ءتۋريستى قازى-قارتامەن قىزىقتىرا الامىز با؟

جالپى, قازاقستاننىڭ كەز كەلگەن ايماعى ءوزىنىڭ اسەم تابيعاتى­مەن, كورىكتى جەرلەرىمەن تۋريستەردى تار­تۋعا قاۋقارلى. ءار ايماقتىڭ نەمەسە ەلدىڭ وزىنە ءتان تابيعي ەرەكشەلىگى بولا­تىنى سياقتى جەر كولەمى جاعىنان الەم­دە توعىزىنشى ورىن الاتىن ءبىزدىڭ ەلىمىزدىڭ دە ءار ايماعى ءتۋريزمنىڭ كەز كەلگەن سالاسىن دامىتۋعا مۇمكىن­دىك بەرەدى. اسىرەسە وڭتۇستىك وڭىردە ءتۋريزمنىڭ بارلىق باعىتىن بەلسەندى دامىتۋعا بولادى. اتاپ ايتقاندا, كە­يىنگى كەزدەرى تۋريستەر اراسىندا ەڭ كوپ سۇرانىسقا يە بولىپ جۇرگەن ەمدىك-ساۋىقتىرۋ, كۋرورتتى, ەكولوگيالىق, ىسكەرلىك, مادەني, تاريحي, سپورتتىق, اگرو جانە تاعى باسقا دا ءتۋريزمنىڭ سالالارىن جانداندىرۋعا مۇمكىندىك بار. بۇل تىزىمگە گاسترونوميالىق ءتۋريزمدى دە قوسۋعا بولادى.

ءيا, بۇگىندە شەتەلدىك تۋريستەردى تەك تابيعاتى اسەم جەرلەرمەن عانا ەمەس, اتا-بابامىزدان ميراس بولىپ قالعان ءداستۇرلى ۇلتتىق تاعامدارى­مىز ارقىلى دا تارتا الامىز. جۋىردا گاسترونوميالىق تۋريزم بويىنشا تۇركىستان قالاسىندا ەلىمىزدە العاش رەت «Gastro Fest Turkistan – 2023» فەستيۆالى ۇيىمداستىرىلدى.

تۇرلەنگەن تۇركىستان قالاسىنىڭ كورنەكتى بەلگىسىنە اينالاتىن, وڭىر­دەگى قوعامدىق تاماقتانۋ سالاسىن دامىتۋعا جانە گاسترونوميالىق برەن­دىن قالىپتاستىرۋعا ۇلەس قوسۋ ماق­ساتىندا جانە ناۋرىز مەرەكەسىنە ورايلاستىرىپ ۇيىمداستىرىلعان گاسترو­فەستيۆال وبلىستىق تۋريزم باس­قارماسىنىڭ «Open Turkistan» تۋريستىك اقپاراتتىق ورتالىعىنىڭ قولداۋىمەن كەڭ كولەمدە اتالىپ ءوتتى.

قالانىڭ 30-عا جۋىق مەيرامحا­نا­سى مەن ءدامحاناسى گاستروفەست قوناق­تارىنا ۇلتتىق تاعامدار, جەرگىلىكتى ­دەليكاتەستەر جانە ستريت-فۋد دام­دەرىن, تاتتىلەر مەن سۋسىندارىن ۇسىن­دى. « ۇلى دالا ەلى» ورتالىعىنىڭ ايما­عىندا وتكەن ماڭىزدى ءىس-شاراعا الىس-جاقىن شەتەلدەردەن جانە وزگە دە ايماقتاردان 10 مىڭنان اسا قوناق قاتىستى. سونىمەن قاتار ءىس-شاراعا جەرگىلىكتى جانە رەسەي, وزبەكستان, قىتاي, نيدەرلاندتان 100-گە جۋىق كومپانيا وكىلدەرى كەلىپ, ىسكەرلىك بايلانىستار ورناتۋعا مۇمكىندىك الدى.

