جانجال كەزىندە كۇيەۋىنىڭ بۇرىنعى ازاماتتىق ايەلىن ولتىرگەن استانا تۇرعىنى ءبىر جارىم جىلعا سوتتالدى, دەپ حابارلايدى Egemen.kz الماتى اۋدانىنىڭ № 2 اۋداندىق سوتىنا سىلتەمە جاساپ.
بۇگىن, 5 ساۋىردە ايىپتالۋشىعا قاتىستى قىلمىستىق كودەكستىڭ 101-بابى, 1-بولىگى (اففەكت جاعدايىندا ادام ءولتiرۋ) دەرەگى بويىنشا سوت ۇكىمى شىقتى.
سوت مالىمەتىنشە, مارقۇم م. ايىپتالۋشى ر.-نىڭ كۇيەۋىمەن رەسمي نەكەگە تۇرعانعا دەيىن قارىم-قاتىناستا بولعان, ولاردىڭ ورتاق بالاسى بار. ر.-نىڭ كۇيەۋى زاڭدى تۇردە ۇيلەنگەننەن كەيىن دە جابىرلەنۋشى م.-مەن قارىم-قاتىناسىن جالعاستىرعان. بۇل ر.-نىڭ ۇيالى تەلەفونىنا جىبەرىلگەن فوتولار مەن نامىسىنا تيەتىن سوزدەر جازىلعان حاتتارمەن دالەلدەنگەن. «ر. جابىرلەنۋشىنىڭ جۇيەلى تۇردە قورلاۋى سالدارىنان ەموتسيونالدىق قوزۋ (اففەكت) جاعدايىندا جابىرلەنۋشىنىڭ اۋلاسىنا بارعاندا اۋىزشا جانجال تۋىنداعان, جانجال كەزىندە ر. جابىرلەنۋشىنىڭ ومىرلىك ماڭىزى بار مۇشەسىنە پىشاق سۇعىپ العان. سونىڭ سالدارىنان جابىرلەنۋشى العان دەنە جاراقاتىنان اۋرۋحانادا كوز جۇمدى», دەدى سوت.سوتتا ءىستى قاراۋ بارىسىندا تاراپتار تاتۋلاسۋ تۋرالى مەدياتسيالىق كەلىسىمگە قول جەتكىزگەن.
«وسىنداي جاعدايدا سوتتىڭ قىلمىستىق ءىس جۇرگىزۋ كودەكسىنىڭ 340-بابىنىڭ 1-بولىگىنە سايكەس سوتتالۋشىنىڭ جاعدايىن ناشارلاتۋعا قۇقىعى جوق, سوتتا پروكۋرور ر.-عا 1 جىل 6 اي مەرزىمگە باس بوستاندىعىنان شەكتەۋ جازاسىن سۇرادى. سوتتالۋشىنىڭ كىناسى ر.-نىڭ ءوزىنىڭ, كۋاگەرلەردىڭ ايعاقتارىمەن, وقيعا ورنىنان تۇسىرىلگەن بەينەجازبامەن, ساراپتاما قورىتىندىلارىمەن دالەلدەندى», دەپ ءتۇسىندىردى سوت.
ناتيجەسىندە, سۋديا ر.-نىڭ قىلمىسىن ورتاشا اۋىر دارەجەدە باعالاپ, سوتتالۋشىنىڭ ءبىر جاسار بالاسى بار ەكەنىن جانە ونىڭ جاساعان ارەكەتىنە وكىنۋىن جەڭىلدەتەتىن ءمان-جايلار دەپ ەسكەرىپ, 1 جىل 6 ايعا باس بوستاندىعىن شەكتەۋ جازاسىن تاعايىندادى.
ۇكىم زاڭدى كۇشىنە ەنگەن جوق.