فينالدىق كەزەڭگە جولداما الدى

ىرىكتەۋ جارىسىنىڭ الدىنداعى جەرەبە تارتۋ راسىمىندە قازاقستان – پولشا ماتچىن دۇنيەجۇزىلىك رەيتينگتە 45-ورىندا تۇرعان يۋليا پۋتينتسەۆا مەن الەمنىڭ 19-راكەتكاسى ماگدا لينەتت باستايتىنى بەلگىلى بولدى. قارسىلاستار وسى ماتچقا دەيىن ءوزارا جەتى رەت كەزدەسىپ, سونىڭ بەسەۋىندە ماگدا جەڭىسكە جەتكەن ەكەن. تەك ەكى ويىن­دا عانا جەرلەسىمىزدىڭ مەرەيى ۇستەم بولعان.

استاناداعى باسەكە باستالعان بەتتە بيىلعى اۋستراليا اشىق بىرىنشىلىگىنىڭ جارتىلاي ءفيناليسى م.لينەتت ء«ا» دەگەننەن ەكى برەيك جاساپ, 4:0 ەسەبىمەن العا ۇزاپ كەتتى. پۋتينتسەۆا قارسىلاسىنا قاراعاندا توپىراق توسەنىشىنە ەرتەرەك بەيىمدەلۋى ءۇشىن ەلورداعا ءبىر اپتا بۇرىن كەلسە دە, العاشقى ءتورت گەيمدە وتە كوپ قاتەلىك جاسادى. بەسىنشى گەيمدە عانا قۇمداۋىت كورتقا بەيىمدەلە باس­تاعان يۋليا لينەتت دوپتى ويىنعا قوسقان ساتتە برەيك جاساپ, كەيىننەن ءوز مۇمكىندىگىن ءتيىمدى پايدالانا ءبىلدى – 4:2. وسىدان كەيىن پۋ­تين­تسەۆانىڭ ويىنى جۇرە باس­تادى. سپورت كەشەنىنە جينالعان جان­كۇيەرلەردىڭ قىزۋ قولداۋىنىڭ ارقاسىندا ول سوڭعى ءتورت گەيمدە قارسىلاسىنا بىردە-ءبىر ۇپاي بەرمەي, تاماشا كامبەك جاسادى – 7:5.

يۋ.پۋتينتسەۆا ەكىنشى سەتتى دە ءساتتى باستادى – 2:0. سودان سوڭ تاعى ءبىر برەيك جاساپ, تابلوداعى ەسەپتى 4:1-گە جەتكىزگەنىمەن, لينەتت سول بويدا ەسە قايتارۋعا تى­­رىستى. دەگەنمەن, جەرلەسىمىز مىقتىلىق تانىتىپ, ەكىنشى سەتتە دە جەڭىسكە جەتتى – 6:3. وسىلايشا, ءبىرىنشى ويىننان كەيىن قازاقستان 1:0 ەسەبىمەن العا شىقتى.

ۇلتتىق قۇراما ساپىندا 18-جەڭىسىنە قول جەتكىزگەن يۋليا پۋتينتسەۆا قازاقستان تەن­نيسشىلەرى اراسىندا ەڭ كوپ جەڭىسكە جەتكەن سپورتشى اتانىپ, ءوز رەكوردىن جاڭارتتى. كەيىنگى ورىندارعا قازاقستان əيەل­دەر قۇراماسىنىڭ قازىرگى كاپيتانى ياروسلاۆا شۆەدوۆا مەن زارينا دياس جايعاسقان. ولاردىڭ ەنشىسىندە ۇلتتىق قۇراما ساپىندا 14 جەڭىس بار. يۋليا بيللي دجين كينگ دوداسىندا 2014 جىلدان بەرى ونەر كورسەتىپ كەلەدى.

پۋتينتسەۆانىڭ ءىزىن الا كورتقا قازاقستاننىڭ ءبىرىنشى, الەمنىڭ 7-راكەتكاسى ەلەنا رىباكينا شىقتى. ول رەيتينگتە 253-ساتىعا جايعاسقان 22 جاستاعى ۆەرونيكا فالكوۆسكامەن شەبەرلىك باي­قاسادى. ۇلتتىق تەننيس ورتالى­عىنا جينالعان تەننيس جانكۇيەر­لەرى بۇل كەزدەسۋدە رىباكينانىڭ ايقىن جەڭىسىنە سەنىمدى بولعان ەدى. الايدا فالكوۆسكا استاناعا پولشادان بەكەر كەلمەگەنىن بايقاتىپ, ءبىرىنشى سەتتە وتانداسىمىزدى ءبىراز ساستىردى.

العاشقى پارتيانىڭ التىنشى گەيمىنە دەيىن ەكى تەننيسشى دە دوپتى ويىنعا قوسۋدا سەنىمدى ويناپ, ۇپايدان شاشاۋ شىعارعان جوق. تەك سەگىزىنشى گەيمدە ەلەنا برەيك جاساپ, سودان كەيىن ءوزى سەتكە دوپ بەرگەندە ساۋاتتى ويناپ, ءبىرىنشى سەتتى 6:3 ەسەبىمەن ءوز پايداسىنا جازدى. ەكىنشى سەتتە دە رىباكيناعا ۇپاي ءۇشىن ءبىراز تەر توگۋگە تۋرا كەلدى. ۆ.فالكوۆسكا 2022 جىلعى ۋيمبلدون ءتۋرنيرىنىڭ جەڭىمپازىنا قانشا قارسىلىق كورسەتكەنىمەن, ەلەنا بۇل جولى دا پولشالىق تەننيسشىگە ەش مۇمكىندىك بەرگەن جوق – 6:4. وسى­لايشا, قازاقستان قۇراماسى جارىستىڭ العاشقى كۇنىندە 2:0 ەسەبىمەن العا شىقتى.

ەكىنشى جارىس كۇنىنە جوسپار­لانعان ءۇش ماتچتىڭ العاش­قىسىندا كورتقا شىققان ەلەنا رىباكينا ماگدا لينەتتى ءبىر جارىم ساعاتقا جالعاسقان ماتچتا 6:4, 6:2 ەسەبىمەن جەڭىپ, قازاقستان قۇراماسىن قاتارىنان ەكىنشى مارتە بيللي دجين كينگ كۋبوگىنىڭ فينالدىق كەزەڭىنە شىعاردى. ال ماتچ تاعدىرىنا ەش اسەر ەتپەيتىن جۇپتىق سىندا اننا دانيلينا مەن يۋليا پۋتينتسەۆا پولشا قىزدارىنا 2:1 ەسەبىمەن ەسە جىبەردى.

قازىر اقتىق كەزەڭدە بىلتىرعى جەڭىمپاز شۆەيتساريا مەن فيناليست اۋستراليا قارسىلاسىن كۇتىپ تۇر. ال جەڭىلگەن قۇرامالار بيىل قاراشادا پلەي-وفف ساتىسىندا باق سىنايدى. بىلتىر قازاقستان قۇراماسى كوماندالىق الەم چەمپيوناتى اتالىپ كەتكەن باسەكەنىڭ فينالدىق كەزەڭىندە العاش رەت ونەر كورسەتىپ, س توبىندا يسپانيا جانە ۇلىبريتانيا قۇرامالارىمەن شەبەرلىك باي­قاسقان بولاتىن.