مەن ءۇشىن بۇل ەكەۋى ەگىز ۇعىم. ولاردى ءبىر-بىرىنەن اجىراتۋ استە مۇمكىن ەمەس. ويتكەنى, ەلوردا سارىارقا توسىنە حالقىمىزدىڭ قايراتكەر ۇلى ن.ءا.نازارباەۆتىڭ تىكەلەي كۇش-قايراتى, ساياسي ەرىك-جىگەرى ارقاسىندا عانا دۇنيەگە كەلىپ, ىرگەسى قالانىپ, كوك بايراعىن جەلبىرەتتى.
ەل تاۋەلسىزدىگى تۋرالى ويلانعان ءساتتەرىمدە مەن ءتۇرلى تۇيتكىلدى ساۋالدارعا بەرىلىپ, ويعا تۇسەتىن ەدىم. التىن وردادان باستاۋ الىپ, ودان 71 حان باسقارعان قازاق ەۋروپا مەن ازيانىڭ تورىنە شىعىپ, بۇكىل ەۋرازيا قۇرلىعىنىڭ توبە ءبيى تىزگىنىن ۇستار ما ەكەن؟ دۇنيە جۇزىندە بىرنەشە ءجۇز ميلليون, ءتىپتى ميللياردتاعان حالقى بار مەملەكەتتەر ءومىر سۇرۋدە. سولاردىڭ اراسىندا 17 ميلليون عانا حالقى بار قازاق ەلى دۇنيەجۇزىلىك ساياساتقا ىقپال ەتە الار ما؟ الەمدىك ساياساتتىڭ سۇڭعىلا بىلگىشتەرى قازاق ەلىمەن ساناسار ما؟ ازۋىن ايعا بىلەگەن اقش پرەزيدەنتى ءبىزدى وزىنە تەڭگەرەر مە؟ تۇركى دۇنيەسى تۇگەل مويىنداپ, قازاق باۋىرىن ءوزىنىڭ ءتول باسى دەپ تانىر ما ەكەن؟ وسىنداي ويلار ءجيى مازالايتىن ەدى. قۇدايعا شۇكىر, ەل باستاعان ەرەن ەرىمىزدىڭ ارقاسىندا بۇگىنگى كۇنى سونىڭ بارىنە قول جەتكىزدىك. بۇگىن قازاق ەلى الەمدىك ساياساتقا وزىندىك ىقپال ەتىپ, ءپاتۋالى وي قوزعايتىن, دۇنيە ءجۇزى تانىعان ابىرويلى ەلگە اينالدى.
مەن ەلىمىزدىڭ استاناسىن الماتىدان اقمولاعا اۋىستىرۋ تۋرالى شەشىمنىڭ قابىلدانۋىنىڭ باسى-قاسىندا بولعان اداممىن. ول كەزدە قازاقستاننىڭ حالىق دەپۋتاتى ەدىم, جوعارعى كەڭەس سەسسياسىنىڭ كەزەكتى وتىرىسى 1994 جىلدىڭ 6 شىلدەسىندە بولىپ, ءبارىمىز دە ارقا-جارقا امانداسقان سوڭ, جۇمىسقا كىرىسىپ كەتكەن ەدىك.
