بۇل كۇندەرى وڭتۇستىك كورەيانىڭ سۋۆون قالاسىندا شايبالى حوككەيدەن قىزدار اراسىنداعى الەم چەمپيوناتى ءوتىپ جاتىر. ءبىرىنشى ديۆيزيوننىڭ «ۆ» توبىندا باق سىناپ جاتقان جەرلەستەرىمىز العاشقى ەكى ويىندا ساتسىزدىككە ۇشىرادى.
قازاقستان قۇراماسى بيىلعى الەمدىك دودادا ۇلىبريتانيا, پولشا, سلوۆەنيا, يتاليا جانە وڭتۇستىك كورەيا قۇرامالارىمەن شەبەرلىك بايقاسىپ جاتىر. وسى توپتا جەڭىمپاز اتانعان ءبىر عانا قۇراما «ا» توبىنا جولداما الادى. جەرلەستەرىمىز الەم چەمپيوناتىنداعى العاشقى ويىنىن ۇلىبريتانيا قۇراماسىمەن وتكىزىپ, ءبىر شايبا ايىرماشىلىعىمەن جەڭىلىپ قالدى. العاشقى ەكى كەزەڭدە حوككەيشىلەر ءبىر-ءبىرىنىڭ قاقپاسىنان ساڭىلاۋ تابا المادى. تەك باسەكەنىڭ اياقتالۋىنا 11 مينۋت قالعاندا بريتانيالىق حوككەيشىلەر گول سوعىپ, جەڭىسكە جەتتى – 1:0.
سۋۆونداعى سايىستىڭ ەكىنشى كۇنىندە ۆيكتوريا سازونوۆا شاكىرتتەرى سلوۆەنيا قىزدارىمەن كەزدەسىپ, بۇل جولى دا ءبىر شايبا ايىرماشىلىعىمەن قارسىلاستارىنا جول بەردى – 2:1. سلوۆەنيا ساپىنان سارا كونفيدەنتي (3-مينۋت) مەن پيا پرەن (45) مەرگەندىگىمەن كوزگە تۇسسە, قازاقستان قۇراماسىنان الەكساندرا گولوتۆينا دالدىك تانىتتى.