مادەنيەت جانە سپورت مينيسترلىگى قازاقستاننىڭ 2023-2029 جىلدارعا ارنالعان مادەني ساياساتىن دامىتۋ تۇجىرىمداماسىن ۇسىندى. قۇجاتتا تەاترلارعا ەرەكشە كوڭىل بولىنگەن. نىسانالى ينديكاتورلاردىڭ ءبىرى – اۆتورلىق قويىلىمداردى ءۇش ەسە ۇلعايتۋ.
تۇجىرىمداماعا سايكەس 2029 جىلعا قاراي جىل سايىن اۆتورلاردىڭ 600 سپەكتاكلىن ساحنالاۋ جوسپارلانىپ وتىر. قويىلىمدار سانىنىڭ ارتۋى كەزەڭ-كەزەڭىمەن جۇزەگە اسادى. ماسەلەن, بيىل 245 سپەكتاكل قويۋ مىندەتى تۇر, بۇل وتكەن جىلمەن سالىستىرعاندا 62 قويىلىمعا ارتىق.
سونىمەن قاتار ينكليۋزيۆتى توپتىڭ بالالارى ءۇشىن تەاتر ترۋپپالارىن اشۋ, ەرەكشە قاجەتتىلىكتەرى بار ادامدارعا سپەكتاكلدەردىڭ ونلاين-كورسەتىلىمدەرىن ۇيىمداستىرۋ, جاڭا تەاترلار سالۋدى جانە جاس تالانتتاردى مەملەكەتتىك قولداۋ شارالارىن ودان ءارى ىسكە اسىرۋ كوزدەلىپ وتىر.
«ەلىمىزدىڭ تەاتر ونەرىن دامىتۋ – الداعى بىرنەشە جىلداعى باستى مىندەتتەرىمىزدىڭ ءبىرى. تەاتر ءبىزدىڭ ازاماتتارىمىزعا بارىنشا قولجەتىمدى بولۋعا ءتيىس. بۇل تەك كورەرمەن ءۇشىن ەمەس, سونىمەن قاتار جاس تالانتتى دراماتۋرگتەر ءۇشىن دە كەرەك. جاڭا اۆتورلارسىز دامۋ مۇمكىن ەمەس, سوندىقتان مينيسترلىك جاڭا ەسىمدەردى تانىتۋعا ەرەكشە نازار اۋدارادى. ماسەلەن, وتكەن جىلى ادەبيەت سالاسىنداعى «ايبوز» تۇڭعىش ۇلتتىق سىيلىعى تابىس ەتىلدى. بيىل جاس جازۋشىلار مەن اقىندارعا ارنالعان پرەزيدەنتتىك ادەبي سىيلىق تابىستالادى», دەدى مادەنيەت جانە سپورت ۆيتسە-ءمينيسترى نۇرعيسا داۋەشوۆ.