بۇل وتىرىستىڭ ەلىمىزدىڭ بولاشاعى ءۇشىن تاريحي شەشىم قابىلداناتىن كۇن ەكەنىن ەشكىم دە بولجاعان جوق. جاسىراتىنى جوق, استانانى ەلىمىزدىڭ ورتالىعىنا كوشىرۋ تۋرالى اۋىزەكى اڭگىمەلەردە ءجيى ايتىلىپ ءجۇردى. الايدا, مۇنداي پىكىرلەرگە قارسىلار وتە كوپ بولاتىن. ءتىپتى, دەپۋتاتتىق پوشتامىزعا دا مۇنداي ۇسىنىس تۇسكەن بولسا قارسى بولۋ كەرەكتىگىن سۇراعان ۇسىنىستار دا قاپتاپ كەلىپ جاتاتىن. ءبارىنىڭ ايتاتىن نەگىزگى سەبەبى – ەكونوميكالىق داعدارىس. حالىق ەڭبەكاقىسىن, زەينەتاقىسىن ۋاقتىلى الا الماي جاتقان اسا قيىن جاعدايدا ەلدىڭ استاناسىن كوشىرۋ سياقتى ۇلكەن شىعىنعا جول بەرۋگە بولمايدى دەگەن بۇلتارتپاس سىلتاۋدىڭ دا سالماعى اۋىر. شىنىندا, بۇل ويلاردى ەشكىم تەرىستەي المايتىن. كەڭەس وداعى ىدىراپ, ەكونوميكالىق بايلانىستار ۇزىلگەن سوڭ ءوندىرىس وشاقتارى تولىق بولماسا دا نەگىزىنەن توقتاپ قالعان كەز. سونىڭ كەسىرىنەن بيۋدجەتتىڭ ءتۇسىم بولىگى قۇلدىراپ, شىعىنداردى تولىق جابا الماي, تۇيىققا تىرەلىپ تۇردى. وسىنداي جاعدايدا استانانى جاڭا جەرگە كوشىرىپ, وندا قالا سالۋ دەگەن كوپ جۇرتقا اقىلعا قونبايتىن قيال سياقتى كورىنەتىن.
سونىمەن... ءXIIى شاقىرىلعان جوعارعى كەڭەستىڭ كەزەكتى وتىرىسى اشىلدى. ەلباسى ن.ءا.نازارباەۆ زالدا وتىرعان جوعارعى كەڭەس دەپۋتاتتارى مەن قوناقتارعا, باسقا دا رەسمي تۇلعالارعا جارقىن امانداسىپ, ءىلتيپاتىن ءبىلدىردى. وتىرىستى جوعارعى كەڭەستىڭ توراعاسى ءابىش كەكىلباەۆ اشىپ, العاشقى ءسوزدى مەملەكەت باسشىسىنا بەردى.
جاڭا عانا جۇرتتىڭ بارىمەن جايدارى امانداسىپ, ەمەن-جارقىن جايدا تۇرعان پرەزيدەنتتىڭ داۋىسى كۇتپەگەن جەردەن شيراپ, ءبىر ماسەلەنى بەرىك ۇستانعان كۇيدى كورسەتىپ, وتكىر ۇنمەن باتىل سويلەپ كەتتى. ول ەلدىڭ استاناسىن الماتىدان اقمولاعا كوشىرۋدىڭ 30-دان ارتىق ارتىقشىلىقتارى بار ەكەندىگىن سانامالاپ بەردى. ءبارى دە بۇلتارتپاس, دالەلدى سەبەپتەر. بۇرىن قاي-قايسىمىز دا اڭعارا بەرمەگەن, «اپىرماي, سولاي ەكەن-اۋ» دەگىزەتىن سونى پىكىرلەر.
نۇرسۇلتان ءابىش ۇلى ءسوزىن بىتىرگەندە وسى ۋاقىتقا دەيىن استانانى كوشىرۋگە قارسى بولىپ كەلگەندەر ءارى-ءسارى كۇيگە ءتۇستى. سوندىقتان تالقىلاۋعا دا جۇرت شابانداپ كىرىستى. الايدا, بوي ۇيرەتىپ, العاشقى قارسى پىكىرلەر شىعا باستاعاندا, باسقالار دا قوسىلىپ كەتتى. شىنى كەرەك, پرەزيدەنتتىڭ پىكىرىن قوستاعان ۇندەر دە از بولعان جوق. ۇسىنىستاردى جوعارعى كەڭەستىڭ توراعاسى, حالىق جازۋشىسى ءابىش كەكىلباەۆ قورىتىندىلاپ, ەلباسى ۇسىنىسىن قابىرعالى دالەلدەرمەن قولدادى. ول العا قويىلىپ وتىرعان پروبلەمانىڭ بۇكىل قازاقستانىمىزدىڭ بولاشاق مۇراتىنان تۋىنداپ وتىرعانىنا نازار اۋداردى. جانە حالىقارالىق ارەنادا قازاق قوعامىنىڭ الەۋەتتىلىگىن, قۋاتتىلىعىن پاش ەتەر فاكتورعا اينالاتىنىن اتاپ كورسەتتى. ابەكەڭ ءسوزىنىڭ سوڭىندا بۇگىن ەلباسىنىڭ تۋعان كۇنى ەكەنىن ەسكەرتىپ, ونىڭ ۇسىنىسىن قولداۋ ارقىلى لايىقتى سىيلىق جاسايىق دەگەن دە ازىلگە قۇرىلعان بولسا دا الەۋەتتى سەبەپتى ورتاعا سالدى. «ءسوز تاپقانعا قولقا جوق» دەگەندەي ونىڭ بۇل سوزىنە ءبارىمىز دە ريزا بولىپ, ءبىر ءسات جادىراپ قالدىق. ءسويتىپ, استانانى اقمولاعا كوشىرۋ تۋرالى قاۋلى كوپشىلىك داۋىسپەن قابىلداندى. بۇل مەنىڭ استانانى كوشىرۋ تۋرالى ءبىرىنشى داۋىس بەرۋىم ەدى.
