2023 جىلدىڭ 27-28 ءساۋىر كۇندەرى استانا قالاسىندا «اشىق ۇكىمەت جانە جاڭا باسقارۋ مادەنيەتى: ەستۋ, ءتۇسىنۋ, ارەكەت ەتۋ» تاقىرىبىندا حالىقارالىق عىلىمي-پراكتيكالىق كونفەرەنتسيا وتەدى, دەپ حابارلايدى Egemen.kz.
حالىقارالىق شارانى قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى قازاقستان رەسپۋبيكاسى مەملەكەتتىك قىزمەت ىستەرى اگەنتتىگىنىڭ باستاماسىمەن جانە استانا مەملەكەتتىك قىزمەت حابىنىڭ قولداۋىمەن ۇيىمداستىرادى.
كونفەرەنتسيا مەملەكەتتىك باسقارۋ جۇيەسىن جاڭعىرتۋدىڭ, سەرۆيستىك مەملەكەتتىك اپپاراتتى, جاڭا ساياسي مادەنيەتتى, ازاماتتاردىڭ, ۇكىمەتتىك ەمەس ۇيىمداردىڭ, بيزنەس-قوعامداستىق پەن مەملەكەتتىڭ ارىپتەستىگى مەن ءوزارا جاۋاپكەرشىلىگى يدەولوگياسىن قالىپتاستىرۋدىڭ تەوريالىق جانە پراكتيكالىق اسپەكتىلەرىنە ارنالعان.
اكادەميا رەكتورى ەرلان ءابىلدىڭ ايتۋىنشا, عىلىمي ءىس-شارا ءتۇرلى زەرتتەۋ باعىتتارى بويىنشا وتەدى.
«كونفەرەنتسيا ءۇش زەرتتەۋ باعىتىنا ساي وتەدى: «اشىق ۇكىمەت», «جاڭا باسقارۋ مادەنيەتى», «اشىق ديالوگ جانە الەۋمەتتىك ارىپتەستىك». شارا بارىسىندا «اشىق ۇكىمەتتى» ەنگىزۋدىڭ حالىقارالىق جانە ۇلتتىق تاجىريبەلەرى, «تسيفرلىق مەملەكەت» ۇلگىسىن قالىپتاستىرۋدىڭ نەگىزگى اسپەكتىلەرى, مەملەكەتتىك باسقارۋدى بيۋروكراتيادان ارىلتۋ ماسەلەلەرى تالقىلانادى. سونىمەن قاتار مەملەكەتتىك باسقارۋدى رەفورمالاۋ اياسىندا مەملەكەتتىك قىزمەتشى بولمىسىنىڭ وزگەرۋى جانە مەملەكەتتىڭ, بيزنەستىڭ جانە ۇكىمەتتىك ەمەس ۇيىمداردىڭ ستراتەگيالىق ارىپتەستىگى سياقتى ماڭىزدى تاقىرىپتار تالقىعا سالىنادى», دەدى رەكتور.
كونفەرەنتسيانىڭ ماقساتى – مەملەكەتتىك باسقارۋدىڭ وزەكتى ماسەلەلەرىن تالقىلاۋ جانە پراكتيكالىق ۇسىنىستار ازىرلەۋ. شاراعا وتاندىق جانە شەتەلدىك ساراپشىلار قاۋىمداستىعى, عالىمدار, زەرتتەۋشىلەر, سونىڭ ىشىندە اكادەميانىڭ ماگيسترانتتارى مەن دوكتورانتتارى, مەملەكەتتىك ورگانداردىڭ, بيزنەس قۇرىلىمداردىڭ جانە ازاماتتىق قوعام ينستيتۋتتارىنىڭ وكىلدەرى قاتىسادى.