گرەك-ريم كۇرەسى شەبەرلەرى استاناداعى جاقسىلىق ۇشكەمپىروۆ اتىنداعى جەكپە-جەك سارايىندا ءوتىپ جاتقان ازيا چەمپيوناتىن قورىتىندىلادى. بايراقتى باسەكە بارىسىندا جەرلەستەرىمىز سەگىز جۇلدە ولجالاعانىمەن, بۇل كورسەتكىشكە كوڭىلىمىز تولدى دەپ ايتا المايمىز. ويتكەنى التىن مەدالدىڭ ازدىعىنان جالپىكوماندالىق ەسەپتە ءۇشىنشى ورىندا قالىپ قويدىق. ءبىزدىڭ جىگىتتەرگە قاراعاندا يران مەن قىرعىزستان قۇرامالارى الدەقايدا جاقسى ناتيجە كورسەتتى.
«Egemen Qazaqstan»-نىڭ وتكەن سانىندا ءبىز جارىستىڭ العاشقى كۇنىنىڭ قورىتىندىسى جايىندا ەگجەي-تەگجەيلى بايانداعانبىز. كەلەسى كۇنى تاعى بەس سالماق دارەجەسىنىڭ جۇلدەلەرى ساراپقا سالىندى. بوزكىلەمگە شىققان بالۋاندارىمىزدىڭ اراسىنان 72 كگ سالماقتاعى يبراگيم ماگومادوۆتىڭ عانا جەڭىس تۇعىرىنىڭ ەڭ بيىك ساتىسىنا كوتەرىلۋگە كۇش-جىگەرى جەتتى. وسىعان دەيىن 32 جاستاعى ساقا سپورتشى 2020 جىلى نيۋ-دەليدە ۇيىمداستىرىلعان ازيا چەمپيوناتىندا كۇمىس مەدال يەلەنگەن ەدى. باسقا پالەندەي تابىسى جوق. ارادا ءۇش جىل وتكەن سوڭ يبراگيم سول كۇمىسىن التىنعا الماستىردى. استاناداعى دودادا ءۇش كەزدەسۋ وتكىزگەن ول بارلىعىندا جەڭىسكە جەتتى. فينالدا يراننىڭ مىقتى سپورتشىسى سادجاد ءالي يمەنتالابفۋمانيدەن باسىم ءتۇستى. ءسويتىپ, ماگومادوۆ ءوزىنىڭ سپورتتىق مانسابىنداعى ەڭ ءىرى تابىسىنا قول جەتكىزدى.
82 كگ سالماق دارەجەسىندە كۇش سىناسقان دياس قالەنوۆ وزبەكستاندىق مۇحامەدقادىر راسۋلوۆ پەن جاپونيالىق يۋيا ماەتانى جولىنان ىعىستىردى. وسى كەزدەسۋلەردە ول وتە ساۋاتتى تاكتيكا قۇرا ءبىلدى. سونىڭ ناتيجەسىندە جەڭىس تويىن تويلادى. بىراق اقتىق سىندا قانداسىمىز قىرعىزستاننىڭ وكىلى اقىلبەك تالانتبەكوۆتەن ايلاسىن اسىرا المادى. نەگىزى ولار تەڭ دارەجەدە ايقاسقان ەدى. الايدا دياسقا قاراعاندا ءبىر ۇپاي ارتىق جيعان اقىلبەكتىڭ اسىعى الشىسىنان ءتۇستى.
67 كگ سالماقتاعى المات كەبىسباەۆقا استانادا ايرىقشا سەنىم ارتىلعان ەدى. قازاقستان قۇراماسىنىڭ كاپيتانى ءار باسەكەدە بارىن سالدى. تايپەيلىك حون يۋ چەن مەن ۇندىستاندىق اشۋ اشۋدى جولىنان ىعىستىرىپ, جارتىلاي فينالدا ابرور اتاباەۆپەن جولىقتى. 35 جاستاعى ارداگەر بالۋانىمىز 21 جاستاعى وزبەكتىڭ جاس جولبارىسىن جەڭە المادى. ودان كەيىن تاجىكستاندىق فيرۋز ميرزورادجابوۆتى ۇتقان كەبىسباەۆ قولا مەدالدى موينىنا ءىلدى. ارينە, بۇل كورسەتكىشكە قازاق بالۋانىنىڭ دا, باسقالاردىڭ دا كوڭىلى تولماعانى انىق. بىراق الماتقا وكپە ايتقان ەشكىم بولمادى. وسىلايشا, ارداگەر سپورتشىمىز اتالعان جارىستاعى التىنشى جۇلدەسىنە قول جەتكىزدى. بۇعان دەيىن كەبىسباەۆ سارى قۇرلىقتىڭ باستى دوداسىندا ەكى التىن جانە ءۇش كۇمىس مەدال ەنشىلەگەن ەدى.
97 كگ سالماق دارەجەسىندە كۇش سىناسقان ولجاس سىرلىباي دا ءدال سول مەجەدەن كورىندى. دۇيسەنبىدە تەك 60 كگ سالماقتا سىنعا تۇسكەن ەرنار فيداحمەتوۆ قانا جۇلدەسىز قالدى. ناتيجەسىندە, 1 التىن, 2 كۇمىس جانە 5 قولانى يەلەنگەن قازاقستاننىڭ گرەك-ريم كۇرەسى شەبەرلەرى جالپىكوماندالىق ەسەپتە ءۇشىنشى ورىنعا تابان تىرەدى.
