پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن وتكەن ۇيلەستىرۋ ورتالىعىنىڭ وتىرىسىندا ىشكى نارىقتى مۇناي ونىمدەرىمەن, ونىڭ ىشىندە ديزەل وتىنىمەن قامتاماسىز ەتۋ جونىندەگى شارالار تالقىلاندى, دەپ حابارلايدى Egemen.kz primeminister.kz-كە سىلتەمە جاساپ.
ەنەرگەتيكا ءمينيسترى الماسادام ساتقاليەۆ قازىر رەسپۋبليكادا 309 مىڭ توننا ديزەل وتىنىنىڭ جيىنتىق قورى بار ەكەنىن مالىمدەدى. سونىمەن قاتار ساۋىردە تاعى 441 مىڭ توننا وتىن وندىرىلمەك. وسىلايشا, ساۋىردە ديزەلدىڭ جالپى كولەمى شامامەن 750 مىڭ توننا, ال بولجام بويىنشا تۇتىنۋ كولەمى اۋىل شارۋاشىلىعى تاۋارىن وندىرۋشىلەر مەن قتج قاجەتتىلىكتەرىن قوسا ەسەپتەگەندە, شامامەن 510 مىڭ توننا بولادى.
ءمينيستردىڭ مالىمەتىنشە, 7 ساۋىردەگى جاعداي بويىنشا, 415 جانارماي قۇيۋ ستانتسياسىندا ديزەل وتىنى بولماعان, بۇل - ەلىمىزدەگى 3 163 نىساننىڭ 13 پايىزى. ەنەرگەتيكا مينيسترلىگى تاپشىلىقتى تەز ارادا جويۋ ءۇشىن جانارماي قۇيۋ ستانتسيالارىن قوسىمشا وتىنمەن قامتاماسىز ەتۋ ماقساتىندا وڭىرلەر اكىمدىكتەرىنەن وتىنىمدەر جينادى.
سونداي-اق مەملەكەت وڭدەۋ كاسىپورىندارىندا ءوندىرىس تۇراقتىلىعىن قامتاماسىز ەتۋ ءۇشىن بارلىق شارانى قابىلداپ جاتىر. اتاپ ايتقاندا, شىمكەنت ءموز-ءىن جوندەۋ جۇمىستارى مەرزىمىنەن بۇرىن اياقتالىپ, مۇناي ونىمدەرىن جونەلتۋ باستالىپ كەتتى. بۇل رەتتە اۋىل شارۋاشىلىعى تاۋارىن وندىرۋشىلەر مەن وتىن تاپشىلىعى بار وڭىرلەردەگى جانارماي قۇيۋ بەكەتتەرىنە باسىمدىق بەرىلەدى.
«قازمۇنايگاز» ۇك اق باسقارما توراعاسى ماعزۇم مىرزاعاليەۆتىڭ ايتۋىنشا, كەيىنگى كۇندەرى بولعان تاپشىلىق جانارماي قۇيۋ ستانتسيالارى يەلەرىنىڭ باعا ايىرماشىلىعىنىڭ قىسقارۋىن كۇتىپ, مۇناي بازالارىنداعى وتىن قورىن جاسىرىپ قالۋىنا بايلانىستى بولىپ وتىر. وسىلايشا, جەكە مۇناي بازالارىندا ەلدە بار ديزەل وتىنى كولەمىنىڭ 73 پايىزى جيناقتالعان.
قارجى ۆيتسە-ءمينيسترى ەرجان ءبىرجانوۆ وتكەن اپتادا 3 مىڭنان اسا جانارماي قۇيۋ ستانتسياسىنا تالداۋ جۇرگىزىلگەنىن, بۇل رەتتە وتىن بولا تۇرا, ساۋدا-ساتتىق كولەمى ازايىپ كەتكەن نىساندارعا ەرەكشە نازار اۋدارىلعانىن ايتتى. ياعني ساتۋدى شەكتەۋ بەلگىلەرى بولعان. ەلىمىز بويىنشا بارلىعى وسىنداي 152 جانارماي قۇيۋ بەكەتى انىقتالدى. بارلىق دەرەك بويىنشا ءتيىستى شارالار قابىلدانىپ جاتىر.
وڭىرلەردەگى احۋال مەن قابىلدانىپ جاتقان شارالار تۋرالى تۇركىستان وبلىسى, الماتى جانە شىمكەنت اكىمدەرىنىڭ ورىنباسارلارى بايانداما جاسادى.
رومان سكليار وڭىردەگى شتابتار بەلسەندى تۇردە ارەكەت ەتىپ, تۇراقتى رەيدتەر وتكىزۋى كەرەگىن اتاپ ءوتتى.
«الىپ-ساتارلىققا جانە مۇناي بازالارىندا وتىندى «ۇستاپ تۇرۋعا» جول بەرمەۋ كەرەك, ويتكەنى بۇل ەلدىڭ ەنەرگەتيكالىق قاۋىپسىزدىگىنە تىكەلەي اسەر ەتەدى. مكك, قما جانە بقدا-دان جانارماي قۇيۋ ستانتسياسىنداعى جاعدايدى باقىلاۋدى كۇشەيتۋدى سۇرايمىن. جانار-جاعارماي ماتەريالدارى بولا تۇرىپ, ونى ساتپاي وتىرعان نىساندار انىقتالسا, ولاردى زاڭ بويىنشا جاۋاپقا تارتۋ كەرەك. «قازمۇنايگاز» جانە قتج زاۋىتتاردان جوسپارلانعان جانار-جاعارماي ماتەريالدارىنىڭ كولەمىن, اسىرەسە ديزەل وتىنىن ۋاقىتىلى جانە تولىعىمەن جونەلتۋدى جانە جەتكىزۋدى قامتاماسىز ەتۋى قاجەت», دەدى سكليار.
سونىمەن قاتار وتىرىستا كەلەسى جىلۋ بەرۋ ماۋسىمىنا دايىندىق ماسەلەسى تالقىلاندى.