استاناداعى جاقسىلىق ۇشكەمپىروۆ اتىنداعى جەكپە-جەك سارايىندا كۇرەس تۇرلەرىنەن ازيا چەمپيوناتىنىڭ شىمىلدىعى ءتۇرىلدى. ءدۇبىرلى دودادا 22 مەملەكەتتەن كەلگەن 400-گە تارتا بالۋان باق سىناپ جاتىر. سولاردىڭ اراسىندا ءار جىلدارى وليمپيا ويىندارى مەن الەم چەمپيوناتتارىندا جۇلدە العان ساقا سپورتشىلار دا بار. جارىستى ادەتتەگىدەي گرەك-ريم كۇرەسى شەبەرلەرى باستادى. وكىنىشكە قاراي, العاشقى كۇنى ءزاۋلىم سارايدا قازاق ەلىنىڭ ءانۇرانى شىرقالمادى.
جارىستىڭ العاشقى كۇنى بەس سالماق دارەجەسى بويىنشا ءتۇرلى-ءتۇستى جۇلدەلەر ساراپقا سالىندى. ءبىزدىڭ بالۋاندار اراسىندا ەڭ ۇزدىك كورسەتكىشكە نۇرسۇلتان تۇرسىنوۆ قول جەتكىزدى. 87 كگ سالماقتا سايىسقا تۇسكەن سەمەي ءوڭىرىنىڭ تۋماسى شيرەك فينالدا الەم چەمپيوناتىنىڭ ەكى دۇركىن جۇلدەگەرى, ازيا چەمپيونى, يسلام ىنتىماقتاستىعى ويىندارىنىڭ جەڭىمپازى, وزبەكستاندىق جالعاسباي بەردىمۇراتوۆتى ايقىن باسىمدىقپەن جەڭسە, جارتىلاي فينالدا قۇرلىق بىرىنشىلىگىنىڭ ءۇش دۇركىن كۇمىس جۇلدەگەرى, قىرعىزستاندىق اتابەك ازيزبەكوۆتىڭ تاس-تالقانىن شىعاردى. بىراق شەشۋشى تۇستا تۇرسىنوۆتىڭ ناسەر گاسەم اليزادەگە ءالى جەتپەدى. ازيانىڭ ءۇش دۇركىن چەمپيونى دەگەن اتاعى بار يران سپورتشىسى قانداسىمىزدى ەش قينالماي جەڭدى. بۇل – نۇرسۇلتاننىڭ اتالعان جارىستاعى ءتورتىنشى جۇلدەسى. بۇعان دەيىن ول ءبىر التىن (2014 جىلى), ءبىر كۇمىس (2015 جىلى) جانە ءبىر قولا (2022 جىلى) مەدال يەلەنگەن ەدى.
باستاپقى بەلدەسۋلەرىنىڭ بىرىندە وزبەكستاننىڭ اتاقتى بالۋانى, الەم چەمپيوناتىنىڭ كۇمىس جۇلدەگەرى ارام ۆاردانياننىڭ اياعىن كوكتەن كەلتىرگەندە, 77 كگ سالماقتاعى دەمەۋ جاردىراەۆ استانادا الىسقا شاباتىن شىعار دەپ ويلادىق. الايدا كەلەسى كەزدەسۋىندە ول يراندىق ءامين ياۆار كاۆيانيناجادقا ەسە جىبەرىپ, باس جۇلدە ءۇشىن تالاسۋ مۇمكىندىگىنەن ايىرىلدى. ءۇشىنشى ورىن ءۇشىن تارتىستا ارداگەر بالۋانىمىز قىتايلىق رۋي ليۋگە جول بەرىپ, جەرگىلىكتى جانكۇيەرلەردى جەرگە قاراتتى.
بىلتىرعى ازيا چەمپيوناتىندا كۇمىس مەدالدى موينىنا ىلگەن اسا جەڭىل سالماقتاعى امانعالي بەكبولاتوۆ بۇل جولى ۇزدىك ۇشتىكتى تۇيىندەدى. 63 كگ سالماقتا كۇش سىناسقان مۇحامەتالي مامىربەك تە ءدال سول مەجەدەن كورىندى. بۇرىندارى جاستار اراسىنداعى ءتۇرلى جارىستا جاسىنداي جارقىلداعان دارىندى بالۋاننىڭ بۇل – ەرەسەكتەر سايىسىنداعى العاشقى تابىسى. الىپتارمەن ايقاسقان ءالىمحان سىزدىقوۆ تا قولا جۇلدەنى قاناعات تۇتتى.
ءسويتىپ, جارىستىڭ العاشقى كۇنىن ەلىمىزدىڭ گرەك-ريم كۇرەسى شەبەرلەرى 1 كۇمىس جانە 3 قولا مەدالمەن قورىتىندىلادى. باس جۇلدەنىڭ تورتەۋىن يراننىڭ پەحلەۆاندارى جەڭىپ الدى. ولار – پويا سۋلات داد مارز (55 كگ), يما حوسسەين موحامادي (63 كگ), ناسەر گاسەم اليزادە (87 كگ) جانە ءامين مىرزازادە (130 كگ). تاعى ءبىر التىن مەدال قىرعىزدىڭ باس بالۋانى اقجول ماحمۇدوۆتىڭ (77 كگ) موينىندا جارقىرادى.