جۋىردا عانا ەلباسى نۇرسۇلتان نازارباەۆ ءوڭىر جۇرتشىلىعىمەن جۇزدەسۋ وتكىزگەن ەتنواۋىلداعى ون ەكى قانات اق وردادا وبلىستىق قازاقستان حالقى اسسامبلەياسىنىڭ حح سەسسياسى ءوتتى. سەسسيا جۇمىسىن اشقان ءوڭىر باسشىسى بەردىبەك ساپارباەۆ مەملەكەت باسشىسى جۇمىس ساپارىندا ايماقتىڭ الەۋمەتتىك-ەكونوميكالىق دامۋىن وڭ باعالاعانىن جەتكىزدى.
– ەلباسىنىڭ ەتنواۋىلداعى كيىز ۇيدە كەزدەسۋ وتكىزۋى بەكەر ەمەس. ءبىر شاڭىراق استىندا تاتۋ-ءتاتتى ءومىر ءسۇرىپ جاتقانىمىز – نۇرسۇلتان نازارباەۆتىڭ ۇلتارالىق كەلىسىمدى نىعايتۋ ساياساتىنىڭ جەمىسى. پرەزيدەنت كەزدەسۋدەن كەيىن ەتنواۋىلدى ارالاپ كورىپ, ءوڭىردەگى ەتنومادەني بىرلەستىكتەردىڭ جۇمىسىنا ريزاشىلىعىن ءبىلدىردى ءجانە بۇل باعىتتاعى جۇمىستاردى جالعاستىرۋدى تاپسىردى, – دەدى ب.ساپارباەۆ.
قازاقستان حالقى اسسامبلەياسىنىڭ ءححى سەسسياسىندا ەلباسى جۇكتەگەن مىندەتتەر مەن تاپسىرمالار اياسىندا شىعىس وڭىرىندە بىرقاتار جوبالار ساتىمەن جۇزەگە اسىرىلىپ كەلەدى. بۇگىندە بارلىق باستامالاردىڭ كىندىگىنە اينالعان ايماقتا العاشقى «دوستىق ءۇيى» قۇرىلىپ, تۇڭعىش رەت ەتنواۋىل سالىنعانى بەلگىلى. سونداي-اق, ەلىمىزدىڭ جەتى ايماعىن قامتىعان «دوستىق كەرۋەنى» شىعىستان باستاۋ الدى. «دوستىق پەن بەيبىتشىلىكتىڭ جول كارتاسى» اكتسياسى, «G-Global» الاڭىندا العاشقى يننوۆاتسيالىق كونفەرەنتسيا ءوتتى. وتكەن جىلى اسسامبلەيانىڭ 2020 جىلعا دەيىنگى دامۋ تۇجىرىمداماسى بەكىتىلدى.
الداعى ءۇش جىل ىشىندە زايسان, ۇلان, اياگوز, كوكپەكتى, ءۇرجار, جارما اۋداندارىندا «دوستىق ۇيلەرىن» اشۋ جوسپارلانىپ وتىر. كورشىلەس رەسەي, موڭعوليا جانە قىتاي ەلدەرىندە ناۋرىز مەيرامى اتاپ ءوتىلىپ, ەلارالىق مادەني بايلانىستار ءورىس الىپ كەلەدى. ءتۇرلى ۇلىستاردىڭ ءتىلى مەن مادەنيەتى وقىتىلاتىن تۇلەۋ مەكتەبى جۇمىس ىستەيدى. اسسامبلەيا جانىنداعى عىلىمي-ساراپتامالىق توبى قىزمەتىنىڭ جۇمىسى ءبىر توبە. وتكەن جىلدان بەرى وڭىردە اسسامبلەيانىڭ ۇيىمداستىرۋىمەن 200 مىڭعا جۋىق ادامدى قامتىعان 1216 ءىس-شارا وتكىزىلدى. «تۋعان ەل – التىن بەسىگىم» اكتسياسىنا ەتنومادەني بىرلەستىكتەردىڭ وكىلدەرى بەلسەنە قاتىسۋدا.
وبلىستىق قازاقستان حالقى اسسامبلەياسىنىڭ مەڭگەرۋشىسى ەركىنبەك ايازباەۆتىڭ ايتۋىنشا, «دوستىق ۇيلەرى» مەن تالداۋ جانە بولجاۋ ينستيتۋتىمەن بىرگە وبلىستاعى ۇلتارالىق جاعدايعا توقساندىق مونيتورينگ جۇرگىزىلىپ تۇرادى. اتالعان زەرتتەۋدىڭ ناتيجەسى كورسەتكەندەي, وڭىردە ەتنوسارالىق احۋال تۇراقتى, ساۋالداماعا تارتىلعان حالىقتىڭ 74 پايىزى ۇلتارالىق كەلىسىمدى ساقتاۋ جونىندەگى مەملەكەتتىك ساياساتتى وڭ باعالايدى.
– بۇگىندە اسسامبلەيانىڭ بارلىق مۇشەلەرىنىڭ الدىنا ەتنومادەني ءبىرلەستىكتەردىڭ جۇمىستارىن جاقسارتۋعا, وبلىستىڭ قالالارى مەن اۋداندارىمەن بايلانىستى دامىتۋ ارقىلى اسسامبلەيا ىقپالىن كەڭەيتۋگە, ازاماتتىق قوعام مەن قازاقستاندىق بىرلىكتى نىعايتۋعا باعىتتالعان مىندەتتەر قويىلدى, – دەدى ە.ايازباەۆ.
بيىل وسكەمەندەگى ەتنواۋىل گرۋزين ۇيىمەن تولىعىپ وتىر. اتالعان ءۇي ەتنومادەني بىرلەستىكتىڭ قارجىسىنا تۇرعىزىلدى. ۇلتتىق ساناقتىڭ مالىمەتى بويىنشا, وڭىردە گرۋزين ۇلتىنىڭ 248 وكىلى تۇرادى. «ولاردىڭ ءوز باستاماسىمەن ەتنواۋىلدان وسىنداي ءۇي سالۋى وزگە ۇلىستارعا دا ۇلگى بولۋى ءتيىس», دەدى ە.ايازباەۆ.
سەسسيا بارىسىندا گلۋبوكوە اۋداندىق «دوستىق ءۇيىنىڭ» ديرەكتورى ماريا پەكۋر, شەمونايحا اۋدانى اكىمىنىڭ ورىنباسارى ولگا بۋلاۆكينا, حالىقارالىق «قازاق ءتىلى» قوعامىنىڭ ۆيتسە-پرەزيدەنتى ورال شارىپباەۆ, س.امانجولوۆ اتىنداعى شقمۋ-ءدىڭ وقىتۋشىسى, وبلىستاعى عىلىمي-ساراپتامالىق توپ مۇشەسى ەلەنا رياكوۆا, سلاۆيان ەتنومادەني بىرلەستىگىنىڭ توراعاسى الەكساندر ياكوۆلەۆ, ەتنومادەني ۇيىمدارداعى جاستاردىڭ اتىنان سەمەيلىك مارينا شين جانە تاعى باسقا ءتۇرلى ۇلت وكىلدەرى تاتۋلىقتى تۋ ەتكەن اۋقىمدى جۇمىستاردىڭ ماڭىزى جونىندە اڭگىمە ءوربىتىپ, ۇسىنىستارىن جەتكىزدى.
دۋمان اناش,
«ەگەمەن قازاقستان».
وسكەمەن.