شەتەل پرەزيدەنتتەرى, ۇكىمەت باسشىلارى, كورنەكتى ساياسي جانە ءدىن قايراتكەرلەرى ەلباسى ن.ءا.نازارباەۆ تۋرالى
ۆلاديمير پۋتين,
رەسەي فەدەراتسياسىنىڭ پرەزيدەنتى:
– ءبىز رەسەي – قازاقستان قاتىناستارىن دامىتۋعا ءسىزدىڭ قانشالىقتى زور جەكە ىقىلاسىڭىزدى بولەتىنىڭىزدى كورىپ وتىرمىز. وسى تىكەلەي اتسالىسۋدىڭ ارقاسىندا ءبىزدىڭ قارىم-قاتىناستارىمىز وتە ءتيىمدى تۇردە ءارى جەدەل قارقىنمەن دامىپ كەلەدى. ەكى مەملەكەت اراسىنداعى تاۋار اينالىمىنىڭ كولەمى وسە تۇسۋدە.
ءسىز ينتەگراتسيالىق ۇدەرىستەردە, اسىرەسە, ونىڭ ەڭ ءماندى نىساندارى مەن تۇرلەرى بويىنشا ءسوزسىز كوشباسشىسىز. قازاقستاننىڭ قول جەتكىزگەن تابىستارى ءسىزدىڭ اتىڭىزبەن تىكەلەي بايلانىستى. ءسىزدىڭ ەڭبەگىڭىزدى ءوز وتانداستارىڭىز عانا ەمەس, ميلليونداعان رەسەيلىكتەر دە شىنايى قۇرمەت تۇتادى.
ءسىز ەۋرازيالىق كەڭىستىكتەگى ينتەگراتسيالىق ۇدەرىستەردىڭ ناعىز ارحيتەكتورى بولىپ ەسەپتەلەسىز.
سي تسزينپين,
قحر توراعاسى:
– ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ باستاماشىسى – نۇرسۇلتان نازارباەۆ. ءبىز ونىڭ ۇلكەن ساياسي كورەگەندىگى مەن ايماقتىق قاۋىپسىزدىك پەن الەمدەگى بەيبىتشىلىكتى قامتاماسىز ەتۋدى ءوزىنىڭ پارىزى سانايتىن قاسيەتىنە ءتانتىمىز.
اوسشك-ءنى قۇرۋ تۋرالى يدەيانى العاش رەت قازاقستان پرەزيدەنتى نۇرسۇلتان نازارباەۆ 1992 جىلى بۇۇ باس اسسامبلەياسىنىڭ 47-سەسسياسىندا جاريا ەتكەن بولاتىن. بۇل باستاما بۇگىندە ءوز ومىرشەڭدىگىن دالەلدەپ, ازيا ەلدەرى اراسىندا بەدەلى بيىك, ابىرويى اسقاق, اۋقىمدى ۇيىمعا ۇلاستى.
باراك وباما,
اقش پرەزيدەنتى:
– اقش پەن قازاقستان اراسىنداعى ستراتەگيالىق ارىپتەستىك تۋرالى ۇنقاتىسۋ قازىرگى زامانعى شاقىرۋلاردى شەشۋگە دەگەن ورتاق ۇستانىمدارىمىزدىڭ كۋاسى بولىپ تابىلادى. مەن قازاقستانعا اۋعانستانداعى جاعدايعا بايلانىستى ناقتى ۇستانىمى ءۇشىن ريزاشىلىق بىلدىرەمىن. ءسىزدىڭ ۇلتارالىق جانە ءدىني توزىمدىلىكتى ىلگەرىلەتۋدەگى كۇش-جىگەرىڭىزدى جوعارى باعالايمىن.
دەۆيد كەمەرون,
ۇلىبريتانيا جانە سولتۇستىك يرلانديا
بىرىككەن كورولدىگىنىڭ پرەمەر-ءمينيسترى:
– مەن ەڭ العاش ءسىزدىڭ ەلگە ساپارمەن كەلگەنىمە قۋانىشتىمىن. ءبىزدىڭ ەكىجاقتى قاتىناستارىمىز جاڭا دەڭگەيگە كوتەرىلەتىنىن زور قۋانىشپەن اتاپ وتكىم كەلەدى. وعان ەلدەرىمىز اراسىنداعى ستراتەگيالىق سەرىكتەستىك تۋرالى كەلىسىم ايقىن دالەل بولادى.
