كەشە كاسىپوداقتار فەدەراتسياسىنىڭ كەزەكتى ءXXىى سەزىنە قاتىسۋ ءۇشىن استاناعا كەلگەن دەلەگاتسيا وكىلدەرى پارلامەنت ءماجىلىسى توراعاسىنىڭ ورىنباسارى ۆلاديمير بوبروۆ باستاعان دەپۋتاتتار توبىمەن كەزدەستى. ولاردىڭ قويعان ساۋالدارىنا پارلامەنتتىڭ الەۋمەتتىك-مادەني دامۋ كوميتەتى مەن ەكونوميكالىق رەفورما جانە وڭىرلىك دامۋ كوميتەتىنىڭ مۇشەلەرى جاۋاپ بەرىپ وتىردى.
كەزدەسۋ كەزىندە كاسىپوداقتار فەدەراتسياسىنىڭ وكىلدەرى ەلىمىزدىڭ جەر-جەرىندە بوي كوتەرىپ جاتقان وزەكتى ماسەلەلەردى, ولاردىڭ شەشىلۋىن العا تارتتى. بىراق سول ماسەلەلەردىڭ نەگىزگى وزەگى – ول قاراپايىم حالىقتىڭ تىنىس-تىرشىلىگى, جاعدايى, ءال-اۋقاتى. بۇل رەتتە جالاقىنى ءوسىرۋ, جەر-جەردە جۇمىسسىزدىقتىڭ الدىن الۋ, ازاماتتاردىڭ كاسىبي بىلىكتىلىگىن جەتىلدىرۋ سەكىلدى ماسەلەلەر بار.
ەل ەكونوميكاسىنىڭ دامۋى, مەملەكەت قورجىنىنان بولىنگەن قاراجاتتىڭ ءتيىمدى جۇمسالۋىن قاداعالاۋ, اۋىل شارۋاشىلىعىن وركەندەتۋ, الەۋمەتتىك تۇيىندەردى شەشۋ جولدارى دا ءسوز بولدى. ماسەلەن, ۆ.بوبروۆ قازىرگى تاڭدا كەز كەلگەن تۇيتكىلدى ماسەلەنى وڭتايلاندىرۋ باعىتىندا ءىس-شارالار قولعا الىنىپ, بۇل رەتتە ارنايى زاڭ جوبالارى ازىرلەنىپ جاتقانىن تىلگە تيەك ەتە كەلە, ولاردىڭ جۇيەلى ورىندالۋىنا ءمان بەرىلەتىنىن ايتتى. “ەگەر دە بۇل زاڭ جوبالارى جەرگىلىكتى جەرلەردە ءتيىستى دەڭگەيدە ەنگىزىلمەسە, وندا ەشبىر ءتۇيىن تارقاتىلمايدى. وسىنى ەسكەرۋىمىز قاجەت”, دەدى ۆ. بوبروۆ.
كاسىپوداقتار فەدەراتسياسى توراعاسىنىڭ ورىنباسارى قايرات اماندىقوۆ داعدارىس كەزىندە جۇرگىزىلگەن مونيتورينگكە سۇيەنە وتىرىپ, كاسىپوداقتار بار جەرلەردە ولاردىڭ ءوز وكىلدەرىنىڭ جان-جاقتى قورعالعانىن اتاپ ءوتتى.
ءبىر ايتا كەتەرلىگى, بۇگىندە ەلىمىزدەگى كاسىپوداقتار فەدەراتسياسى 2 ملن. 100 مىڭعا تارتا ادامنىڭ باسىن بىرىكتىرەدى. ولار 26 سالا بويىنشا جۇمىس اتقارادى.
ءلايلا ەدىلقىزى,
“ەگەمەن قازاقستان”.