قازاقستان پرەزيدەنتى قاسىم-جومارت توقاەۆ پەن ازەربايجان پرەزيدەنتى يلحام اليەۆ كەڭەيتىلگەن قۇرامدا كەلىسسوزدەر جۇرگىزدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى ەكى ەل اراسىنداعى ىنتىماقتاستىقتى نىعايتۋ ءۇشىن ازەربايجان پرەزيدەنتىنىڭ بۇل ساپارى ەرەكشە ماڭىزعا يە ەكەنىن اتاپ ءوتتى.
ء«بىز بىلتىر ستراتەگيالىق قاتىناستاردى نىعايتۋ جانە وداقتاستىق ىنتىماقتاستىقتى تەرەڭدەتۋ تۋرالى دەكلاراتسياعا, سونداي-اق ىنتىماقتاستىقتى دامىتۋدىڭ 2026 جىلعا دەيىنگى كەشەندى باعدارلاماسىنا قول قويدىق. بۇگىن تاعى بىرقاتار ماڭىزدى قۇجات قابىلدانادى. سونىمەن قاتار ءسىزدىڭ بۇگىنگى ساپارىڭىز اياسىندا ىنتىماقتاستىعىمىزدىڭ ساياسي تۇعىرناماسىنا تىڭ سەرپىن بەرەتىن جوعارى مەملەكەتارالىق كەڭەس قۇرامىز. بۇل ەكىجاقتى قاتىناستارعا تىڭ سەرپىن بەرەتىنى ءسوزسىز», دەدى پرەزيدەنت.
قاسىم-جومارت توقاەۆتىڭ ايتۋىنشا, ەكى ەل اراسىنداعى تاۋار اينالىمى 40 پايىزعا ارتىپ, جارتى ميلليارد دوللارعا جەتتى.
«ساۋدا-ەكونوميكالىق ىنتىماقتاستىعىمىزدىڭ ايتارلىقتاي ىلگەرىلەپ كەلە جاتقانىنا كوڭىل تولاتىنىن ايتقىم كەلەدى. بۇگىن اتاپ وتكەنىمىزدەي, تاۋار اينالىمى 40 پايىزعا ارتىپ, جارتى ميلليارد دوللارعا جەتتى. بۇل ۇلكەن ناتيجە دەپ ويلايمىن. ەكونوميكالىق الەۋەتىمىز تولىق پايدالانا وتىرىپ, بۇل كورسەتكىشتى 1 ميلليارد دوللارعا دەيىن جەتكىزەتىنىمىزگە سەنىمدىمىن. بۇل ءۇشىن بىزدە ەنەرگەتيكا, كولىك, لوگيستيكا, IT, اۋىل شارۋاشىلىعى, ونەركاسىپ جانە تاعى باسقا سالالاردا ايتارلىقتار رەزەرۆتەر بار», دەدى مەملەكەت باسشىسى.
كەلىسسوزدەر بارىسىندا قوس ەلدىڭ مادەنيەت كۇندەرىن وتكىزۋ ماسەلەسى تالقىلاندى.
«ەكى ەلدىڭ مادەني ونكۇندىگىن وتكىزۋ تۋرالى ۋاعدالاستىقتى ەرەكشە اتاپ وتكىم كەلەدى. بيىل ازەربايجاندا قازاقستاننىڭ مادەنيەت كۇندەرى وتەدى. بۇگىن ءبىز قۇرمەتتى ازەربايجان پرەزيدەنتىمەن بىرگە كورنەكتى مەملەكەت قايراتكەرى گەيدار اليەۆ اتىنداعى كوشەنى اشامىز. بۇل يگى شارا ازەربايجان حالقىنىڭ ءبىرتۋار پەرزەنتىنىڭ ءجۇز جىلدىعىنا وراي وتكىزىلىپ وتىر. ەلدەرىمىزدىڭ شىنايى دوستىعى مەن ءوزارا قولداۋىنىڭ تاعى ءبىر ايقىن دالەلى – قازاق حالقىنىڭ ازەربايجانعا تارتۋى فيزۋلي قالاسىنداعى قۇرمانعازى اتىنداعى بالالار شىعارماشىلىق ورتالىعى. بۇل نىساننىڭ قۇرىلىسى قارقىندى ءجۇرىپ جاتقانى جونىندە ماعان مالىمدەدى. وسى ماڭىزدى نىساننىڭ ىسكە قوسىلۋىن جۋىق ارادا كورە الامىز دەپ ويلايمىن. ءبىز گۋمانيتارلىق بايلانىستاردى جان-جاقتى دامىتىپ, ورتاق رۋحاني جانە مادەني قۇندىلىقتاردى بايىتۋعا نيەتتىمىز», دەدى قاسىم-جومارت توقاەۆ.