قازاقستان بۇگىندە ءسىزدىڭ باسشىلىعىڭىزبەن قارقىندى دامىپ كەلەدى. قازاقستاننىڭ ىقپالى الداعى ۋاقىتتا دا ارتا بەرەتىنىنە سەنىمدىمىز. بىزدەر اۋعانستان بويىنشا بىرلەسكەن جۇمىستى بەلسەندى ءتۇردە دامىتۋدامىز. قازاقستان بۇل ماسەلەدە ماڭىزدى جانە وڭ ءرول اتقارادى. قازاقستاننىڭ بولاشاعى زور, ال ۇلىبريتانيا وسى بولاشاقتىڭ ماڭىزدى بولىگى بولا الادى.
ريم پاپاسى بەنەديكت XVI:
– جوعارى مارتەبەلى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ مىرزا!
قازاقستان رەسپۋبليكاسىنىڭ ۇلتتىق مەرەكەسى سىزگە جانە قازاقستان حالقىنا بەيبىتشىلىك پەن وركەندەۋ يگى تىلەكتەرىمدى جولداۋىما قۋانىشتى مۇمكىندىك تۋعىزىپ وتىر.
ەلىڭىزدىڭ تاۋەلسىزدىگىنىڭ مەرەكەسىنە وراي, جاراتۋشى ەلىڭىزدىڭ تۇرعىندارىنىڭ نەعۇرلىم ۇيلەسىمدى ءارى ادىلەتتى قوعام قۇرۋىنا قۋات بەرىپ, ولاردىڭ وتباسىلىق, الەۋمەتتىك جانە ۇلتتىق ومىرلەرى نۇرلى بولىپ, مادەني جانە رۋحاني قۇندىلىقتاردى قۇرمەتتەۋدى ءناسىپ ەتسىن دەپ تىلەيمىن.
جوعارى مارتەبەلى, سىزگە جانە ەلدىڭ بارلىق ازاماتتارىنا جاراتقاننان شاپاعات تىلەيمىن.
مارك پەررەن دە بريشامبو,
ەقىۇ-نىڭ باس حاتشىسى:
– جاھاندانۋ جاعدايىنداعى قازىرگى الەم مادەنيەتارالىق جانە دىنارالىق ۇنقاتىسۋدىڭ قاجەتتىلىگىن سەزىنىپ وتىر. الەمدىك جانە ءداستۇرلى دىندەر ليدەرلەرىنىڭ ءىىى سەزىن وتكىزۋ قازاقستان ەقىۇ-عا توراعالىق ەتەتىن 2010 جىلدىڭ الدىنداعى وتە جاقسى دايىندىق كەزەڭى بولىپ تابىلادى.
انگەلا مەركەل,
گفر كانتسلەرى:
– جاۋاپتى مىندەتتەردى ءارى قاراي اتقارۋىڭىزدا سىزگە زور تابىستار مەن ساتتىلىك تىلەيمىن. ەكونوميكالىق, قوعامدىق جانە ساياسي رەفورمالاردى جۇرگىزۋدە قازاقستان بۇدان بىلاي دا گەرمانيا تاراپىنداعى قولداۋعا سەنىم ارتا الاتىن بولادى.
كيريلل,
ماسكەۋ جانە بۇكىل رەسەي پاتريارحى:
– وسكەلەڭ ۇرپاقپەن ءدىني-اعارتۋشىلىق جۇمىس جۇرگىزۋ ءبىلىمدى جانە ۇيلەسىمدى قوعام قۇرۋعا ايتارلىقتاي ۇلەس قوسىپ, ۇلتارالىق قاتىناستارداعى شيەلەنىس دەڭگەيىن تومەندەتۋگە جاعداي جاساي الار ەدى, بۇل بولاشاقتا قازىرگى زامان بەتپە-بەت كەلىپ وتىرعان كوپتەگەن پروبلەمالاردان قۇتىلۋعا كومەكتەسەرى انىق.
قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆقا دىنارالىق ۇنقاتىسۋدى قولداعانى, ءارتۇرلى ءدىن ۇستانۋشىلاردىڭ جۇرەگىنە جاقىن بەيبىتشىلىك پەن ءوزارا كومەك يدەيالارىنىڭ جولىن ۇستانعانى ءۇشىن شىنايى ريزالىعىمدى بىلدىرەمىن.