«كورمە-جارمەڭكە اۋىل شارۋا­شى­لىعى مەن تاماق ونەركاسىبى ونىم­دەرى مەن قىزمەتتەرىمەن تانىستىرۋ جانە ساتۋ ماقساتىندا وتكىزىلدى. كور­مە-جارمەڭكە اياسىندا اۋىل شارۋا­شى­لىعى مەن تاماق ونەركاسىبىن دامىتۋ سالاسىنداعى جاھاندىق تاقى­رىپ­تارعا ارنالعان فورۋم ۇيىم­داس­تى­رىلدى. سونىمەن قاتار ءىس-شارا بارى­سىندا تۇيەلەر شەرۋى, كوكپار ويى­نى, ەتنوقالاشىق, گاستروفەستي­ۆال, كونتسەرتتىك باعدارلامالار مەن ءتۇرلى شوۋلار ءوتتى. بۇعان قوسا سپورت­تىق باعدارلامالار مەن ۇلتتىق ويىندار, قاسيەتتى ورىندار مەن كەسە­نەلەردى ارالاۋ جانە شىعىس تاعام­دارىنان ءدام تاتۋ, قولونەر شەبەرحانالارىمەن تانىسۋ سياقتى ءىس-شارا­لار دا باعدارلامامىزدا بولدى. بۇل ءىس-شارالار جالپى تۋريزم مەن اگرو­تۋريزم­نىڭ دامۋىنا وڭ ىقپال ەتەدى دەپ ۇمىتتەنەمىز. سونداي-اق ناۋرىز مەرە­كەسىنە وراي «كەرۋەن ساراي» كەشە­نىندە 30 كيىز ءۇي تىگىلىپ, ءتول جاڭا جى­لى­مىز­دىڭ ءمان-ماڭىزىن تاعى ءبىر مارتە اشا تۇس­كەندەي بولدىق», دەدى شارانى ۇيىم­داستىرۋشى, «ExpoGroup» كومپا­نياسىنىڭ ديرەكتورى شولپان قوجاباەۆا.

تۇركىستان وبلىسى اۋىل شارۋا­شىلىعى باسقارماسى باسشىسىنىڭ ورىنباسارى نۇرجىگىت مىرزاحمەتوۆ­تىڭ ايتۋىنشا, بۇل يگى ءىس-شارا ەندى جىل سايىن تۇراقتى تۇردە تۇركىستان قالاسىندا وتكىزىلىپ تۇرماق.

«وبلىسىمىز ەلىمىزدەگى اگرارلى ايماقتىڭ قاتارىنا جاتادى. ءۇش كۇنگە جالعاسقان كورمە-جارمەڭكەدە اۋىل شارۋاشىلىعى مەن تاماق ونەركاسىبى بويىنشا 15-كە جۋىق مەموراندۋم جاسالدى. سونداي-اق اۋقىمدى ءىس-شارادا ۇزدىك كيىز ۇيلەر مەن جەتىس­تىكتەر ستەندتەرىنە وڭىرارالىق كونكۋرستار ۇيىمداستىردى. اتالعان كور­مە-جارمەڭكەدە وتاندىق تاۋار وندىرۋ­شىلەر مەن ساۋدا وبەكتىلەرى­نىڭ تىكەلەي ءوزارا ءىس-قيمىلىنا با­عىت­تالعان «قازاقستاندا جاسالعان» جالپىۇلتتىق جوباسى ۇسىنىلدى. سونىمەن قاتار وبلىسىمىزدا تۇڭعىش رەت ۇيىمداستىرىلعان اۋقىمدى كور­مە دەمەۋشىلەردىڭ قولداۋىمەن وتكە­نىن ايتا كەتكەن ءجون. الداعى ۋاقىتتا بۇل يگى ءداستۇر ءوز جالعاسىن تاۋىپ, جىل سايىن ۇيىمداستىرامىز دەگەن نيەتتەمىز», دەيدى تۇركىستان وبلىسى اۋىل شارۋاشىلىعى باسقارماسى باس­شىسىنىڭ ورىنباسارى نۇرجىگىت مىرزاحمەتوۆ.