كاتونقاراعاي اۋدانىندا بۇرىن-سوڭدى بولماعان ىندەت تاراپ, جاڭاۇلگى, شىڭعىستاي, اققاينار اۋىلدارى كارانتينگە جابىلعان. اۋىلدىقتاردىڭ ايتۋىنشا, شەشەك اۋرۋى سىرتتان جەتكىزىلگەن قويدان شىققان كورىنەدى.
اقپاندا تاراعان ىندەتتىڭ بەتى ءالى كۇنگە دەيىن قايتا قويعان جوق. اۋرۋ بەلگىلەرى بايقالا سالا اۋدانداعى ۆەتەرينارلىق پۋنكت مەڭگەرۋشىلەرى ە.كىتاپباەۆ پەن م.قۇرمانوۆ قان سىنامالارى مەن بيولوگيالىق ماتەريالداردى الىپ, «رەسپۋبليكالىق ۆەتەريناريالىق زەرتحانا» شجق رمك فيليالىنا جولداعان. ساراپتاما اكتىلەرىنە سايكەس جوعارىدا اتالعان ءۇش اۋىلدىق وكرۋگ تۇرعىندارىنا تيەسىلى ۇساق ءمۇيىزدى مالدىڭ قان سارىسۋى ۆيرۋسولوگيالىق زەرتتەۋلەرى وڭ ناتيجە بەردى. ءسويتىپ, ۇساق ءمۇيىزدى مالدان شەشەك اۋرۋى شىعۋىنا بايلانىستى 13 ناۋرىزدان اققاينار جانە كاتونقاراعاي اۋىلدىق وكرۋگتەرى اكىمدەرىنىڭ شەشىمدەرىمەن شىڭعىستاي, جاڭاۇلگى جانە اققاينار اۋىلدارىنىڭ اۋماعىنا كارانتين رەجىمى ەنگىزىلگەن. قازىرگى ۋاقىتتا ءۇش اۋىلدىڭ كىرەبەرىسىنە بلوك-بەكەتتەر قويىلىپ, كىرگەن-شىققان كولىكتەر تەكسەرىستەن وتەدى. ياعني اۋىلدان قوي-ەشكى الىپ شىعۋعا نەمەسە كىرگىزۋگە بولمايدى.
– اۋىلعا كىرگەن, شىققان ءار كولىكتى تەكسەرەمىز. تەكسەرىپ قانا قويمايمىز, كولىكتەر دەزينفەكتسيالانىپ ءبىر-اق كىرەدى. ول ءۇشىن شلاگباۋمنىڭ الدىندا ارنايى سۇيىقتىق قۇيىلعان توسەنىش بار, – دەيدى بلوك-بەكەت كەزەكشىسى ەرمەك ساتىشەۆ.
ءيا, قورعانىس جان-جاقتى قاراستىرىلعان. كۇن-ءتۇنى كەزەكشىلىك جۇرگىزىلىپ تۇرادى. الايدا اۋرۋدىڭ الدىن الۋ سەكىلدى شارالاردىڭ جۇرگىزىلمەيتىنى ايدان انىق. ونى ايتىپ وتىرعانىمىز, ۆەتەريناريا ماسەلەسىن از قاۋزاعانىمىز جوق. ءبىر ەمەس, بىرنەشە رەت پروبلەما كوتەردىك. اتاپ ايتساق, ۆەتەريناريا سالاسىنىڭ ماتەريالدىق بازاسى جۇپىنى, جالاقىسى ماردىمسىز, ماماندار جوق. ءتيىستى جاعداي جاسالماعان سوڭ دا اۋرۋ شىعادى.
وبلىستىق ۆەتەريناريا باسقارماسىنىڭ باسشىسى راميل ساعىندىقوۆتىڭ ايتۋىنشا, قازىرگى ۋاقىتتا ۇساق ءمۇيىزدى مال اراسىندا ءولىم مەن جاڭادان اۋىرعاندار بايقالمايدى. كاتونقاراعاي اۋدانىنداعى ەپيزووتيالىق جاعداي – ۆەتەرينارلىق قىزمەتتىڭ باقىلاۋىندا. 11 مامان, 6 تەحنيكا, 8 مىڭنان اسا مالعا ۆاكتسينا ەگىلدى.
شىعىس قازاقستان وبلىسى,
كاتونقاراعاي اۋدانى