كوپشىلىكتىڭ كوڭىلىن كۇپتى ەتىپ, كۇمان تۋعىزعان باستاما ۋاقىت وتە كەلە ەلباسى شەشىمىنىڭ دانالىق ەكەنىن دالەلدەدى. سونىڭ ارقاسىندا استانامىز سارىارقا تورىنەن بوي كوتەرىپ, ەۋرازيا مەن ازيانى جالعاستىراتىن التىن كوپىر عانا ەمەس, كۇللى الاش جۇرتىنىڭ جۇرەگىنە اينالىپ, الەمنىڭ تاڭدايىن قاقتىرعانىنا كۋا بولىپ وتىرمىز. نەبارى ساۋساقپەن سانارلىق مەرزىمدە استانا وزگە ەلدەرمەن يىق تىرەسە الاتىن, كەلەشەگى كەمەل, بولاشاعى ايقىن قالالار ساناتىنا قوسىلدى. قازىرگى تاڭدا قازاقستاندى تانىعان الەم قاۋىمداستىعى استانانى قازاقستاننىڭ سيمۆولى دەپ بىلەدى.
زاماناۋي تەحنيكالاردى پايدالانا وتىرىپ سالىنعان اسەم عيماراتتار ساۋلەت ۇلگىسى جاعىنان دا, اسەمدىگىمەن دە كوز تارتىپ, حالىقتىڭ ورىندى ماقتانىشىنا اينالدى. ەلباسىنىڭ تىكەلەي باسشىلىعىمەن الەمنىڭ مىقتى ساۋلەتشىلەرى كيسە كۋروكاۆا, نورمان فوستەر ەلىمىزدىڭ ساۋلەتشىلەرىمەن بىرلەسە وتىرىپ, استانانى كوركەيتۋگە اتسالىستى.
1995 جىلى ءبىز جاڭا كونستيتۋتسياعا سايكەس تۇڭعىش رەت شاقىرىلعان ەكى پالاتالى قازاقستان رەسپۋبليكاسى پارلامەنتىنىڭ دەپۋتاتتارى بولىپ, الماتىعا قايتادان جينالدىق. ول كۇندەرى جوعارعى كەڭەستىڭ بۇدان ءبىر جىل بۇرىن (1994 جىل, 6 شىلدە) قابىلداعان قاۋلىسىنا ساي اقمولا قالاسىن ەل استاناسىنا اينالدىرۋ جونىندەگى جۇمىستار كەشەنى قارقىندى ءجۇرىپ جاتسا, بۇل ىسكە مەملەكەت باسشىسىنىڭ باستاماسىمەن ارنايى قۇرىلعان مەملەكەتتىك كوميسسيا باسشىلىق ەتتى.
