كاسىپقوي بوكستا باق سىناپ جۇرگەن جەرلەستەرىمىز مەيىرىم نۇرسۇلتانوۆ پەن نۇرسۇلتان امانجولوۆ كەزەكتى جەكپە-جەكتەرىن وڭتۇستىك كورەيادا وتكىزىپ, قارسىلاستارىن نوكاۋتپەن تىزە بۇكتىردى.
ينچحون قالاسىندا ۇيىمداستىرىلعان بوكس كەشىنىڭ باستى ايقاسىندا ونەر كورسەتكەن مەيىرىم نۇرسۇلتانوۆ (19-0, 10 كو) بۇگىنگە دەيىن كاسىپقوي شارشى الاڭدا 15 كەزدەسۋ وتكىزىپ, سونىڭ 14-ءىن مەرزىمىنەن بۇرىن اياقتاعان جاپونيانىڭ ماقتانىشى كادزۋتو تاكەساكونى سەگىزىنشى راۋندتا سۇلاتىپ ءتۇسىردى. بۇل جەكپە-جەكتە ورتا سالماقتاعى WBO International تۇجىرىمى بويىنشا چەمپيوندىق اتاعىن تاعى ءبىر مارتە ءساتتى قورعادى.
ال سۋپەر اۋىر سالماقتا جۇدىرىقتاساتىن وتانداسىمىز نۇرسۇلتان امانجولوۆ جەرگىلىكتى بوكسشى سۋك حي انمەن قولعاپ ءتۇيىستىرىپ, قارسىلاسىن سەگىز راۋندقا جوسپارلانعان ايقاستىڭ ءۇشىنشى راۋندىندا ەسىنەن تاندىردى. بۇل – وتانداسىمىزدىڭ كاسىپقوي بوكستاعى بەسىنشى جانە مەرزىمىنەن بۇرىن اياقتاعان ءتورتىنشى جەڭىسى.