پرەزيدەنت قاسىم-جومارت توقاەۆتىڭ ايتۋىنشا, وتاندىق عىلىم سالاسى قازاقستان ەكونوميكاسىنىڭ ماڭىزدى بولىگىنە اينالۋى ءتيىس, دەپ حابارلايدى Egemen.kz.
قاسىم-جومارت توقاەۆ الەم ەلدەرىندەگى عىلىمعا قاتىستى تۇجىرىمدامالار مەن ولاردىڭ عىلىمداعى جەتىستىگىن مىسالعا كەلتىرىپ, قازاقستان عىلىمىن ىلگەرلەتۋ ءۇشىن قازىرگى مودەلگە اۋقىمدى وزگەرىستەر ەنگىزۋ قاجەت ەكەنىەن العا تارتتى.
«عىلىم سالاسى ۇلتتىق ەكونوميكانى جاڭعىرتۋ ىسىندە اسا ماڭىزدى ءرول اتقارۋعا ءتيىس. مىسالى, قىتايدا عىلىمعا نەگىزدەلگەن قوعام اتتى پارتيا ماقۇلداعان تۇجىرىمداما بار. ياعني, قىتايدا عىلىمعا نەگىزدەلگەن قوعام تۇجىرىمداماسى بار. پارتيا جانە ۇكىمەتتىڭ بارلىق ماڭىزدى شەشىمدەرى مىندەتتى تۇردە عىلىمي ساراپتامادان ءوتۋى كەرەك. مۇنىڭ ءبارى قازاقستان عىلىمىنىڭ دامۋ مودەلىن تۇبەگەيلى جاڭارتاتىن ۋاقىت كەلگەنىن كورسەتەدى.
سوندىقتان قازاقستان عىلىمىن دامىتۋ ۇلگىسىن تۇبەگەيلى وزگەرتۋ – اسا ماڭىزدى مىندەت. قاجەت بولسا, كەلەشەكتە عىلىمي شەشىمدەر مەن تسيفرلاندىرۋدى نەگىزگە الاتىن پاراساتتى ەكونوميكا مودەلىنە كوشۋ كەرەك بولادى. اقش, قىتاي, سينگاپۋر, جاپونيا, وڭتۇستىك كورەيا, تۇركيا ەلدەرىندەگى تەحنولوگيالىق سەرپىلىستى بۇكىل الەم بىلەدى. ولار عىلىمنىڭ اشىق نارىقتىق ۇلگىسىنە كوشكەننەن كەيىن زور جەتىستىككە جەتتى», دەدى پرەزيدەنت.
سونىمەن قاتار, مەملەكەت باسشىسى عىلىمنىڭ مەملەكەت قارجىسىنا تاۋەلدىلىگىنەن ارىلىپ, بيزنەس باعىتىنا يكەمدەلۋى قاجەت ەكەنىن جانە بۇل سالاعا ينۆەستورلاردى تارتۋدىڭ ماڭىزدى ەكەنىن ايتتى.
«مۇنداي ۇلگىنىڭ بىرقاتار ەرەكشەلىگى بار. ەڭ الدىمەن, عىلىمعا قارجى سالۋعا جەكە ينۆەستورلاردى ىنتالاندىرۋ كەرەك. تەحنولوگيا سەكتورى الىپ-ساتۋدان گورى پايدالى ءارى ومىرشەڭ بيزنەس ەكەنىنە كاسىپكەرلەردىڭ كوزىن جەتكىزۋ قاجەت. سوندا عانا عىلىم مەن بيزنەس اراسىندا ءوزارا ءتيىمدى ارىپتەستىك ورنايدى», دەدى ەل پرەزيدەنتى.