فۋتبولدان قازاقستان چەمپيوناتىنىڭ ءتورتىنشى تۋر ويىندارىندا بىرنەشە توسىن ناتيجە تىركەلدى. اقتوبەگە ساپار شەككەن پەتروپاۆلدىڭ «قىزىلجارى» جەرگىلىكتى «اقتوبە» كلۋبىن ءىرى ەسەپپەن تىزە بۇكتىرىپ, تۋردىڭ سەنساتسياسىن جاسادى. سونىمەن قاتار العاشقى ءۇش تۋردا ۇپايدان شاشاۋ شىعارماعان قوستانايدىڭ «توبىلى» مەن شىمكەنتتىڭ «ورداباسى» كلۋبتارى بۇل جولى بىلگەنىنەن جاڭىلدى. «توبىل» تالدىقورعاندا «جەتىسۋمەن» تەڭ ويناسا, «ورداباسى» ەلوردادا «استانادان» جەڭىلىپ قالدى.
«اقتوبە» فۋتبولشىلارى ءۇشىنشى تۋردا بىلتىرعى ەل چەمپيوندارى – «استانانى» ءوز الاڭىندا 4:1 ەسەبىمەن جەڭگەن سوڭ, جانكۇيەرلەر بۇل ماۋسىمدا «قىزىل-اقتاردى» توقتاتۋ مۇمكىن ەمەس دەپ توپشىلاعان ەدى. الايدا ارادا ءبىر تۋر وتپەي جاتىپ «اقتوبەلىكتەر» ءوز جانكۇيەرلەرىنىڭ الدىندا «قىزىلجاردان» ماسقارا بولىپ جەڭىلدى – 3:1. كەزدەسۋدىڭ 35-مينۋتىندا لۋكا يمنادزە قوناقتاردى ەسەپتە العا شىعارسا, 56-مينۋتتا پەرنامبۋكو ەسەپتى ەسەلەي ءتۇستى – 2:0. ارادا 18 مينۋت وتكەندە «اقتوبە» ساپىنان الىبەك قاسىم 11 مەترلىك ايىپ دوبىن ءساتتى ورىنداپ, جەرگىلىكتى جانكۇيەرلەردىڭ كەۋدەسىنە ءۇمىت وتىن جاقتى. دەگەنمەن كەزدەسۋدىڭ سوڭعى مينۋتتارىندا «قىزىلجارلىق» يۋري بۋشمان مەرگەندىگىمەن كوزگە ءتۇسىپ, ويىننىڭ نۇكتەسىن قويدى. وسىلايشا, قاتارىنان ءتورت ويىندا جەڭىسكە جەتكەن ءالي اليەۆ شاكىرتتەرى 12 ۇپايمەن تۋرنير كەستەسىندە جەكە-دارا كوش باستادى.
ءتورتىنشى تۋردىڭ ورتالىق ويىنى سانالعان «استانا» مەن «ورداباسى» اراسىنداعى ماتچتا الاڭ قوجايىندارى ەش قيىندىقسىز ءۇش ۇپايعا قول جەتكىزدى. قوسالقى قۇراممەن ونەر كورسەتكەن شىمكەنتتىك ۇجىم «استانا ارەنادا» 2:0 ەسەبىمەن جەڭىلىپ قالدى. ەكىنشى تايمدا «استانا» ساپىنان مارين توماسوۆ مەرگەندىگىمەن كوزگە تۇسسە, كەيىننەن مامادۋ مبودج ءوز قاقپاسىنا گول سالىپ الدى. ءبىر ايتا كەتەرلىگى, قوناقتار ساپىنان بۇل ويىنعا نەگىزگى قۇرامنىڭ بىرنەشە فۋتبولشىسى قاتىسقان جوق. اتاپ ايتقاندا, لەگيونەرلەردەن رادوساۆ پەتروۆيچ, بەرناردو ماتيچ, قازاقستاندىق فۋتبولشىلاردان سەرگەي مالىي مەن باۋىرجان يسلامحان ماتچتىڭ حاتتاماسىنا دا ەنگەن جوق. ال بوبۋر ابدۋحوليكوۆ پەن اسحات تاعىبەرگەن قوسالقى قۇرامدا قالىپ قويدى.
قوستانايدىڭ «توبىلى» ءتورتىنشى تۋردا ماڭىزدى ەكى ۇپايىنان قاعىلدى. ءۇش تۋردان كەيىن تۋرنير كەستەسىندە الدىڭعى ورىندا كەلە جاتقان «توبىل» سىرت الاڭدا بيىل عانا ءبىرىنشى ليگادان جوعارى توپقا ورالعان تالدىقورعاننىڭ «جەتىسۋ» كلۋبىنان ايلاسىن اسىرا المادى – 1:1. كەزدەسۋدىڭ 8-مينۋتىندا يوۆان يليچ قوستانايلىقتاردى ەسەپتە العا شىعارعانىمەن, 44-مينۋتتا رۋسلان تەۆەروۆ تارازى باسىن تەڭەستىرىپ كەتتى. «جەتىسۋ» چەمپيوناتتاعى العاشقى ۇپايىنا قول جەتكىزدى.
4-تۋردىڭ وزگە ماتچتارىندا مىناداي ناتيجەلەر تىركەلدى: «اتىراۋ» – «وقجەتپەس» – 0:4, «اقسۋ» – «ماقتاارال» – 2:1, «شاحتەر» – «قايرات» – 1:1, «كاسپي» – «قايسار» – 1:3.
8-9 ءساۋىر كۇندەرىنە جوسپارلانعان V تۋردا «ورداباسى» – «اقتوبە», «توبىل» – «استانا», «قايرات» – «جەتىسۋ», «قايسار» – «شاحتەر», «ماقتاارال» – «كاسپي», «وقجەتپەس» – «اقسۋ» جانە «قىزىلجار» – «اتىراۋ» كوماندالارى كەزدەسەدى.