اتام قازاق «ەكى رەت كوشۋ – ءبىر جۇتپەن تەڭ» دەپ تۇيىندەگەن. ال ۇلكەن مەملەكەتتىڭ ءبىرى – قازاقستان رەسپۋبليكاسىنىڭ استاناسىنىڭ الماتىدان اقمولاعا قونىس اۋدارۋى قايدان وڭاي بولسىن؟ العاشىندا قيىنشىلىقتار, قاۋىرت شارۋالار باستان اسىپ جاتتى. الدىمەن مەملەكەتتىك ورگانداردى كوشىرىپ اكەلىپ ورنالاستىرۋ ءىسى قولعا الىندى. ول ءۇشىن زاماناۋي ءۇي-جاي جەتپەي جاتتى. بىراق ونىڭ ءبىرازى عىلىمي نەگىزدەلگەن جوبالىق-سمەتالىق قۇجاتتارعا ساي جاڭادان, جىلدام سالىنا باستادى. قۇرىلىسشىلار تاۋلىگىنە ەكى, ءۇش اۋىسىم بويىنشا ەڭبەك كورىگىن قىزدىرا ءتۇستى. وندىرىستىك, الەۋمەتتىك, مادەني-تۇرمىستىق نىساندار كۇن قۇرعاتپاي سالىنىپ, ءبىرىنىڭ سوڭىنان ءبىرى پايدالانۋعا بەرىلدى.
1997 جىلعى 8 جەلتوقساندا پارلامەنت تولىق قۇرامىمەن ارناۋلى پويىزبەن الماتىدان استاناعا بەت تۇزەدى. ال 10 جەلتوقساندا (1997 جىلى) ەلباسى ن.ءا.نازارباەۆ اقمولا قالاسى قازاقستان رەسپۋبليكاسىنىڭ استاناسى دەپ تانىلاتىن جارلىعى كۇشىنە ەندى. وسى كۇنى قالانىڭ جەرگىلىكتى تۇرعىندارى قازاق استاناسىنىڭ تۋعان كۇنىن جارقىراعان اسپان استىندا, ماي توڭعىسىز اۋا رايىندا قارسى العاندارىنا قاتتى تاڭداندى. ويتكەنى, سونىڭ الدىندا عانا 25-30 گرادۋس اياز قىسىپ تۇرعان ەدى. تۇرعىندار مۇنى قازاق حالقى ءۇشىن يگىلىكتىڭ باسى دەپ تانىپ, جاقسى ىرىمعا جورىدى. سودان بەرگى وتكەن ۋاقىت حالىقتىڭ بۇل ساۋەگەيلىگى شىندىققا ۇلاسىپ كەلەدى.
سونىمەن, پارلامەنت دەپۋتاتتارى – بىزدەر جاتاقحانادا جاتىپ, پارلامەنت عيماراتىن جوندەۋ جۇمىستارى بىتە قويماعان سوڭ, ونىڭ جارىم-جارتىلاي سالىنىپ بولعان, سىرى كەپپەگەن بولمەلەرىندە وتىرىس, جينالىستارىمىزدى وتكىزىپ, جۇمىسقا كىرىسىپ كەتتىك. كىرىپ-شىققاندا كەڭسە ىشىندەگى ءالى توسەلىپ بىتپەگەن ەدەن جاپقىشتاردى قۇرىلىسشىلار توسەپ, ولاردىڭ قيىپ كويعان بولىكتەرىن اتتاپ وتەتىنبىز. كورشى بولمەلەردە قۇرىلىسشىلار ءوز جۇمىستارىمەن ارپالىسىپ جاتاتىن. كوشەدە اسفالت توسەلىپ, اباتتاندىرۋ جۇمىستارى دا قابات جۇرگىزىلىپ جاتتى.
پرەزيدەنت سارايىنىڭ كۇمبەزدى زالىندا ەلىمىزدىڭ جاڭا استاناسى تۋرالى قازاقستان حالقىنا ارنالعان ۇندەۋدى قابىلدادىق. بۇل مەنىڭ دەپۋتات رەتىندە استانانى كوشىرۋگە ەكىنشى رەت داۋىس بەرۋىم ەدى.