بۇل رەتتە يلحام اليەۆ قاسىم-جومارت توقاەۆقا قازاقستانعا رەسمي ساپارمەن شاقىرعانى ءۇشىن تاعى دا العىس ايتىپ, قوس ەلدىڭ حالقى ءبىر-بىرىنە باۋىر رەتىندە قارايتىنىن جەتكىزدى.
«ەڭ الدىمەن, قازاقستانعا رەسمي ساپارمەن شاقىرعانىڭىز ءۇشىن تاعى دا العىس ايتامىن. باۋىرلاس قازاق جەرىنە كەلگەنىمە قۋانىشتىمىن. ءبىزدىڭ قارىم-قاتىناسىمىز نىعايىپ كەلەدى. حالىقتارىمىزدىڭ اراسىنداعى بايلانىستىڭ تاريحى تەرەڭ ءارى ءبىز ءاردايىم ءبىر-بىرىمىزگە باۋىر رەتىندە قارايمىز. بۇگىن وسى بەرىك ىرگەتاستىڭ نەگىزىندە كەلەشەگىمىزدى بىرگە قۇرىپ جاتىرمىز. ءبىز بۇعان دەيىن تالقىلاعان ىنتىماقتاستىقتىڭ بارلىق سالاسىنىڭ الەۋەتى مول», دەدى ازەربايجان پرەزيدەنتى.
كەڭەيتىلگەن جيىندا گۋمانيتارلىق سالاداعى ىنتىماقتاستىق ماسەلەسى كەڭىنەن تالقىلاندى. يلحام اليەۆتىڭ ايتۋىنشا, قازاقستاننىڭ ازەربايجانداعى, سونداي-اق ازەربايجاننىڭ قازاقستانداعى مادەنيەت كۇندەرىنىڭ ۇيىمداستىرىلۋى ەكى تاراپ اراسىنداعى قارىم-قاتىناستى ودان ءارى نىعايتۋعا سەپتىگىن تيگىزەدى.
«گۋمانيتارلىق سالاداعى ىنتىماقتاستىقتىڭ ايرىقشا ماڭىزدى ەكەنىن ايتا كەتكىم كەلەدى. قازاقستاننىڭ ازەربايجانداعى, سونداي-اق ازەربايجاننىڭ قازاقستانداعى مادەنيەت كۇندەرىنىڭ ۇيىمداستىرىلۋى ەلدەرىمىزدى ودان ءارى جاقىنداتا ءتۇسىپ, حالىقتارىمىزدىڭ تەرەڭ تاريحى مەن باي مادەنيەتىن پاش ەتەدى. ءبىزدىڭ ويىمىزشا, مەملەكەتارالىق قارىم-قاتىناسىمىزدىڭ نەگىزى – وسى گۋمانيتارلىق سالا. ارينە, ەكى تاراپتىڭ دا مۇددەسىنە ساي سالالار از ەمەس. ءبىز, شىن مانىندە, ءوزارا ىنتىماقتاستىق پەن وداقتاستىقتىڭ جاڭا دەڭگەيىنە كوتەرىلىپ جاتىرمىز», دەپ تۇيىندەدى ازەربايجان پرەزيدەنتى يلحام اليەۆ.