ەلوردادا جالاۋى جەلبىرەگەن كلاسسيكالىق شاحماتتان بيىلعى الەم چەمپيوناتىنىڭ باسەكەلەرى بەل ورتاسىنا تاياپ قالدى. بەس پارتيانىڭ قورىتىندىسى بويىنشا رەسەيلىك يان نەپومنياششي 3:2 ەسەبىمەن الدا كەلەدى. بۇگىن گروسسمەيستەرلەر التىنشى پارتيادان كەيىنگى ءۇشىنشى دەمالىس كۇنىن وتكىزىپ جاتىر.
دين دەس بەرەر ەمەس
شاحماتتان الەم تاجىنە ۇمىتكەر قىتايلىق دين ليجەن بارشا جانكۇيەر مەن ساراپشىلاردى تاڭعالدىرىپ, ءتورتىنشى پارتيادا الەم چەمپيوناتىنداعى العاشقى جەڭىسىنە قول جەتكىزدى. باسەكەنى اعىلشىندىق جۇرىسپەن باستاعان دين رەسەيلىك گروسسمەيستەردى 47-جۇرىسكە كەلگەندە قۇرىعىنا ءتۇسىرىپ, ءتورت ساعاتقا جالعاسقان ماتچتا باسىم ءتۇستى.
ەكىنشى پارتيادا اق تاستارمەن ويناپ, قارسىلاسىنا جول بەرگەن دين ليجەن بۇل جولى قاتەلەسكەن جوق. دەگەنمەن ول ءتورتىنشى پارتيادا دا ادەتىنەن جاڭىلماي, كوپ ۋاقىتىن ءوز بولمەسىندە وتكىزىپ, ءجۇرىس جاساۋ كەزىندە ۇزاق ويلاندى. ال يان نەپومنياششي بولسا, وزىنە وتە سەنىمدى وينادى.
العاشقى ءجۇرىستى جاساعان دين بۇل جولى ءوزىنىڭ قالىپتى جۇرىسىنەن باس تارتىپ, ءبىرىنشى قادامىن c4 پەن باستادى. ال نەپومنياششي بۇعان Nf6 جۇرىسىمەن جاۋاپ قايتاردى. ون ءبىرىنشى قادامعا دەيىن گروسسمەيستەرلەر كوپشىلىك اسا تاڭعالاتىنداي ءجۇرىس جاساعان جوق. ويتكەنى ەكەۋى دە رۋمىنيالىق شاحماتشى, وسى الەم چەمپيوناتىنداعى قىتايلىق شاحماتشىنىڭ سەكۋندانتى ريحارد راپپورت پەن گەرمانيالىق يليا زاراگاتسكيدىڭ 2013 جىلى ويناعان پارتياسىنىڭ ءجۇرىسىن قايتالاۋمەن بولدى.
ال 28-جۇرىسكە كەلگەندە يان نەبارى ەكى مينۋت قانا ويلانىپ, كd4 ءجۇرىسىن جاساعاندا, شاحمات ماماندارى نەپومنياششيدىڭ ورەسكەل قاتە جىبەرگەنىن ايتتى. ال 47-جۇرىستەن كەيىن رەسەيلىك گروسسمەيستەر جەڭىلگەنىن مويىنداماسقا امالى قالمادى. ءتورتىنشى پارتيادان كەيىنگى ءباسپاسوز ءماسليحاتىندا دين: «جەڭىسكە جەتكەنىمە قۋانىشتىمىن. وتە قيىن ماتچ بولدى, بىراق ويىن تىزگىنىن ءوز قولىمدا ۇستاپ, ماڭىزدى جەڭىسكە قول جەتكىزدىم. 29-ءجۇرىسىمدى جاساعاننان كەيىن بۇل پارتيادا جەڭىسكە جەتەتىنىمدى ءبىلدىم», دەدى قىتايلىق شاحماتشى.
ال يان نەپومنياششي ماتچتىڭ ادەتتەگىدەي وتە تارتىستى وتكەنىن ايتىپ, 15-قادامنان كەيىن ءوز پوزيتسياسىن دۇرىس باعامداي الماعانىن مويىندادى.
ياننىڭ ويلاستىرعان قادامى
رەت بويىنشا 5-پارتيانى يان نەپومنياششي اق تاستارمەن باستادى. ول ءبىرىنشى پارتياداعىداي بۇل باسەكەنى دە يسپانيالىق جۇرىسپەن اشىپ بەردى. العاشقى جۇرىستەردى قارسىلاستار تەز-تەز جاساپ, پوزيتسياعا كىرگەندە كوبىرەك ويلانا باستادى. اسىرەسە, قارا تاستارمەن ويناعان قىتايلىق شاحماتشى ءار ءجۇرىسىن وتە ۇزاق ويلانىپ جاسادى. ال رەسەيلىك نەپومنياششي ءتورتىنشى تۋردا جەڭىلىستىڭ كەرمەك ءدامىن تاتسا دا, بەسىنشى پارتيادا جۇرىستەرىن وتە جىلدام جاساپ وتىرعانى بارشانى تاڭعالدىردى.
قىتايلىق گروسسمەيستەر بەسىنشى پارتيا بارىسىندا ايتارلىقتاي قاتەلىكتەرگە جول بەرگەن جوق, بىراق ءار ءجۇرىس سايىن پوزيتسياسى ناشارلاي باستاعانىن ىشتەي سەزىپ وتىردى. ال يان مۇنداي ساتتە ورتالىق الاڭدى كۇشەيتىپ, ويىندى ءوز باقىلاۋىندا ۇستاۋعا تىرىستى. ايتسە دە, 30-جۇرىستەن كەيىن نەپومنياششي ايقىن باسىمدىققا يە بولا باستادى. دين سوڭىنا دەيىن قارسىلىق كورسەتۋگە تىرىسقانىمەن, 48-جۇرىستەن كەيىن ءوز جەڭىلىسىن مويىندادى.
– بۇكىل ماتچ بويى قورعانىستا ويناۋ وڭاي بولعان جوق. 29-جۇرىستە جاساعان قاتەلىگىم ويىن تاعدىرىن شەشىپ كەتتى دەسەم دە بولادى. وسىدان كەيىن مەنىڭ بارلىق پوزيتسيام السىرەپ قالدى, – دەدى دين ليجەن.
ال نەپومنياششي العاشقى جۇرىستەر دايىندىق بارىسىندا الدىن الا ويلاستىرىلعان قادامدار بولعانىن جانە سونىڭ ارقاسىندا ماتچ بويى بىرنەشە ءساتتى پوزيتسيادا ويناعانىن ايتتى.
گازەت بەتتەلىپ جاتقاندا الەم تاجىنە ۇمىتكەر شاحماتشىلار وزدەرىنىڭ التىنشى پارتياسىن ويناپ جاتقان بولاتىن. ال گروسسمەيستەرلەر بۇگىن ءتورتىنشى دەمالىس كۇنىن ءتيىمدى وتكىزۋگە تىرىسىپ جاتىر.