«Amanat» پارتياسى قوعامدىق ساياسات ينستيتۋتىنىڭ «SocioExpert Club» الاڭىندا «جاڭا ساياسي مادەنيەت جانە كرەاتيۆتى يندۋستريا» تاقىرىبى اياسىندا «كاپيتان Qazaqstan» كوميكسىنىڭ تۇساۋى كەسىلدى.
تۋىندىنىڭ اۆتورى – پارتيا جانىنداعى قوعامدىق ساياسات ينستيتۋتىنىڭ باس ساراپشىسى ەرلان احمەدي. بۇل ونىڭ العاشقى تۋىندىسى ەمەس. بۇعان دەيىن ونىڭ ء«ححى عاسىر شەشەنى. 77 كەڭەس» كىتابى جانە «ۆلاست. سەرىي كاردينال» اتتى ساياسي رومانى جارىق كوردى.
– تۇساۋى كەسىلىپ وتىرعان كوميكستىڭ نوبايىن وقۋشى كەزىمدە جاساي باستادىم. «Marvel»-ءدىڭ, «DC»-ءدىڭ كينوسىن, مۋلتفيلمدەرىن كورىپ ءوستىم. زاماناۋي قازاقستاننىڭ قاھارمانى, ساياساتكەرى قانداي بولۋى كەرەك دەپ كوپ ويلاندىم. ونىڭ جەمىسى – وسى «كاپيتان Qazaqstan». ول وتباسىلىق قۇندىلىقتارعا باسىمدىق بەرىپ, وتانسۇيگىشتىكتى, ادىلەتتىلىكتى تۋ ەتەدى. ءبىز جاس وتانداستارىمىزدى دۇرىس باعىتتا تاربيەلەۋىمىز كەرەك, – دەدى ە.احمەدي.
كوميكستىڭ باس كەيىپكەرى دىنمۇحاممەد قاسىمحان كۇندىز ادىلەتتىلىكتى تۋ ەتەتىن ساياساتكەر, تۇندە ادىلەتسىزدىكپەن كۇرەسەتىن سۋپەرقاھارمان – «كاپيتان Qazaqstan». كوميكستى استانا قالاسىنداعى «الاش» جانە «اباي» كىتاپ دۇكەندەرىنەن ساتىپ الۋعا بولادى.
– كوميكس قوعامدىق مادەنيەتتى قالىپتاستىرادى. وكىنىشكە قاراي, وتاندىق كوميكستەر وتە از. ساۋساقپەن سانارلىق. بۇل – ەلىمىز ءۇشىن مۇلدەم جاڭا سالا, تىڭ قادام دەسە دە بولادى. «كاپيتان Qazaqstan»-دى ەلىمىزدە جارىققا شىققان ساياسي تاقىرىپتاعى تۇڭعىش كوميكس دەۋگە تولىق نەگىز بار. ءتىپتى بۇل ەڭبەككە تەك بالالار عانا ەمەس, ەرەسەكتەر قاۋىمى دا قىزىعۋشىلىق تانىتادى دەگەن سەنىمدەمىن, – دەدى «Kitap.kz» جوباسىنىڭ اۆتورى, مەدياساراپشى ماقپال جۇماباي.