قازاقتىڭ جاس كاسىپقوي بوكسشىلارى ءابىلحان امانقۇل (2-0, 2 كو) مەن بەك نۇرماعانبەت (8-0, 6 كو) وزدەرىنىڭ كەلەسى جەكپە-جەكتەرىن مۇحيتتىڭ ارعى بەتىندە وتكىزىپ, كەزەكتى جەڭىستەرىنە قول جەتكىزدى.
اۋەسقوي بوكستا تالاي بيىكتەردى باعىندىرىپ, ۇنەمى ۇزدىكتەر قاتارىنان كورىنىپ جۇرگەن وتانداستارىمىز كاسىپقوي بوكستا دا جەڭىستى جولدارىن ءساتتى جالعاپ كەلەدى. ماسەلەن, كۇنى كەشە اقش-تىڭ كاليفورنيا شتاتىندا ۇيىمداستىرىلعان بوكس كەشىندە الەم چەمپيوناتى مەن ازيا ويىندارىنىڭ كۇمىس جۇلدەگەرى ءابىلحان امانقۇل مەكسيكالىق دانيەل ەچەۆەرريامەن جۇدىرىقتاسىپ, قارسىلاسىن مەرزىمىنەن بۇرىن تىزە بۇكتىردى. ەكىنشى ورتا سالماقتا وتكەن جەكپە-جەك سەگىز راۋندقا جوسپارلانعانىمەن, وتانداسىمىز باسەكەنى ءۇشىنشى راۋندتا نوكاۋتپەن اياقتادى. بۇل – جەرلەسىمىزدىڭ كاسىپقوي بوكستاعى ءۇشىنشى جەڭىسى.
ال تاعى ءبىر ەكىنشى ورتا سالماقتا جۇدىرىقتاساتىن وتانداسىمىز, WBA International بەلبەۋىنىڭ يەگەرى بەك نۇرماعانبەت ۆەنەسۋەلا وكىلى ەبەر روندوندى نەبارى ءبىرىنشى راۋندتا سۇلاتىپ سالدى. اۋەسقويلار اراسىندا ازيا چەمپيونى اتانعان جەرلەسىمىزدىڭ بۇل – كاسىپقوي بوكستاعى توعىزىنشى جەكپە-جەگى جانە توعىزىنشى ايقىن جەڭىسى.
ەندى ەكى بوكسشى 6 مامىردا مەكسيكانىڭ گۆادالاحارا قالاسىندا وتەتىن ساۋل الۆارەس (58-2-2, 39 كو) پەن بريتانيالىق دجون رايدەر (32-5, 18 كو) اراسىنداعى بوكس كەشىندە ونەر كورسەتەدى.