قادىر» ءسوزى «ۇكىم ءتۇنى» ماعىناسىن بەرەدى. دەمەك, قادىر ءتۇنى – اللانىڭ تاعدىردى ۇكىم ەتەتىن ءتۇنى.
قۇراندا: «ول كەشتە بارلىق حيكمەتتى ىستەر ايىرىلادى», – دەگەن («دۋحان» سۇرەسى, 4-ايات). قاتادا: «بۇل تۇندە كەلەسى جىلعى ىستەردىڭ تاعدىرى جازىلادى», – دەيدى. «قادىر» ءسوزىنىڭ تاعى ءبىر ماعىناسى «ابىروي, بەدەل». مۇنداي جوعارى دارەجەگە لايىق بولۋىنىڭ سەبەبى, بۇل ءتۇننىڭ قادىر-قاسيەتى مىڭ ايدان دا قايىرلى. «قادىر ءتۇنى مىڭ ايدان دا ارتىق», – دەپ «قادىر» سۇرەسىندە باياندالادى. رامازان كەلگەندە, اللا ەلشىسى (وعان اللانىڭ سالاۋاتى مەن سالەمى بولسىن): «راسىندا, سەندەرگە بۇل اي كەلدى! وندا مىڭ ايدان دا قايىرلى ءبىر ءتۇن بار. سوندا كىم ول ءتۇنى بەيقامدىق تانىتسا, ونىڭ بارلىق يگىلىگىنەن قۇر قالادى. ال ونىڭ بارلىق يگىلىگىنەن تەك ناعىز ماقرۇم ادام عانا ايىرىلىپ قالادى!» – دەپ جەتكىزگەن.
پايعامبار (وعان اللانىڭ سالاۋاتى مەن سالەمى بولسىن) ءوزىنىڭ كوپتەگەن حاديستەرىندە قادىر ءتۇنىن رامازان ايىنىڭ سوڭعى ون كۇندىگىندە جانە سول ون كۇندىكتىڭ تاق تۇندەرىنەن ىزدەۋ كەرەك دەگەن.
ياعني قادىر ءتۇنى رامازان ايىنىڭ 21, 23, 25, 27, 29 كۇندەرى بولۋى ابدەن مۇمكىن. تاق تۇندەرگە بايلانىستى ساحابا ابدۋللا يبن وماردان (اللا وعان رازى بولسىن) بىرنەشە جولمەن جەتكەن ساحيح حاديسىندە پايعامبار (وعان اللانىڭ سالاۋاتى مەن سالەمى بولسىن): «قادىر ءتۇنىن رامازاننىڭ 27-ءتۇنى ىزدەڭدەر», دەگەن (بۇحاري, ءمۇسليم). وسى سىندى حاديستەرگە سۇيەنگەن كوپتەگەن عالىمدار, اسىرەسە ورتا ازيا مۇسىلمان جۇرتى وسى ءتۇنى قادىر ءتۇنى بولۋى ابدەن مۇمكىن دەگەن بولجام جاساعان. الايدا, قادىر ءتۇنىنىڭ ناقتى قاي ءتۇن ەكەندىگى تەك ءبىر اللاعا عانا ايان. پايعامبار (وعان اللانىڭ سالاۋاتى مەن سالەمى بولسىن) رامازاننىڭ سوڭعى ونكۇندىگىندە قۇلشىلىققا ەرەكشە بەرىلىپ, يعتيكافقا كىرەتىن ەدى دەگەن. يعتيكاف – قۇلشىلىق ماقساتىمەن مەشىتتە وقشاۋلانۋ. ايشا انامىزدىڭ (اللا وعان رازى بولسىن) سوزدەرىن ەسكەرسەك, رامازان ايىنىڭ سوڭعى ون كۇنىندە, اسىرەسە تاق تۇندەرىندە قۇلشىلىققا ەرەكشە دەن قويعان ءجون. سوندا سوڭعى ونكۇندىكتىڭ ىشىندەگى تاق تۇندەرىنىڭ بىرىنە سايكەس كەلۋ ىقتيمالدىعى جوعارى بولادى.
ال بيىل قادىر ءتۇنى 17 ساۋىردەن 18 ساۋىرگە قاراعان تۇنگە بەلگىلەندى.