ۇلىتاۋ وبلىسى كوپ نارسەنى جاڭادان باستاپ جاتىر. سونىڭ ءبىرى – فۋتبول سپورتىن جولعا قويىپ, دامىتۋ. بىلتىر وبلىس اكىمدىگى مەن قازاقستان فۋتبول فەدەراتسياسى قاۋىمداستىعىنىڭ اراسىندا مەموراندۋم جاسالىپ, وبلىستىق فۋتبول قاۋىمداستىعىن قۇرۋ, كاسىبي فۋتبول كلۋبى مەن بالالار-جاسوسپىرىمدەر اكادەمياسىن اشۋ كوزدەلگەن ەدى.
وڭىردە قۇرىلعان فۋتبول قاۋىمداستىعىنىڭ توراعاسى بولىپ «قازاقمىس بارلاۋ» جشس باس ديرەكتورى عالىم نۇرجانوۆ سايلاندى. « ۇلىتاۋ» فۋتبول كومانداسى جاساقتالدى. كوماندانىڭ باس ديرەكتورى – بۇرىن فۋتبولدان ەلىمىزدىڭ قۇراما كومانداسىنا باسشىلىق جاساعان تالعات بايسۋفينوۆ.
كەزىندەگى جەزقازعان وبلىسىنىڭ «ەڭبەك» كومانداسىنىڭ ءىزباسارى ىسپەتتى « ۇلىتاۋ» كومانداسى بيىل العاش رەت جاسىل الاڭعا شىعادى.
جەزقازعانداعى ورتالىق ستاديوندا تالدىقورعاندا جالاۋىن كوتەرەتىن ەل چەمپيوناتىنىڭ 2-ليگا كوماندالارى اراسىنداعى ويىنعا كوماندانى اتتاندىرۋ سالتاناتى بولدى. سالتاناتقا وبلىس اكىمى بەرىك ابدىعالي ۇلى قاتىستى. ول فۋتبولشىلارعا ساتتىلىك, جەڭىس تىلەدى. كوماندانىڭ كاپيتانى د.سلامبەكوۆ جانكۇيەرلەر ءۇمىتىن اقتاۋعا كۇش-جىگەرلەرىن جۇمسايتىندارىنا سەندىردى.
ابدوللا داستانوۆ,
جۋرناليست
جەزقازعان