اۋىلدى كوتەرۋدىڭ باستى ءبىر جولى حالىققا ارناپ باسپانا سالۋ بولسا, الداعى ۋاقىتتا شالعايداعى ەلدى مەكەندەردىڭ تۇرعىندارى ءۇشىن 2855 تۇرعىن ءۇي سالۋ جوسپارلانىپ وتىر. بۇل تۋرالى ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى مارات قاراباەۆ مالىمدەگەن ەدى.
«حالىقتىڭ اۋىلدىق جانە شەكارا ماڭىنداعى اۋماقتاردان كەتۋىن ازايتۋ ماقساتىندا ءبىرىنشى كەزەكتە جاڭا وندىرىستەردى ىسكە قوسۋ جولىمەن تۇراقتى جۇمىس ورىندارىن قۇرۋ جوسپارلانۋدا. جوبالاردى جەڭىلدىكپەن قارجىلاندىرۋ, ونەركاسىپ قورىندا كوزدەلگەن قاراجات ەسەبىنەن جۇزەگە اسىرىلادى», دەدى يندۋستريا جانە ينفراقۇرىلىمدىق دامۋ ءمينيسترى مارات قاراباەۆ.
وسىعان وراي مينيسترلىك وكىلى اۋىل تۇرعىندارىن باسپانامەن قامتاماسىز ەتۋدىڭ جاڭا تەتىگى دە ىسكە قوسىلىپ جاتقانىن اتاپ ءوتتى.
«اۋىلداعى تۇرعىن ءۇي ماسەلەلەرىن شەشۋ ماقساتىندا, ءوز قىزمەتكەرلەرى ءۇشىن جالعا بەرىلەتىن ۇيلەر سالعان جۇمىس بەرۋشىلەردىڭ شىعىندارىن سۋبسيديالاۋ تەتىگى ىسكە قوسىلدى. وسى تەتىك ارقىلى اۋىل قىزمەتكەرلەرى ءۇشىن 2 855 تۇرعىن ءۇي سالۋ جوسپارلانۋدا (14,3 ميلليارد تەڭگە). بۇدان باسقا, اۋىلدىق جەرلەردە جەكە تۇرعىن ءۇي قۇرىلىسىن ىنتالاندىرۋ ماقساتىندا جىل سايىن 22 مىڭ جەر ۋچاسكەسى ينجەنەرلىك كوممۋنيكاتسيالارمەن قامتاماسىز ەتىلەتىن بولادى», دەدى مارات قاراباەۆ.
ۇلتتىق ينفراقۇرىلىمدىق جوسپاردى ازىرلەۋ ءۇشىن مۇددەلى مەملەكەتتىك جانە جەرگىلىكتى اتقارۋشى ورگاندار وكىلدەرىنەن تۇراتىن جۇمىس توبى قۇرىلاتىن بولادى.
«حالىقتىڭ ساپالى تىنىس-تىرشىلىك دەڭگەيىن ارتتىرۋ جانە ينفراقۇرىلىمدىق دامۋدىڭ نەگىزگى پروبلەمالارىن شەشۋ ماقساتىندا, جوسپاردا بازالىق ينفراقۇرىلىم جوبالارى, ونىڭ ىشىندە اۆتوموبيل جانە تەمىر جولدارىمەن, اۆيا جەلىلەرمەن, سۋمەن, جىلۋمەن, گازبەن جانە ەلەكترمەن جابدىقتاۋ, سونداي-اق بايلانىس, تەلەكوممۋنيكاتسيامەن (تەلەفون, ينتەرنەت) جانە تاعى دا باسقالارمەن قامتاماسىز ەتۋ كوزدەلەدى», دەدى مينيستر.