جايىلىمدىق جەر تاپشى

2021 جىلى باستالعان وسى اۋقىمدى جۇمىس 2026 جىلعا دەيىن جالعاسادى. تەك بيىل­عى جىلدىڭ سوڭىنا دەيىن ەلدى مەكەندەر تۇرعىندارى ءۇشىن جايى­لىمدىق جەر كولەمى 195 مىڭ گەكتارعا ۇلعايتىلادى. بىل­تىر ايتەكە بي اۋدانىندا – 84 مىڭ 800, بايعانين اۋدانىن­دا – 68 مىڭ, شالقار اۋدانىندا – 71 مىڭ 800 گا كولەمدەگى پايدال­ا­نىل­ماعان جەر مەملەكەتكە قاي­تارىلدى. وسىنداي جاقسى ۇيىم­داستىرىلعان جۇمىستىڭ ناتي­جە­سىندە جايىلىمدىق جەر اۋماق­تارى العا اۋدانىندا – 23 مىڭ, ىرعىز اۋدانىندا – 26 مىڭ 400, قوبدا اۋدانىندا – 25 مىڭ, مۇعالجار اۋدانىندا – 21 مىڭ گەكتارعا ۇلعايدى.

وبلىستىق جەر رەسۋرستارىن باسقارۋ دەپارتامەنتى باسشى­سىنىڭ ورىنباسارى نۇرلىبەك امانقۇلوۆتىڭ حابارلاۋىنشا, 2021 جىلى – 512 مىڭ, 2022 جىلى – 535 مىڭ گەكتار اۋىل شارۋا­شى­لىعى ماقساتىنداعى جەرلەر مەملەكەتكە قايتارىلدى. وڭىردەگى 10 ءىرى شارۋاشىلىق يەسى 239 مىڭ گەكتار جەر ۋچاسكە­سىن مەملەكەتكە ءوز ەرىكتەرىمەن تاپسىردى. بۇل جەر رەسۋرستارىن باقىلاۋ دەپارتامەنتى ماماندارىنىڭ تىڭعىلىقتى جانە جاقسى ۇيىمداستىرىلعان جۇمىستارىنىڭ ناتيجەسىندە مۇمكىن بولىپ وتىر. دەپارتامەنت قىزمەتكەرلەرى وتكەن جىلى 610 مىڭ گەكتار جەردىڭ ءتيىمدى يگەرىلۋىن تەكسەرۋ كەزىندە 177 زاڭ بۇزۋشىلىق تاپتى. سونىڭ ىشىندە 101 شارۋا قوجالىعى يەسى قوراداعى مالدارىن تىركەمەي جاسىرىپ جۇرگەنى انىقتالىپ, ولارعا ايىپپۇلدار سالىندى.

سوعان قاراماستان ەلدى مەكەندەر تۇرعىندارى ءۇشىن جايىلىم­دىق جەرلەردىڭ جەتىسپەۋشىلىگى وزەكتى ماسەلەگە اينالدى. وتكەن جىلى اۋىل شارۋاشىلىعى ماقساتىنداعى 195 مىڭ گەكتار جەردىڭ قايتارىلىپ بەرىلۋىنە قاراماستان, ءالى كۇنگە دەيىن اۋىل تۇرعىندارىنىڭ قوراسىنداعى مالىن جاياتىن جەر تاپشى. جايىلىمدىق جەردىڭ جەتىسپەۋ­شىلىگىن, اسىرەسە العا, مارتوك, تەمىر اۋداندارى مەن اقتوبە قالاسىنىڭ توڭىرەگىندەگى ەلدى مەكەن تۇرعىندارى قاتتى سەزىنىپ ءجۇر. ماسەلەن, العا اۋدانىندا – 33 مىڭ, مارتوك اۋدانىندا – 19 مىڭ گەكتار, تەمىر اۋدانىندا – 12 مىڭ, اقتوبە قالاسى اۋماعىندا – 21 مىڭ گەكتار جەر جەتىسپەيدى.

2023 جىلى1 قاڭتاردان باس­تاپ كاسىپكەرلىك كودەكسىنە ەنگىزىلگەن وزگەرىستەر بويىنشا كاسىپكەرلىك نىساندارىن جوس­پاردان تىس تەكسەرۋگە تىيىم سالىنادى. مۇنىڭ كەسىرىنەن جەر ۋچاسكەلەرىن ماقساتتى تۇردە پاي­دالانباعانداردىڭ زاڭ بۇزۋشى­لى­عىن باقىلاۋ قيىن بولاتىن ءتۇرى بار. اسىرەسە قۇرىلىس جۇمىس­تارىن جۇرگىزۋگە الىنعان جەرلەر­دى قاداعالاۋ قولدان سۋسىپ كەتە­دى. ويتكەنى قولدانىستاعى جەر كودەكسىندە كاسىپكەرلىك نىساندارى قۇرىلىس جۇرگىزۋگە العان جەر ۋچاس­كەلەرىن پايدالانۋدىڭ ناق­تى كريتەريلەرى كورسەتىلمەگەن. اۋىل شارۋاشىلىعى مينيستر­لىگى وسى سۇراق بويىنشا جەر كودەكسى­نە وزگەرىستەر ەنگىزۋ تۋرالى ۇسىنىستار ازىرلەپ وتىر. دە­پۋ­تاتتار دا وسى قۇرىلىسقا الىن­­عان جەر ۋچاسكەلەرىن ءتيىمدى پاي­­دالانۋدىڭ زاڭنامالىق نورمالارىن تەزىرەك قاراستىرۋعا ءتيىس.

بيىلعى جىلدىڭ تاعى ءبىر جاقسى جاڭالىعى – اۋىل شارۋاشىلىعى جانە تسيفرلىق دامۋ, يننوۆا­تسيالار جانە اەروعارىش ونەر­كاسىبى مينيسترلىكتەرىنىڭ مەملەكەت مەنشىگىنە قايتارىلعان جەرلەردىڭ ينتەراكتيۆتى كارتانى قولدانىسقا ەنگىزۋى. ەندىگى جەردە تۇرعىندار كەرى قايتارىلعان اۋىل شارۋاشىلىعى ماقساتىنداعى جەر ۋچاسكەلەرىن گەوپورتال ارقىلى باقىلاي الادى. اقتوبە وبلىسىندا دا بىلتىر مەملەكەتكە قايتارىلعان 535 مىڭ گەكتار جەردى گەوسەرۆيسكە ەنگىزۋ جۇمىس­تارى باستالدى. ەندىگى جەردە اقتوبە قالاسىنىڭ اكىمدىگىندە گەو­پور­تال ارقىلى قايتارىلعان جەر­لەردى كورۋگە بولادى. سونداي-اق اۋدان اكىمدىكتەرىنىڭ سايتتارىندا دا وسى مالىمەتتەر ورنالاستىرىلادى.

اقتوبە وبلىسى