الماتىداعى ءسابيت مۇقانوۆتىڭ مۋزەيىندە كەلۋشىلەردىڭ نازارىن اۋدارىپ, قىزىعۋشىلىقتارىن وياتاتىن قۇندى جادىگەرلەر بارشىلىق. سونىڭ ءبىرى جاتىن بولمەدەگى قابىرعادا ءىلۋلى تۇرعان پورترەت, ءبىر قاراعاندا جاي عانا قاعازعا سالعان سۋرەت سەكىلدى كورىنگەنىمەن, شىن مانىندە جاقىنداپ, انىقتاپ قاراساڭىز, ءتۇرلى-ءتۇستى بىلعارى بولىكتەرىنەن قۇرالعانىن بايقاۋعا بولادى. قۇراق بەينە. بىلعارى قۇراقتان ورنەكتەلگەن. ولشەمى – 68ح49 سم.
بۇل پورترەتتى سولتۇستىك قازاقستانداعى تانىمال مۇسىنشىلەردىڭ ءبىرى, قازاقستان سۋرەتشىلەر وداعىنىڭ مۇشەسى ۆيكتور كرەستنيكوۆ جاساعان. ول – قىزىلجار ءوڭىرىنىڭ ەلدى مەكەندەرىندەگى كوپتەگەن مونۋمەنتالدى مۇسىندىك كومپوزيتسيالاردىڭ اۆتورى. نەگىزگى شىعارمالارى: «ەرشوۆ ەرتەگىلەرى», «وتان-انا ەسكەرتكىشى» ت.ب. سۋرەتشىلەردىڭ وتباسىندا دۇنيەگە كەلگەن ۆيكتور كرەستنيكوۆ ءبىراز جەتىستىككە جەتكەن, ول ساندىك-قولدانبالى ونەرمەن باتيكپەن, بەينەلەۋ ونەرىندەگى كەسكىندەمەمەن, گرافيكامەن اينالىسقان. ۆ.ە.كرەستنيكوۆتىڭ جۇمىستارى سولتۇستىك قازاقستان وبلىستىق بەينەلەۋ ونەرى مۋزەيىنىڭ قورىندا ساقتاۋلى. 1970 جىلى س.مۇقانوۆقا «پەتروپاۆل قالاسىنىڭ قۇرمەتتى ازاماتى» اتاعى بەرىلۋىنە بايلانىستى وسى پورترەتتى سىيلىق رەتىندە ۇسىنعان.
بۇل ءتۇرلى-ءتۇستى بىلعارىدان ورنەكتەلگەن جادىگەردىڭ ەرەكشەلىگى سوندا: سابەڭنىڭ كەلبەتىن كەلىستىرە جاساپ, قىزىلجار ءوڭىرىنىڭ اسەم تابيعاتىمەن استاستىرا بەينەلەگەن. اق قايىڭدار ولكەسىنىڭ ازاماتى ەكەنى اڭعارىلىپ تۇر.
نارگيزا تاسماحامبەت,
الماتىداعى C.مۇقانوۆ پەن
ع.مۇسىرەپوۆتىڭ ادەبي-مەموريالدىق
مۋزەي كەشەنىنىڭ قور ساقتاۋشىسى