تەننيستەن قازاقستاننىڭ ايەلدەر قۇراماسى الەمدىك رەيتينگتە العاش رەت ۇزدىك جەتى ەلدىڭ قاتارىنا قوسىلدى.
ياروسلاۆا شۆەدوۆا جەتەكشىلىك ەتەتىن ۇلتتىق قۇراما قىزدارى جۋىردا عانا بيللي دجين كينگ كۋبوگىنىڭ ىرىكتەۋ كەزەڭى اياسىندا پولشا تەننيسشىلەرىن 3:1 ەسەبىمەن تىزە بۇكتىرىپ, قاتارىنان ەكىنشى مارتە كوماندالىق الەم چەمپيوناتىنىڭ فينالدىق كەزەڭىنە جولداما العان بولاتىن. وسىناۋ ايتۋلى جەڭىسىنەن كەيىن قازاقستان ۇلتتىق قۇراماسى الەمدىك رەيتينگتە بىردەن ءتورت ورىنعا جوعارىلاپ, 10-ساتىدان 7-ورىنعا كوتەرىلدى. ءبىر ايتا كەتەرلىگى, ۇلتتىق قۇراما رەيتينگتە تەننيسى قارقىندى دامىعان الپاۋىت مەملەكەت سانالاتىن اقش, گەرمانيا, يتاليا, رۋمىنيا, بەلگيا, ۇلىبريتانيا سەكىلدى كوماندالاردى ارتتا قالدىردى.
ال ۇزدىكتەر كوشىن ايەلدەر اراسىنداعى بىلتىرعى بيللي دجين كينگ كۋبوگىنىڭ جەڭىمپازى – شۆەيتساريا قۇراماسى باستاپ تۇر. ەكىنشى ورىنعا اۋستراليا قىزدارى جايعاسسا, ءۇشىنشى ورىن يسپانيا قۇراماسىنا تيەسىلى. كەيىنگى ورىندارعا فرانتسيا, چەحيا جانە كانادا تەننيسشىلەرى جايعاسقان. قازاقستان قۇراماسىنىڭ قاتىسۋىمەن وتەتىن بيىلعى بيللي دجين كينگ كۋبوگىنىڭ فينالدىق كەزەڭى 7-12 قاراشا ارالىعىنا جوسپارلانعان.