استانادا وتكەن ازيا چەمپيوناتىندا يران قۇراماسى الدىنا جان سالمادى. ولار 5 التىن, 2 كۇمىس جانە 1 قولانى ولجالادى. بۇل ناتيجە ەشكىمدى تاڭداندىرعان جوق. سەبەبى بۇگىنگى تاڭدا پارسى ەلىنىڭ پەحلەۆاندارىمەن سارى قۇرلىقتاعى ەشبىر كوماندا تەڭەسە المايدى. الاقانداي عانا جەرى, جەتى ميلليونعا جەتەر-جەتپەس حالقى بار قىرعىزستاننىڭ گرەك-ريم كۇرەسى شەبەرلەرى بۇل جولى دا كەرەمەت ونەر كورسەتتى. بۇعان دەيىن دە سول ەلدىڭ اقجول ماحمۇدوۆ پەن جولامان شارشەنبەكوۆ سىندى سەركە ۇلدارى وزدەرىنىڭ تەڭدەسسىز ونەرلەرىمەن تورتكۇل دۇنيە جانكۇيەرلەرىن تامساندىرىپ جۇرگەن ەدى. ەندى ولاردىڭ قاتارىنا 82 كگ سالماقتاعى اقىلبەك تالانتبەكوۆ قوسىلدى. ءبىر كەرەمەتى, ولاردىڭ بارلىعى دا – 23 جاستاعى ورىمدەي جاستار. سول ءۇش قۇرداس استانادا قارسى كەلگەندەردى قوعاداي جاپىرىپ, التىن مەدالدى الاتاۋدىڭ ارعى بەتىنە الىپ كەتتى. ودان بولەك, ايىر قالپاقتى اعايىندارىمىز تاعى 1 كۇمىس پەن 4 قولانى ولجالادى. ودان كەيىنگى ساتىلارعا وزبەكستان (1 التىن+1 كۇمىس+1 قولا), جاپونيا (0+1+4), ءۇندىستان (0+1+3), قىتاي (0+1+2) جانە وڭتۇستىك كورەيا (0+1+0) قۇرامالارى جايعاستى.
ازيا چەمپيوناتىنىڭ جەڭىمپازدارى مەن جۇلدەگەرلەرى
55 كگ: 1. پويا سۋلات داد مارز (يران), 2. رۋپين رۋپين ء(ۇندىستان), 3. يحتيەر بوتيروۆ (وزبەكستان) مەن امانعالي بەكبولاتوۆ (قازاقستان).
60 كگ: 1. جولامان شارشەنبەكوۆ (كىرگىزستان), 2. حانجە چۋنگ (وڭتۇستىك كورەيا), 3. مايتو كاۋانا (جاپونيا) مەن ليگۋو چاو (قىتاي).
63 كگ: 1. يمان حوسەين حۋن موحاممادي (يران), 2. شەرمۇحامماد شاريبجانوۆ (وزبەكستان), 3. مۇحامەدالي مامىربەك (قازاقستان) پەن نيرادج نيرادج ء(ۇندىستان).
67 كگ: 1. ابرور اتاباەۆ (وزبەكستان), 2. كەتارو سوگابە (جاپونيا), 3. المات كەبىسباەۆ (قازاقستان) پەن راززاك بەيشەكەەۆ (قىرعىزستان).
72 كگ: 1. يبراگيم ماگومادوۆ (قازاقستان), 2. سادجاد ءالي يمەنتالابفۋماني (يران), 3. ۆيكاس ۆيكاس ء(ۇندىستان) پەن ءادىلحان نۇرلانبەكوۆ (قىرعىزستان).
77 كگ: 1. اقجول ماحمۇدوۆ (قىرعىزستان), 2. ءامين ياۆار كاۆيانينەدجاد (يران), 3. ريۋ ليۋ (قىتاي) مەن كوداي ساكۋرابا (جاپونيا).
82 كگ: 1. اقىلبەك تالانتبەكوۆ (قىرعىزستان), 2. دياس قالەن (قازاقستان), 3. يۋيا ماەتا (جاپونيا) مەن اليرەزا ازيزحۋن موحماديپياني (يران).
87 كگ: 1. ناسەر گاسەم اليزادە (يران), 2. نۇرسۇلتان تۇرسىنوۆ (قازاقستان), 3. كۋمار سۋنيل ء(ۇندىستان) مەن جالعاسبەك بەردىمۇراتوۆ (وزبەكستان).
97 كگ: 1. مەحدي باليحامزەدە (يران), 2. ۋزۋر جۋزۋپبەكوۆ (قىرعىزستان), 3. ولجاس سىرلىباي (قازاقستان) مەن يۋتا نارا (جاپونيا).
130 كگ: 1. ءامين ميرزازادە (يران), 2. لينجە مەنگ (قىتاي), 3. ءالىمحان سىزدىقوۆ (قازاقستان) پەن رومان كيم (قىرعىزستان).