قىزىلوردا قالاسىندا قارتتار مەن مۇگەدەكتەردىڭ ينتەرنات-ءۇيى جانىنان ءومىردىڭ قيىن جاعدايىنا تاپ بولعان بالالارعا ارنالعان “مەيىر” وڭالتۋ ورتالىعى ەسىك اشتى.
ورتالىقتىڭ اشىلۋ راسىمىندە وبلىس اكىمى بولاتبەك قۋاندىقوۆ ءسوز سويلەدى.
– حالقىمىز ەجەلدەن-اق جەتىمىن قاناتىنىڭ استىنا الىپ, جەلەپ-جەبەپ جۇرگەن. قاراۋسىز بالانىڭ قوعامنان شەتتەپ, جات قىلىقتارعا ۇيىرسەك بولاتىنى بەلگىلى. ونداي جاعدايلار ومىردە بار. بۇل مەيىرىمدىلىك ءۇيى قيىن جاعدايدا قالعان بالالاردى تاربيەلەيدى, كۇتىمگە الادى, باعىت سىلتەپ, ءجون جولعا ءتۇسىرەدى. وسىدان ءبىراز بۇرىن “ازاماتتىق اليانس” قاۋىمداستىعى, “يگىلىك” كووپەراتيۆتىك قورى جانە وبلىس اكىمدىگى اراسىندا بىرلەسكەن ءىس-قيمىل مەن ارىپتەستىك جايلى ۇشجاقتى مەموراندۋم قابىلدانعان بولاتىن. وسى كەلىسىمدە 42 جوبا بەكىتىلگەن, سونىڭ 17-ءسى ىسكە اسىپ وتىر. بۇگىنگى وڭالتۋ ورتالىعى – سونىڭ ءبىر كورىنىسى, – دەدى اكىم.
وڭالتۋ ورتالىعى قاداعالاۋسىز قالعان بالالاردى ءۇش اي مەرزىم ءىشىندە جان-جاقتى كۇتىمگە الادى, وقىتادى. ونان سوڭ ولاردى اتا-اناسىنا نە باسقا دا ءتيىستى ورىندارعا تابىستايدى. بۇل ءۇشىن ارنايى پسيحولوگ ماماندار, الەۋمەتتىك پەداگوگتار جانە دارىگەرلەر قىزمەت ەتەدى. ورتالىق ازىرشە ون بەس ورىنعا ارنالعان. اسحانا, دەمالىس, جاتىن ورىندارىمەن جابدىقتالعان. وسى ماقساتقا بيۋدجەتتەن تىس قارجى كوزدەرىنەن 6 ملن. تەڭگە ءبولىنىپ وتىر.
ومىرگە كەلگەن جاڭا ورتالىقتان نەگىزگى ۇستانىمى – ادامگەرشىلىك قاعيدالارىن بيىك ۇستاپ, سانالى ۇرپاققا سارا جول كورسەتۋ.
ەركىن ءابىل.
قىزىلوردا.