فاحد بەن ابدەل ءازيز ءال ساۋد,
ساۋد ارابياسىنىڭ كورولى:
– جوعارى مارتەبەلى پرەزيدەنت نۇرسۇلتان نازارباەۆ مىرزا! باسىڭىزعا اماندىق تىلەيمىن, سىزگە اللانىڭ راحىم شاپاعاتى جاۋسىن! مەن جاراتۋشى اللادان جوعارى مارتەبەلى ءسىزدى جانە استانادا ءوتىپ جاتقان الەمدىك جانە ءداستۇرلى دىندەر كوشباسشىلارى سەزىنە قاتىسۋشىلاردى تابىسقا جانە ىزگىلىككە جەتكىزىپ, جارىلقاي گور دەپ تىلەيمىن.
ءسىزدى جانە قازىر بارلىق ۇلتتار مەن حالىقتار سوعىس پەن قاقتىعىستان, وشپەندىلىك پەن كەمسىتۋشىلىكتەن ادا دۇنيە ورناتۋدى كوكسەپ, ادامزات پروبلەمالارىن بىرلەسىپ شەشۋگە جانە بەيبىتشىلىك پەن قاۋىپسىزدىك ورناتۋعا ۇمتىلعان بۇگىنگى تاڭدا وسىنداي الەمدىك سەزد وتكىزۋ جونىندەگى ءسىزدىڭ جاھاتشىلىعىڭىزعا قۋاتتاۋشىلىعىمدى ءبىلدىرۋ قۋانىشتى جايت.
ءتۇرلى مادەنيەتتەر وكىلدەرى, ءدىن مەن قوعام قايراتكەرلەرى اراسىندا ءوزارا تۇسىنىستىككە جەتۋدىڭ قۇرالى رەتىندە ءسىز تاڭداعان ۇنقاتىسۋ – بۇل دۇنيە جۇزىندە ىنتىماقتاستىققا جەتۋدىڭ ەڭ سارا جولى.
كويتيرو ماتسۋرو,
يۋنەسكو-نىڭ باس ديرەكتورى:
– قازاقستان باسشىلىعىنىڭ جاڭا بەيبىتشىل باستامالارى يۋنەسكو تاراپىنان جوعارى باعالانىپ وتىر. قازاقستان پرەزيدەنتى ن.ءا.نازارباەۆتىڭ الەمنىڭ جەكەلەگەن ەلدەرىنىڭ يادرولىق الەۋەتىن ەسەلەۋى سياقتى قاۋىپتى ۇردىستەردىڭ پايدا بولۋىنا بايلانىستى الاڭداۋشىلىعىنا قوسىلا وتىرىپ, ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ الماتىداعى فورۋمىن جاڭا دۇنيەتانىم قالىپتاستىرۋعا قوسىلعان ەلەۋلى ۇلەس دەپ سانايمىن. قازاقستان پرەزيدەنتىنىڭ حالىقارالىق بەدەلى كوپ رەتتە قازاقستاندى ازياداعى بەيبىتشىلىكتى نىعايتۋ پروتسەسى ليدەرلەرىنىڭ قاتارىنا قوسقان اوسشك جاھاتشىلىقتارىنىڭ تابىسقا جەتۋىنە جاردەمدەستى. قازاقستاننىڭ ءوز جاھاتشىلىعى بويىنشا يادرولىق قارۋدان باس تارتۋ جونىندەگى شەشىمىنىڭ ماڭىزىن ايقىن كورسەتىپ بەردى.
الەكساندر لۋكاشەنكو,
بەلارۋس رەسپۋبليكاسىنىڭ پرەزيدەنتى:
– ءبىز ءار جولى استانادا بولعاندا, وزىمىزگە الدەنە الۋعا تىرىسامىز. بۇل قالادا وزىق تەحنولوگيا, قىزعىلىقتى ارحيتەكتۋرالىق ويلار بار. قازاقستاندى ءبىز بەلارۋس ءۇشىن ەڭ ءتيىمدى جانە پەرسپەكتيۆالى سەرىكتەس رەتىندە تانىپ كەلەمىز. ءسىزدىڭ ەلدە ءبىز ءۇشىن ءارتۇرلى جوبالاردى جۇزەگە اسىرۋعا ەشقانداي پروبلەما جوق. بۇل ىنتىماقتاستىعىمىزدىڭ دەڭگەيى جوعارى ەكەنىن كورسەتەدى.
ليۋبوۆ سليسكا,
رف مەملەكەتتىك دۋماسىنىڭ ۆيتسە-سپيكەرى:
– ماعان جەتىلدىرۋگە بولاتىن, وزگەشە جاساۋعا بولاتىن نارسەنى ن.نازارباەۆتىڭ سىناۋدان تايىنبايتىنى قاتتى ۇنايدى.