وسىدان كەيىن ەلباسى پارلامەنت سەناتى كوميتەتتەرىنىڭ توراعالارى – جابايحان ءابدىلدين جانە مەنى كابينەتىنە شاقىرىپ, وتە جىلى شىرايمەن, كوتەرىڭكى كوڭىل-كۇيمەن قارسى الدى. استانانىڭ وركەندەۋى جايلى ءارتۇرلى اڭگىمە قوزعالدى. سوسىن ۇشەۋمىز پرەزيدەنت سارايىنىڭ تەرەزەسىنەن سول كەزدە جازىق دالا بولىپ جاتقان ەسىلدىڭ سول جاعالاۋىنا قارادىق. ەلباسى تەبىرەنە سويلەپ, پرەزيدەنت اكىمشىلىگى عيماراتىنىڭ ورنالاساتىن جەرىن كورسەتىپ, مىنا كەڭسەلەردىڭ ۋاقىتشا ەكەنىن ايتتى. بولاشاقتا ءساندى دە, ساۋلەتتى, ساليقالى, شەتەلدىكتەر الدىندا ۇيالمايتىنداي, جۇمىس ىستەۋگە وتە جايلى ءارى قولايلى اكىمشىلىك ۇيلەر بوي كوتەرەتىنىن باپپەن جەتكىزگەنى ءالى ەسىمدە.
نە كەرەك, جەرگىلىكتى تۇرعىندار اقمولانىڭ ەلىمىزدىڭ استاناسىنا اينالعانىن قۋانىشپەن قابىلدادى. ارقانىڭ دارقان داستارقانى كەڭىنەن جايىلدى, اق تىلەكتەر اعىلدى, اق تۇيەنىڭ قارنى جارىلدى. ءسوز رەتى كەلگەندە اقمولا, ارقا ءوڭىرى اعايىندارىنىڭ داستارقان جايىپ, قۇرمەت كورسەتۋدەگى ءوزىم كورگەن ەرەكشەلىكتەرىن ايتا كەتەيىن.
الماتىدان كەلگەن بىزدەردى كەلەسى كۇنى جەرگىلىكتى جىگىتتەر ەرەيمەنتاۋ كەنتىنە الىپ بارىپ, ورىس ازاماتىنىڭ شاڭىراعىندا قوناق قىلدى. ىشىمىزدەن ەۋروپالىق داستارقان جايىلادى ەكەن عوي دەپ وتىرمىز. بىراق مۇلدە ولاي بولماي شىقتى. كادىمگى قازاقى داستۇرمەن, جول-جورالعى جاساعان ورىس ازاماتىنىڭ پەيىلىنە شىنايى رازى بولدىق. شىركىن-اي دەسەڭشى, قوناق كەلسە, قازاندى تولتىرىپ ەت اسپاسا, كوڭىلدەرى كونشىمەيتىن ارقا ەلىنىڭ ادامگەرشىلىككە تولى دارقان پەيىلى مەن ۇلتجاندىلىق قاسيەتىنەن اينالىپ كەتكەندەيسىڭ عوي. ءيا, سودان بەرى مىنە, ءبىراز ۋاقىت زىمىراپ ءوتىپ بارادى.
وسى جىلدار ىشىندە بارلىق قيىنشىلىقتار دا, ءارتۇرلى كەرتارتپا بايبالام سالۋشىلىق تا ارتتا قالدى. ارقانىڭ كىندىگىندە ورنالاسقان وبلىس ورتالىعى بولىپ كەلگەن اقمولا قالاسى استانا قالاسىنا, ۇلان-بايتاق قازاق ەلىنىڭ ەلورداسىنا اينالدى. تەك اتى ەمەس, زاتى دا تانىماستاي وزگەردى. سەبەبى, استانا – تولاسسىز تۇلەۋ, دامىلسىز دامۋ ۇستىندەگى ەلوردامىز. بۇل تاريحي جاسامپاز ۇلى ءىستىڭ ۇيىتقىسى دا, دەم بەرۋشىسى دە, ساۋلەتشىسى دە مەملەكەت باسشىسى نۇرسۇلتان نازارباەۆتىڭ تىكەلەي ءوزى ەكەنىن اتاپ ايتقان ءجون. جاڭا الەمدەگى جاڭا قازاقستان قانشالىقتى تەز دە لايىقتى ورىن تاۋىپ, قاناتىن كەڭگە جايا تۇسسە, استانا دا سوندايلىق قارقىنمەن دامۋدا. استانا بايتاق قازاقستانىمىزدىڭ الەۋمەتتىك-ەكونوميكالىق دامۋىنىڭ قۋاتتى لوكوموتيۆى ءرولىن اتقارۋدا. ءسويتىپ, زاماناۋي ونەركاسىپ, عىلىم جانە مادەنيەت ورتالىعىنا, تۇرعىنداردىڭ ءومىر سۇرۋىنە قولايلى مەكەنگە جانە ەل ەكونوميكاسىنا قوماقتى ۇلەس قوسار دونورعا اينالدى.
