استانادا جالاۋى جەلبىرەگەن شاحماتتان 17-ءشى الەم چەمپيوناتىنىڭ العاشقى جارىس كۇنى ءوز مارەسىنە جەتتى. بىلتىرعى ۇمىتكەرلەر ءتۋرنيرىنىڭ جەڭىمپازى يان نەپومنياششي مەن مادريدتەگى دودانىڭ ەكىنشى ورىن يەگەرى دين ليجەن اراسىندا الەم چەمپيونى اتاعى ءۇشىن ءوتىپ جاتقان باسەكەنىڭ العاشقى پارتياسى بەس ساعاتقا جالعاسىپ, 49 جۇرىستەن كەيىن تەڭ اياقتالدى.
چەمپيوناتتىڭ تۇساۋكەسەر ماتچىنداعى العاشقى سالتاناتتى ءجۇرىستى مادەنيەت جانە سپورت ءمينيسترى اسحات ورالوۆ پەن حالىقارالىق شاحمات فەدەراتسياسىنىڭ پرەزيدەنتى اركادي دۆوركوۆيچ جاسادى. كەيىننەن الەمنىڭ ەڭ تاڭداۋلى ەكى گروسسمەيستەرى 14 ماتچقا جالعاساتىن چەمپيوناتتاعى باسەكەلەرىن باستادى.
ءبىر كۇن بۇرىن العاش رەت روبوتتىڭ كومەگىمەن جۇرگىزىلگەن جەرەبە تارتۋ راسىمىندە ءبىرىنشى پارتيانى يان نەپومنياششي اق تاستارمەن باستايتىنى بەلگىلى بولعان ەدى. ءسويتىپ الەم چەمپيوناتىن اق تاستارمەن باستاپ بەرگەن رەسەيلىك شاحماتشى يان نەپومنياششي قانشا جەردەن ساۋاتتى ءجۇرىس جاساپ, ماتچ بويى تاباندى ويىن كورسەتكەنىمەن, قارا تاسپەن ويناعان قىتايلىق دين ليجەندى قاپى قالدىرا المادى. الەمدىك رەيتينگتە ءۇشىنشى ساتىعا جايعاسقان د.ليجەن ساۋاتتى قورعانىپ, قارسىلاسىنا ەش مۇمكىندىك بەرگەن جوق. ناتيجەسىندە, ءبىرىنشى جارىس كۇنىندە جەڭىمپاز انىقتالعان جوق.
ويىننان كەيىنگى ءباسپاسوز ءماسليحاتىندا دين ليجەن ماتچ الدىندا ءوزىن ازداپ ىڭعايسىز سەزىنگەنىن جانە العاشقى باسەكەگە ەشقانداي جوسپارسىز كەلگەنىن ايتتى. سونداي-اق ول ءبىرىنشى ويىن كۇنى بولعاندىقتان ىشكى ەموتسياسىمەن ءبىراز ارپالىسقانىن دا جاسىرعان جوق.
«كەزدەسۋدىڭ باستاپقى بولىگىندە جاقسى وينادىم دەپ ويلايمىن. الەم چەمپيوناتىنداعى العاشقى ماتچ بولعان سوڭ با ازداپ قوبالجۋ بولدى. دەسە دە بۇگىنگى ويىنىما كوڭىلىم تولادى», دەدى ول.
ال رەسەيلىك شاحماتشى يان نەپومنياششي ءباسپاسوز جيىنىندا چەمپيوناتتاعى تۇساۋكەسەر كەزدەسۋىنە كوڭىلى تولماعانىن مالىمدەسە دە, تەڭ ناتيجەگە رازى ەكەنىن ايتتى.
كەشە شاحماتشىلار الەم چەمپيوناتىنداعى ەكىنشى ماتچىن وتكىزدى. سپورتشىلار بۇگىن ءبىر كۇن دەمالىپ, كەيىنگى باسەكەلەرىنە دايىندالادى. جاھاندىق دودانىڭ ەرەجەسىنە سايكەس, ويىنشىلارعا ءار 2 تۋردان كەيىن ءبىر كۇندىك دەمالىس بەرىلەدى. 14 ماتچقا جالعاساتىن الەم بىرىنشىلىگىنىڭ ويىندارى ەلورداداعى St. Regis Astana قوناقۇيىندە ءوتىپ جاتىر. ماتچتار استانا ۋاقىتى بويىنشا ساعات 15.00-دە باستالدى.
Freedom Holding Corp كومپانياسىنىڭ قولداۋىمەن ءوتىپ جاتقان الەم چەمپيوناتى 1 مامىرعا دەيىن جالعاسادى. وسى ۋاقىت ارالىعىندا العاش بولىپ 7,5 بالل جيناعان شاحماتشى جەڭىمپاز اتانادى. ەگەر تەڭ تۇسسە, باسەكە تاي-برەيككە دەيىن جالعاسادى.