قازاقستان باسشىسىنىڭ ءوزارا قارىم-قاتىناستارىمىزدى جەتىلدىرۋگە دەگەن اكەلىك قامقورلىعى رەسەيدە ىلتيپاتپەن قابىلدانادى, مۇندا ءبارى دە ن.نازارباەۆتى ءىش تارتىپ تۇرادى.
ابدۋللا گۇل,
تۇرىك رەسپۋبليكاسىنىڭ پرەزيدەنتى:
– ءار ساپارىمدا وركەندەي تۇسكەنىنە كۋا بولىپ جۇرگەن استانا قالاسى – قازاقستاننىڭ ءديناميزمى مەن پرەزيدەنت نازارباەۆ مىرزانىڭ كورەگەندىلىگىن بەينەلەيتىن ەڭ ۇلكەن تۋىندى. استانانىڭ قۇرىلىس جۇمىستارىنا تۇرىك كومپانيالارى مەن جۇمىسشىلارىنىڭ دا ۇلەس قوسۋىن تۇرىك-قازاق ىنتىماقتاستىعىنىڭ ەڭ اسەم نىشاندارىنىڭ ءبىرى رەتىندە باعالايمىز.
ەمومالي راحمون,
تاجىكستان پرەزيدەنتى:
– اشىق-جارقىندىعى, شىنشىلدىعى, تارتىمدىلىعى, ادامعا ءسۇيىسپەنشىلىگى – مۇنىڭ ءبارى دە نۇرسۇلتان ءابىش ۇلىنىڭ تابيعاتىنا ءتان قاسيەتتەر.
قازاق جۇرتىنىڭ, ەلىنىڭ كوپ ۇلتتى حالقىنىڭ الدىنداعى, تاريحتىڭ الدىنداعى جوعارى جاۋاپكەرشىلىك سەزىمى ونىڭ بويىنان ءاماندا اجىراعان ەمەس.
ول ۇلى ۇيىمداستىرۋشى رەتىندە قازاقستاندى كەڭەستەن كەيىنگى كەڭىستىكتىڭ دامىعان مەملەكەتتەرىنىڭ بىرىنە اينالدىردى. قازاقستاننىڭ الەۋمەتتىك-ەكونوميكالىق سالاداعى تابىستارى تاعىلىم الارلىق.
ناعىز باسشى عانا وسىنداي ناتيجەلەرگە جەتە الادى, بۇل جاعىنان العاندا, نۇرسۇلتان ءابىش ۇلى – ءوز حالقىنىڭ داۋسىز باسشىسى.
پان گي مۋن,
بىرىككەن ۇلتتار ۇيىمىنىڭ باس حاتشىسى:
– الەمدىك جانە ءداستۇرلى دىندەر ليدەرلەرىنىڭ ءىىى سەزىنە قاتىسۋشىلاردىڭ بارلىعىنا سالەم جولداۋ مەن ءۇشىن زور ابىروي. مەن پرەزيدەنت ن.نازارباەۆقا جانە قازاقستان رەسپۋبليكاسىنىڭ ۇكىمەتىنە وسىنداي اسا قاجەتتى ۇنقاتىسۋعا بۇكىل الەمنەن ءدىني ليدەرلەردى جيناعانى ءۇشىن العىس ايتامىن.
تولەرانتتىلىق, قۇرمەت, بۇكىل ادامزاتتىڭ ءوزارا تۇسىنىستىگى مەن تەڭ قۇقىلى بولۋى سياقتى جالپىادامزاتتىق قۇندىلىقتار بارلىق ءدىننىڭ وزەگى بولىپ تابىلادى, سونداي-اق, ول ادام قۇقىقتارىنىڭ بۇكىلالەمدىك دەكلاراتسياسىندا بەكىتىلگەن. قانداي بولماسىن ءدىن جولىن ۇستاناتىن ادامداردى بەيبىتشىلىككە جانە لايىقتى ومىرگە ۇمتىلىس بىرىكتىرەدى. ۇلكەن ءبىر وتباسىنىڭ مۇشەلەرى سياقتى ءبىز ورتاق پروبلەمالارمەن جانە قاۋىپ-قاتەرلەرمەن بەتپە-بەت كەلەمىز, بارلىق دىنگە سەنۋشىلەر ورتاق ىسكە ءوز ۇلەسىن قوسقان جاعدايدا عانا ولاردى ەڭسەرۋ مۇمكىن بولماق.