ال جىلىنا قانشاما وتباسىلار كەڭ بولمەلى, قولايلى جاعداي تۋعىزىلعان جاڭا پاتەرلەرگە قول جەتكىزىپ, قونىس تويىن وتكىزىپ جاتىر دەسەڭىزشى. «پيراميدا», «حان شاتىر», «قازمۇنايگاز», «اق وردا», «نۇرسايا», «يزۋمرۋدنىي», «تاۋەلسىزدىك سارايى», ت.ب. عيماراتتارعا شەتەلدىك قوناقتاردىڭ وزدەرى تاڭداي قاعىپ قالادى. ءبىر عانا «بايتەرەك» نىسانىنىڭ ءوزى نەگە تۇرادى دەسەڭىزشى؟ ارۋ استانامىزدىڭ تورىندەگى بارلىق اسەم ساۋلەتتى ۇيلەردى جەكە دارا تىزبەلەپ ايتار بولساق, وعان ۋاقىت تا, مۇمكىندىك تە جوق. ال, مەملەكەتتىك «جاسىل ەل» باعدارلاماسىنا ساي اتقارىلىپ جاتقان جۇمىستاردىڭ قارقىنى ەرەن دە بولەك. استانا كىسى قىزىعارلىقتاي قارقىنمەن دامىپ, كوركەيە تۇسۋدە. ەلباسىمىز ءوزىنىڭ ءتول پەرزەنتى ىسپەتتەس استانا قالاسىن اباتتاندىرۋ, مادەنيەتىن ارتتىرۋ, ساۋلەتتەندىرۋ جولىنا ءجىتى نازار اۋدارىپ, ءتيىستى ماماندارمەن ءجيى كەزدەسىپ, قىلاڭ بەرگەن كەمشىلىكتەردى قاتاڭ سىنعا الىپ, ەلوردانىڭ دامۋىنا ەرەكشە ەكپىن بەرىپ كەلەدى.
ءسوز ورايىندا وزىندىك وي-پىكىرلەرىمىزدى ورتاعا سالساق دەدىك. ءبىرىنشى, استانا ەلىمىزدىڭ اكىمشىلىك ورتالىعى بولىپ قالماي, ەلدىڭ رۋحاني استاناسىنا اينالۋى كەرەك. وسى ورايدا استانا ۇلتتىق ينتەلليگەنتسيانىڭ وركەندى ورداسى رولىنە كوتەرىلسە دەگەن ءۇمىتىمىزدى جاسىرمايمىز. ەكىنشىدەن, قالادا سالىنىپ جاتقان قۇرىلىس اۋقىمى كەڭ ەكەنىنە داۋ جوق جانە بۇعان سۇيسىنەسىز. سۇيسىنە وتىرىپ, عيماراتتار تۇرعىزۋ بارىسىندا قازاقتىڭ ۇلتتىق ساۋلەت ونەر ۇلگىلەرىن كەڭىرەك قولدانسا دەگەن تىلەگىمىزدى بىلدىرەمىز.
استانا ءوزىنىڭ مەرەيلى مەرەكەسىمەن ءتول تاريحىمىزعا جارقىن بەتتەر قوسارى حاق. ويتكەنى, جاڭا استانانىڭ باستاۋشىسى – ەلباسى, قولداۋشىسى – ەل-جۇرتى. وسەر ەل استاناعا قاراپ بوي تۇزەر.
