم قۇراماسىنىڭ جە­ڭىسى­مەن اياقتالدى – 18,5:13,5. الەم قۇ­راماسىنان ءبىرىنشى جارىس كۇنىندە ۇندىستاندىق حاريكا دريۋناۆاللي ۇزدىك ناتيجە كورسەتتى. ول ءتورت ماتچتىڭ ەكەۋىن­دە جەڭىسكە جەتىپ, ەكى مارتە تەڭ وينا­دى. ال قازاقستان قۇراماسى ساپىنان ەڭ ۇزدىك ناتيجە الۋا نۇرمانوۆاعا تيەسىلى. التىنشى تاقتادا ويناعان وتان­داسىمىز ءۇش ماتچتا قارسىلاسىنان باسىم تۇسسە, ءبىر مارتە جەڭىلىستىڭ كەرمەك ءدامىن تاتتى.

سونىمەن قاتار ءتۋرنيردىڭ سەنساتسياسىن ءبيبىسارا اساۋباەۆا جاسادى. قا­زاقستاننىڭ عانا ەمەس, الەمنىڭ ەڭ داڭقتى گروسسمەيستەرلەرىنىڭ ءبىرى سانالاتىن ب.اساۋباەۆا ءتۋرنيردىڭ ءبىرىنشى كۇنىندە ءتورت دۇركىن الەم چەمپيونى, ايەلدەر اراسىنداعى رەيتينگتە كوش باس­تاپ تۇرعان حوۋ ءيفاندى تىزە بۇكتىرىپ, كارەراسىنداعى ماڭىزدى جەڭىستەرىنىڭ بىرىنە قول جەتكىزدى. سونىمەن قاتار قىتايلىق شاحماتشى وتانداستارىمىز – دينارا سادۋاقاسوۆا جانە جانسايا ابدىمالىكپەن تەڭ ويناپ, مەرۋەرت كا­ماليدەنوۆادان باسىم ءتۇستى.

ەكىنشى كۇنگى باسەكەدە جەرلەستەرىمىز قار­سىلاستارىنا قاراعاندا الدەقايدا ءساتتى ونەر كورسەتكەنىمەن, جالپى ەسەپتە العا شىعا ال­مادى. بۇل كۇنى ءبيبىسارا اساۋباەۆا ءتورت ويىن­نىڭ ەكەۋىندە جەڭىس­كە جەتىپ, ەكەۋىندە تەڭ ءتۇستى. سونىمەن قا­تار وتانداسىمىز ەكىن­شى كۇن قا­تارى­نان حوۋ يفانننەن باسىم ءتۇستى. سونداي-اق دينارا سادۋاقاسوۆا مەن جانسايا ابدىمالىك تە ەكى ويىندا ۇزدىك شىقسا, مەرۋەرت قاماليدەنوۆا ءبىر ماتچتا جە­ڭىمپاز اتاندى. وسىلايشا, ەكى كۇننىڭ قورىتىندىسى بويىنشا الەم قۇراماسى 34,5 – 26,5 ەسەبىمەن الدا كەلەدى.

بۇگىن شاحماتشىلار قازاقستان قۇراماسىنىڭ وڭ جامباسىنا كەلەتىن جىلدام شاحمات (بليتس) بويىنشا شە­بەرلىك بايقاسادى. ءسويتىپ, ءۇش كۇننىڭ قورى­تىندىسىندا بارلىق جەكەلەگەن ۇپايلاردى ەسەپتەپ, جارىس ەسەبى شى­عارىلادى. ەگەر ۇپاي سانى تەڭ بولعان جاعدايدا, تەڭ ويىنداردىڭ ناتيجەلەرى ەسەپتەلەدى.

جەڭىمپازعا – 50 000 اقش دوللارى

ماتچتىڭ ەرەجەسىنە توقتالار بولساق, بۇل سىنعا ءار كوماندادان 8 ويىنشى قاتىسادى. ونىڭ ىشىندە 20, 18, 16 جانە 14 جاسقا دەيىنگى شاحماتشىلار مىندەتتى تۇردە بولۋى كەرەك. ولار ءوز جاس ساناتى بويىنشا ءبىر-بىرىمەن وينايدى. ال قالعان 4 ايەل شاحماتشى ءوز قارسىلاستارىمەن all-play-all سحەۆەنينگەن فورماتىندا كۇش سىناسادى.

شاحمات ساراپشىلارى مەن جان­كۇيەر­لەرىن قىزىقتىرعان بۇل ويىنعا الەم قۇراماسىن ايەلدەر اراسىنداعى رەيتينگتىڭ كوشباسشىسى, قىتايلىق حوۋ يفان باستاپ كەلدى. سونىمەن قا­تار گرۋزيالىق گروسسمەيستەر نانا دزاگ­نيدزە (2462), ۇندىستاندىق گروسسمەيستەر حاريكا دروناۆاللي (2447), ازەربايجاندىق گۋناي مامەدزادە (2348), بولگاريالىق نۋرگيۋل ساليموۆا (2347, U20), ماجارستاندىق زسوكا گاال (U18), ۇندىستاندىق ساۆيتا شري (U16) جانە وزبەكستاندىق افرۋزا حامداموۆا (2135, U14) استانادا شەبەرلىك بايقاسادى.

قازاقستان قۇراماسى ساپىندا گروسسمەيستەر جانسايا ابدىمالىك (2454), دينارا سادۋاقاسوۆا (2402), ءبيبىسارا اساۋ­باەۆا (2359), مەرۋەرت قاماليدەنوۆا (2273), ليا قۇرمانعاليەۆا (2152, U20), كسەنيا بالاباەۆا (2111, U18), الۋا نۇرمانوۆا (2193, U16) جانە زارينا نۇر­عاليەۆا (2070, U14) ونەر كورسە­تەدى. ليا قۇرمانعاليەۆا مەن كسەنيا بالا­باەۆا جۋىردا الماتى قالاسىندا وتكەن قازاقستان چەمپيوناتىندا وسى جاس ساناتىندا جۇلدەگەر بولعان.

جارىستىڭ جالپى جۇلدە قورى – 50 000 اقش دوللارى. جەڭىسكە جەتكەن قۇراما 30 000 دوللارعا يە بولادى. ونىڭ ىشىندە 20 000 دوللارى قۇراماداعى ەرەسەك شاحماتشىلارعا بەرىلسە, قالعان 10 000 دوللار جاس شاحماتشىلارعا ۇلەستىرىلەدى. ال ەكىنشى ورىنداعى قۇراما 20 000 دوللار كولەمىندەگى قارجىلاي سىياقىعا يە بولادى.