وڭدەۋ ونەركاسىبىن يننوۆاتسيا مەن جوعارى تەحنولوگيا عانا جەدەل دامىتادى. عىلىمي جاڭالىقتاردى وندىرىستە پايدالانۋ ءۇشىن عىلىمدى جان-جاقتى دامىتاتىن جاڭا زاڭ قابىلداۋ تۋرالى پرەزيدەنت پىكىرى كوكەيىمىزدەگى ءبىراز ويعا قوزعاۋ سالدى.
قازىرگى «عىلىم تۋرالى» زاڭنىڭ شيكى تۇستارى جونىندە وسىعان دەيىن ءبىراز ايتتىق, اتالعان باعىتتا كوكەيگە قونىمدى ۇسىنىسى بار ارىپتەستەرىمدى دە بىلەمىن. وسى ورايدا عىلىم ناتيجەلەرىن كوممەرتسيالاندىرۋ بويىنشا ويىمدى ايتا كەتەيىن.
عىلىمي جەتىستىكتەردىڭ ناتيجەلەرىن وندىرىسكە ەنگىزۋ ءۇشىن ەڭ الدىمەن وڭىرلەردە تەحنوپاركتەر اشىلۋى كەرەك. ول تەحنوپاركتەرگە جەر قويناۋىن يگەرۋشىلەر تابىسىنىڭ 1 پايىزى ەسەبىنەن ءارتۇرلى باعىت بويىنشا كوممەرتسيالاندىرۋعا قولداۋ كورسەتەتىن كوميسسيالار قۇرىلىپ, ناقتى ءبىر عىلىم سالاسىنان عىلىمي جەتىستىكتەرگە جەتكەن, ءوز تەحنولوگيالارىن وندىرىسكە ەنگىزگىسى كەلەتىن عالىمدارعا ارنايى ينفراقۇرىلىممەن تولىق قامتاماسىز ەتىلگەن عيماراتتار بولىنسە, اياعىنا تۇرىپ كەتكەنشە تەحنوپارك ەسەبىنەن قۇقىقتىق جانە ەكونوميكالىق كومەك كورسەتۋ جولدارى قاراستىرىلسا, قۇبا-قۇپ بولار ەدى. ويتكەنى ءبىر عانا سالانى بىلەتىن عالىم ءوزىنىڭ زەرتتەۋ ناتيجەلەرىن وندىرىسكە ەنگىزۋدە بيزنەس-جوسپار ازىرلەۋ, قۇقىقتىق ماسەلەلەر سەكىلدى قيىندىقتاردان اسا الماي تۇرالاپ قالادى. ال كوميسسيا قۇرامى تەك شەنەۋنىكتەر ەمەس, ءارتۇرلى سالا عالىمدارىنان, ەكونوميست جانە زاڭگەرلەردەن تۇرعانى ءجون.
تاعى ءبىر ايتا كەتەرلىگى, تەحنوپارك عىلىمي-تەحنيكالىق ساراپتاما ۇلتتىق ورتالىعى جانە ۇلتتىق عىلىمي كەڭەستەن تاۋەلسىز بولۋى قاجەت. بۇل ۇيىمدار عىلىمدى كوممەرتسيالاندىرۋدا قوسىمشا بيۋروكراتيالىق كەدەرگى كەلتىرىپ وتىر. ولاردىڭ جۇمىسى عىلىمي زەرتتەۋلەردى قارجىلاندىرۋ ماسەلەسىمەن شەكتەلۋى كەرەك. ال تەحنوپارك عىلىمي زەرتتەۋ ناتيجەلەرىن قولداۋمەن اينالىسقانى دۇرىس.
عالىمنىڭ زەرتتەۋ ناتيجەلەرى قولداۋ تاۋىپ, قارجىلاندىرىلعاننان كەيىن بەلگىلى ءبىر اينالىمعا جەتكەنشە تەحنوپارك قولداۋ كورسەتىپ, كەيىن ورنىن باسقا ارىپتەسىنە بوساتۋى كەرەك. ونى اشىلعان ءوندىرىستىڭ جىلدىق تابىسىنىڭ بەلگىلى ءبىر دەڭگەيگە جەتۋى, جۇمىس ورىندارىنىڭ اشىلۋى, باسەكەلەستىك ورتاعا دايىندىعى سەكىلدى جولدارمەن ايقىنداۋعا بولادى. ودان بولەك بەلگىلى ءبىر تابىس دەڭگەيىنە جەتكەنشە سالىقتىق جەڭىلدىكتەر قاراستىرۋ تەتىكتەرى شەشىلسە, قازاقستان عىلىمىنىڭ ەكونوميكانى دامىتۋعا قىزمەت ەتەر كەزەڭى جاقىنداي تۇسەر ەدى. ويتكەنى عىلىمي جەتىستىكسىز ەشبىر ەل العا جىلجىمايدى.
نۇربول اپپازوۆ,
حيميا عىلىمدارىنىڭ كانديداتى
قىزىلوردا