ماسكەۋدە تمد ايماعى بويىنشا ارداگەرلەر ۇيىمىن بىرىكتىرەتىن حالىقارالىق ۇيىم بار. مەن رەسپۋبليكالىق ارداگەرلەر كەڭەسىنىڭ توراعاسى رەتىندە قازاقستان تاراپىنان اتالمىش ۇيىمنىڭ پلەنۋمدارىنا قاتىسىپ, ءسوز سويلەگەنىمدە ەلباسى تاراپىنان ۇوس ارداگەرلەرىنە دەگەن قۇرمەتتىڭ شەكسىز ەكەندىگىن باياندادىم. قازاقستاننىڭ بارلىق وبلىس ورتالىقتارىندا ۇوس قاتىسقان قاھارماندارىمىزدىڭ ەرلىگىن اسپەتتەۋدە ءتۇرلى كەشەندەر اشىلىپ, باتىرلارىمىزدىڭ ەسىمدەرىن حالىق جادىندا ساقتاپ, جاستاردى پاتريوتتىق رۋحتا تاربيەلەۋدە وراسان شارالار ىسكە اسقاندىعىن دا باسا ايتتىم. سونىڭ جارقىن كورىنىسى ىسپەتتى ەلوردادا باتىر بابامىز ب.مومىش ۇلىنا, ەرجۇرەك قىزدارىمىز ءا.مولداعۇلوۆا مەن م.مامەتوۆاعا ەسكەرتكىش ورناتىلۋىن, الداعى ۋاقىتتا گەنەرال ي.ۆ.پانفيلوۆقا دا ەسكەرتكىش تۇرعىزىلاتىندىعىن العا تارتتىم. مۇنداي اۋقىمدى شاراعا پرەزيدەنتىمىز ن.ءا.نازارباەۆ تىكەلەي قولداۋ كورسەتەتىندىگىن جەتكىزدىم. سوندا 93 جاستاعى ادميرال, وسى حالىقارالىق وداقتىڭ توراعاسى ا.ي.سوروكين: «ءو.وزعانباەۆ مىرزا ايتقان ۇلى ىستەردىڭ ۇيىتقىسى, ولىلەردىڭ ارۋاعىنا ادال بولۋ, تاريحتى ۇمىتپاي, جاستاردى پاتريوتتىق رۋحتا توپتاستىرا ءبىلۋ ن.ءا.نازارباەۆ سىندى ەلباسىنىڭ عانا قولىنان كەلەتىن ءىس. ەلدىڭ بىرلىگىن ساقتاپ, ۇلتارالىق ىنتىماقتاستىقتى ارتتىرىپ, ونەگەلى ءىس تىندىرىپ جاتقان قازاقستان پرەزيدەنتىنە دەگەن ريزاشىلىعىمىز شەكسىز» دەگەن ەدى.
مەن رەسپۋبليكالىق ارداگەرلەر ۇيىمى ورتالىق كەڭەسىنە توراعا قىزمەتىنە كەلگەننەن بەرى ەلباسىمەن ءجيى قاۋىشىپ, ديدارلاسۋدىڭ مۇمكىندىگى ارتتى. ۇستىمىزدەگى جىلعى اقپان ايىنىڭ 19 جۇلدىزىندا نۇرسۇلتان ءابىش ۇلىنىڭ جەكە قابىلداۋىندا بولدىم. ەلباسىنىڭ قابىلداۋىنان كەيىن ارداگەرلەر ۇيىمىنىڭ جۇمىسىندا جاڭا سەرپىن پايدا بولدى. ەلىمىزدىڭ ەرتەڭى مەن جارقىن بولاشاعى جولىندا تالاي تار جول, تايعاق كەشۋدى وتكىزگەن قادىرمەندى قاريالارىمىز ءۇشىن اتقارىلار شارالاردىڭ دا اۋقىمى كەڭەيە ءتۇستى.
استانا كۇنى مەرەكەسى قارساڭىندا تۇيگەن ءتۇيىنىم مەن تۇتقان تۇجىرىمىمنىڭ ءبىر پاراسى وسى ەدى دەمەكپىن. ەندەشە, استانا كۇنى قۇتتى بولسىن, ەلىمىز امان, جۇرتىمىز تىنىش بولىپ, ەلىمىزدىڭ ەرتەڭى ءۇشىن ەلەڭدەپ جۇرگەن ەلباسىمىزعا اللا كۇش-قۋات بەرىپ, جولىن اق قىلعاي!
ومىرزاق وزعانباەۆ,
رەسپۋبليكالىق ارداگەرلەر ۇيىمى ورتالىق كەڭەسىنىڭ توراعاسى.