وتكەن اپتادا الەۋمەتتىك جەلىدە قىزداردىڭ توبەلەسكەنىن كورىپ, جاعامىزدى ۇستادىق. بەينەروليككە قاراپ وتىرساق, بەيادەپ سويلەگەن وقۋشى قىزدار اۋەلى قالاداعى گاراجداردىڭ اراسىندا كەزدەسىپ, ءبىر قىزدى سوققىعا جىققان. ەندى ءبىرى وربىگەن وقيعانى بەينەتاسپاعا جازىپ الىپ جۇرگەن. كەيىن قالاداعى ساۋدا ۇيلەرىنىڭ بىرىندەگى اجەتحانادا توبەلەس تاعى قايتالانادى.
رەسمي مالىمەتتەرگە سۇيەنسەك, كۇدىككە ىلىنگەن قىزداردىڭ ءبىرى ورالحان بوكەي اتىنداعى №44 مەكتەپ-ليتسەيىندە وقىسا, ەندى ءبىرى قالاداعى №5 مەكتەپتىڭ وقۋشىسى. ال وقيعا وسىدان ءبىر اي بۇرىن بولعان ەكەن. «اتالعان وقيعا 1-2 ناۋرىز كۇندەرى بولعان. بۇل فاكتىگە قاتىستى قىلمىستىق كودەكستىڭ 293-بابىنىڭ 2-بولىگى بويىنشا وسكەمەن قالالىق ەرتىس پوليتسيا بولىمشەسىندە قىلمىستىق ءىس تىركەلىپ, سوتقا دەيىنگى تەرگەۋ جۇرگىزىلىپ جاتىر. تەرگەۋگە بايلانىستى وزگە دە مالىمەتتەر جاريا ەتۋگە جاتپايدى», دەپ شىعىس قازاقستان وبلىسى پد ءباسپاسوز قىزمەتى رەسمي مالىمەت بەردى.
الەۋمەتتىك جەلىدە تاراعان بەيرەسمي جازبالاردا شەك جوق. كەيبىر پىكىرلەردىڭ اق-قاراسىن انىقتاۋ ءۇشىن وسكەمەن قالالىق ءبىلىم ءبولىمىنىڭ باسشىسى ساۋلە الاگوزوۆامەن جولىققانبىز. ونىڭ ايتۋىنشا, الەۋمەتتىك جەلىدە جازىلعانداي, كۇدىككە ىلىنگەن ءبىر قىزدىڭ اناسى ءبىلىم بولىمىندە قىزمەت ەتكەنى راس. بولعان وقيعاعا بايلانىستى ول جۇمىستان شىعارىلعانى جانە شىندىق. ال اكەسىنىڭ سىبايلاس جەمقورلىققا قارسى ءىس-قيمىل سالاسىندا قىزمەت ەتەدى دەگەن پىكىردىڭ جالعان اقپارات ەكەنىن رەسمي ورگاندار مالىمدەگەن.
– تىركەلگەن دەرەككە قاتىستى ىسپەن قۇزىرلى ورگاندار اينالىسىپ جاتىر. ءبىزدىڭ تاراپتان جۇرگىزىلىپ جاتقان جۇمىستاردى ايتا كەتسەم, ول مەكتەپتەگى وقۋشىلار مەكتەپىشىلىك قاتاڭ باقىلاۋدا. قۇقىق قورعاۋ ورگاندارى شەشىم شىعارعانعا دەيىن وقۋشىلار ءالى مەكتەپتە, بىلىمدەرىن الىپ جاتىر. جالپى, قالا بويىنشا پروفيلاكتيكالىق جۇمىستار كۇشەيتىلدى. اتا-انالارمەن دە كەزدەسۋلەر وتكىزدىك, – دەيدى س.الاگوزوۆا.
ءبىلىم ءبولىمى باسشىسىنىڭ ايتۋىنشا, جۇرتتى دۇرلىكتىرگەن وقيعاعا №44, №5 مەكتەپتىڭ جانە كوللەدج وقۋشىلارىنىڭ قاتىستارى بار. وقۋشى قىزداردىڭ ءبىرى بۇعان دەيىن دە بۇزاقىلىق جاساپ, تىركەۋگە الىنعان ەكەن. ال باسقالارىنىڭ ۇستىنەن وسىعان دەيىن ارىز-شاعىم تۇسپەگەن.
– بۇزاقىلىق جاساعان وقۋشىمىزدىڭ اكەسى مەملەكەتتىك مەكەمەلەردىڭ بىرىندە كۇزەتشى, ال اناسى بىزدە كادر بولىمىندە قىزمەت ىستەگەن. قازىر ول وسى جاعدايعا بايلانىستى قىزمەتىنەن بوساتىلدى, – دەپ وسكەمەن قالالىق ءبىلىم ءبولىمىنىڭ باسشىسى ساۋلە باۋىرجانقىزى اشىق اقپارات بەردى.
قازىرگى تاڭدا كامەلەت جاسقا تولماعان وقۋشىلارمەن پسيحولوگ ماماندار جۇمىس جۇرگىزىپ جاتىر. قىلمىستىق ءىستىڭ سوڭى قالاي اياقتالارىن سوت شەشەدى. ازىرشە وقۋشىلار بىلىمدەرىن جالعاستىرىپ جاتىر. ورالحان بوكەي اتىنداعى №44 مەكتەپ ديرەكتورى جاڭىل نازارباەۆانىڭ سوزىنشە, بۇزاقىلىق جاساپ, كۇدىككە ىلىنگەن قىز بالا اتالعان مەكتەپتە 1-سىنىپتان باستاپ وقيدى ەكەن.
– ول قىزىمىز ۆولەيبولعا قاتىسادى. وقۋ ۇلگەرىمى جاقسى. قالالىق, وبلىستىق سايىستاردان جۇلدەلى ورىندار العان. بۇل مىنەزىن بىردە-ءبىر رەت بايقاماعان ەدىك. وقيعانى ەستي سالا, مەكتەپىشىلىك ەسەپكە قويدىق. ونىمەن الەۋمەتتىك پەداگوگ, پسيحولوگ, تاربيە ءىسىنىڭ مەڭگەرۋشىلەرى جۇمىس ىستەپ جاتىر. ال وقيعا ساباقتان تىس ۋاقىتتا بولعان. قازىر مۇنداي بۇزاقىلىق ورىن الماۋى ءۇشىن پروفيلاكتيكالىق جۇمىس جۇرگىزىلىپ جاتىر. ءدال قازىر وقۋدان شىعارىپ جىبەرە المايمىز. 9-سىنىپ بىتىرگەن سوڭ قويا بەرەمىز. مۇمكىن وعان دەيىن سوت شەشىمى شىعىپ, جاعداي وزگەرە جاتار. ەڭ باستىسى, سوت ءادىل شەشىم شىعارسىن, – دەيدى №44 مەكتەپتىڭ ديرەكتورى ج.نازارباەۆا.
شىعىس قازاقستان وبلىسى