پاك كىن حە,
كورەيا رەسپۋبليكاسىنىڭ پرەزيدەنتى:
– قازاقستان ورتالىق ازياداعى ەكونوميكاسى الەۋەتتى ءارى بيزنەس احۋالعا ەڭ قولايلى ەل رەتىندە الەمدى مويىنداتىپ وتىر. بۇل ورايدا, «قازاقستان-2050» ستراتەگياسى ەلدى ودان ءارى دامىتۋدىڭ وتە دۇرىس تاڭدالعان جولى بولىپ تابىلادى. ءبىز ءسىزدىڭ ەلمەن ىنتىماقتاسۋعا نيەتتىمىز جانە وسى باعىتتاعى سەرىكتەستىكتىڭ ءتيىمدى بولاتىنىنا سەنىمدىمىز.
وتكەن عاسىردا قازاقتار قيىن-قىستاۋ كەزەڭدى باستارىنان وتكەرىپ جاتقانىنا قاراماستان, ورتالىق ازياعا كۇشتەپ قونىستاندىرىلعان كورەيلەرگە ۇلكەن كومەك, بارىنشا قولداۋ كورسەتتى. ال قازىر كورەيلەر قازاقستان قوعامىنىڭ بولىنبەس بولشەگىنە اينالىپ وتىر. بۇل جەردە قازاقستاندىقتاردىڭ سول اشىق-جارقىن مىنەزى كورەيلەردىڭ ەكونوميكالىق دامۋىنداعى تاجىريبەسىمەن ۇشتاسسا, ءبىز ەلدەرىمىزدىڭ بولاشاقتاعى ءوسىپ-وركەندەۋىن جاقىنداتا الار ەدىك.
يسلام كاريموۆ,
وزبەكستان رەسپۋبليكاسىنىڭ پرەزيدەنتى:
– وزبەكستاندا ءسىزدى قازاقستان تاريحىنىڭ بەتبۇرىس ساتىندە ساياسي, ەكونوميكالىق ءجانە الەۋمەتتىك رەفورمالاردىڭ بارىسىندا باسشىلىق ەتكەن اسا كورنەكتى مەملەكەت قايراتكەرى دەپ بىلەدى.
وزبەكستاندا ءسىزدى ءبىزدىڭ حالقىمىزدىڭ ناعىز دوسى دەپ بىلەدى, ءارى ءوزىڭىزدىڭ وزبەك-قازاق قاتىناستارىنىڭ سەرپىندى دامۋىنا قوسقان ۇلەسىڭىز باعا جەتكىسىز دەپ بىلەدى.
ءبىزدىڭ مەملەكەتتەرىمىز بەن حالىقتارىمىز اراسىنداعى قارىم-قاتىناستار ءاردايىم تاريحىمىزدىڭ, مادەنيەتىمىزدىڭ, ءتىلىمىز بەن ءدىنىمىزدىڭ جاقىندىعىنا نەگىزدەلىپ كەلەدى. ءبىز عاسىرلار بويى قاتار ءومىر سۇردىك, ءومىر ءسۇرىپ كەلەمىز جانە ماڭگىلىك بىرگە ءومىر سۇرە بەرەتىنىمىزگە سەنىمىم كامىل.
شەيح ابداللا
بەن ابدەل مۋحسين ات-تۋركي,
بۇكىل دۇنيەجۇزىلىك يسلام ليگاسىنىڭ باس حاتشىسى:
– قازاقستان رەسپۋبليكاسىنىڭ پرەزيدەنتى – جوعارى مارتەبەلى نۇرسۇلتان نازارباەۆ!
سەزدىڭ جوعارى مارتەبەلى قادىرمەندى قاتىسۋشىلارى مەن مەيماندارى! بارىڭىزگە تىنىشتىق ءتىلەيمىن, بارشاڭا اللانىڭ راحىمى مەن نۇرى جاۋسىن!
قازاقستان رەسپۋبليكاسىنىڭ پرەزيدەنتى جوعارى مارتەبەلى نۇرسۇلتان نازارباەۆقا مادەني جانە ءدىني ساناتتىڭ ماڭدايالدى وكىلدەرىن الەمدىك جانە ءداستۇرلى ۇلتتىق دىندەردىڭ وسى سەزىنە شاقىرعانى ءۇشىن العىسىمدى ايتامىن.
سەزدىڭ قورىتىندىلارى مەن ناتيجەلەرى بەلگىلى ءبىر وركەنيەتتىڭ قۇرامىنداعى بەلگىلى ءبىر ءدىندى ۇستاناتىن سان ءتۇرلى قاۋىمداستىقتار مەن توپتاردىڭ اراسىنداعى ءوزارا ءىس-قيمىلدىڭ جاڭا كوكجيەكتەرىن اشادى دەگەن ۇمىتتەمىن.