كەزدەسۋ بارىسىندا قاسىم-جومارت توقاەۆ قاسيەتتى رامازان ايىنا وراي ەلىمىزدىڭ بارشا مۇسىلماندارىنا ىزگى تىلەگىن جولدادى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنا رامازان ايىندا ەلىمىزدىڭ ءاربىر ايماعىندا ۇيىمداستىرىلىپ جاتقان قايىرىمدىلىق شارالار جونىندە مالىمەت بەرىلدى.
سونىمەن قاتار ناۋرىزباي قاجى تاعان ۇلى قازاقستان مۇسىلماندارى ءدىني باسقارماسىنىڭ قوعامدا ءداستۇرلى يسلام ءدىنىن كەڭىنەن دارىپتەۋ جانە ەل يگىلىگى مەن بىرلىگى جولىندا اتقارىپ جاتقان جۇمىستارى جونىندە باياندادى.
باس ءمۇفتيدىڭ ايتۋىنشا, ءدىني باسقارما وسى جىلدى «يسلام جانە ىزگى قوعام» جىلى دەپ جاريالادى. ونىڭ اياسىندا جىل بويى بىرقاتار ماڭىزدى ءىس-شارا ۇيىمداستىرىلادى. سونداي-اق ۇلتتىق سالت-سانانى جاڭعىرتۋ, ءداستۇرلى يسلامعا باسىمدىق بەرۋ ءۇشىن الداعى ۋاقىتتا بىرقاتار جوبانى جۇزەگە اسىرۋ جوسپارلانعان.
مەملەكەت باسشىسى ءمۇفتياتتىڭ باستامالارىنا قولداۋ ءبىلدىرىپ, حالقىمىزدىڭ دۇنيەتانىمىنا ساي ءداستۇرلى يسلامدى دارىپتەۋ ماڭىزدى ەكەنىن ايتتى.